Natëtëngëd Tung Paglampud Yang Espiritu Santo Tung Mga Tumatalig (2:1-13)
2
Taa numanyan tung pagkaw̓ut yang uras ang nag̓ipagsilibra yang mga Judio tung pistang pag̓aningën nirang Limang Puluk Ang Kaldaw Ang Pinataklib,
yang mga tumatalig tung ni Jesus saragpun da tanirang tanan.
2 Numanyan may nagngël da nirang sasang pag̓agrut ang inali ra ilëm ang kuminaw̓ut tung nira ang duun manliit tung langit ang maninga palët ang maktël.
Lëëp da yang intirung balay ang pag̓akarungan nira.
3 Dispuis may naita ka nirang kuari mga lilab ta apuy ang nagkarampëd tung nira sasa may sasa.
4 Numanyan tanirang tanan pinamanguluan da yang Espiritu Santo.
Namag̓impisa rang namagbitala tung bitala yang duma-rumang nasyun ang indi pa nag̓akdëkan nira ang kumpurmi yang nag̓ipagpabitala yang Espiritu Santo tung nirang masigpalatay yang bitala yang Dios.
5 Tung uras ang atii,
may mga Judio tung Jerusalem ang duun mamanliit tung sari-saring banwa tung bilug ang kaliw̓utan.
Pamagpasakëp tung pistang atia ay durug katinuuën tung Dios.
6 Numanyan pagkagngël nira yang ginlang atia,
dayun dang namagsaragpun.
Ay nangabërëng da natëtëngëd ang sasa may sasa tung nira,
nag̓agngël da nira yang mga tumatalig ang pagbitala tung sadiling bitala nirang natauan nira.
7 Ya ray nabërëngan nira ta mupya.
Purisu namag̓araning-aningan dang mag̓aning,
“Abaa,
yang mga taung atiang pamagbitala,
bëlag bang panay ang tag̓a Galilea?
8 Ya ra ag̓ari w̓asu ang sasa may sasa tung yatën nag̓agngël ta tanirang pamagbitala tung sadiling bitala tang natauan ta?
9-11 Ita taa sari-saring banwang pinanliit-liitan ta.
May mga tag̓a Partia,
may mga tag̓a Media,
may mga tag̓a Elam,
may mga tag̓a Mesopotamia,
may mga tag̓a taa tung Judea,
may mga tag̓a Capadocia pati tung mga ëla-ëlaan nirang mga banwa,
may mga tag̓a Ponto,
may mga tag̓a Asia,
may mga tag̓a Frigia,
may mga tag̓a Pamfilia pati tung mga ëla-ëlaan nirang mga banwa,
may mga tag̓a Egipto,
may mga tag̓a Libya ang alëngët duun tung siudad ang Cirene,
may mga tag̓a siudad ang Roma ang yang duma mga Judio ig yang duma maskin bëlag̓an mga Judio piru nangalaktëd da tung rilyun tang mga Judio.
May mga tag̓a Creta,
may mga tag̓a Arabia.
Ang pagkatapus pala taawita rang tanan nag̓agngël yang anya-anyang bitalang natauan na tung mga taung naang pamagbaw̓alitaën natëtëngëd tung mga binuat-buatan yang Dios ang durung pisan agkabëw̓ërëng!”
ag̓aaning.
12 Taa numanyan tung masyadu ëngëd ang pagkabërëng nirang tanan ang indi ra ilëm namarësmësan nira ta mupia,
namagtaralimaan-talimaanan tanirang mag̓aning,
“Unu pa kaya ay nag̓adapatan na taa?”
ag̓aaning.
13 Piru yang duma namag̓intra ra taralangkak tung mga tumatalig ang namansianing,
“Abaa,
yang mga taung atia nagkarabalëng da!”
mag̓aning.
14 Pagkagngël ni Pedro tii,
dayun dang nagkërëng,
kasiraan da ka tanira yang mga kaarumanan nang sam puluk may sasa.
Ya ra padakulay na yang busis nang nagpadapat yang bitalang ipinaisip yang Dios tung anya.
Yang Nag̓ipagpakaw̓ut Ni Pedro Tung Mga Masigkanasyun Nang Mga Judio Natëtëngëd Tung Ni Jesus (2:14-40)
Maning taa yang ipinagpadapat na.
“Mga masigkanasyunung mga Judio pati yamung tanan ang pagtinir taa tung siudad ang naang Jerusalem,
kung maimu ilëm tung numyu,
pamatian mi ra kanay ta mupia yang bitalaw.
15 Yami tani,
bëlag̓anaming mga balëng ang kapariu ka tung pag̓alaum yang duma.
Ay baklu pa ka ilëm pag̓alas nuibing timpranua.
16 Ang indi,
yang nainabung atia nungayna,
asan da nagkamatuud yang sasang naula ni Joel ang sasang manigpalatay yang bitala yang Dios ang tukaw.
17 Ay may ipinagpakdëk yang Dios tung anya natëtëngëd tung sasang buatën na tung magdasun ang panimpu baklu ra kaw̓utay yang panimpung baklu.
Maning taa yang inaning na tung anya:
‘Ya taa yang buatënu tung uri.
Magpalampuraw tung Espiritu Santo tung mga kanubli ming maskin tinu pa ang anday pilik.
Yang kaalimbawaan yang pagpalampuru tung nira,
maning pa tung ya pamukbukayu ta wai.
Purisu yang mga kanubli ming mga lalii pati mga baw̓ay,
kayanan da nirang magpalatay yang bitalaw tung mga tau.
Yang mga mamaëpët papanalakinëpënung pampaintindiën kung unu pay dapat ang ipalatay nira.
Pati mga kinamamulaan,
may ipadakatu ka tung panëlëng nira ang indi maita ta duma ang para ya ra kay ipalatay nira.
18 Pati nganing yang mga tauanung mga kirëpën pampalampuranu ka tung Espiritu Santo tig lalii tig baw̓ay ang para mamagpalatay ka yang bitalaw ang ya ray ipasanag na tung mga painu-inu nira.
19-20 Kidispuis pa,
tung kalangitan magpailalaw ra ka yang kalalanganu,
ay yang kaldaw mangiklëp da,
yang bulan manipula ra.
Tung katanëkan man,
magpalapusaw ra ka ta mga pruibang makabëw̓ërëng.
May dug̓ung magbalanaw,
may apuy ang magtunaw tung tanan,
may taw̓uk pang durug damël.
Yang tanan ang atia magkarainabu baklu ra kaw̓utay yang uras ang lusu tung tanan ang ya ray uras ang yuung ti Yawi magpabistuaw ra yang kagaëmanung magsintinsia.
21 Mintras indi pa magkakaw̓ut yang uras ang atia,
kumpurming tinu pay mag̓ambay tung yëën ang magpatapnay,
ya ray tapnayënung ipalibri tung sintinsiang atiang magkaw̓ut,’
ag̓aaningb.
Atia,
yay bitala yang Dios ang ipinasulat na tung ni Joel atiing tukaw ang mga panimpu.
22 “Mga masigkanasyunung mga Israel,
kung maimu ilëm tung numyu,
pamatian mi ra kanay yang bitalaung naa.
May sasang taung nag̓aranan tung ni Jesus ang tag̓a Nazaret ang yay tinuw̓ul yang Dios ang mangay taa tung yatën.
Pinapruibaan na ra nganing ang yay tinuw̓ul na ëkël tung mga pruibang maktël ig makabëw̓ërëng ang ya ra kay ipinaubra na tung anya.
Yamu mismu nag̓askë ay tung katalungaan mi nagkarainabu yang mga bag̓ay ang atia.
23 Yang taung naa itinug̓ut yang Dios tung numyu ay natëtëngëd ilëm tung pinagplanu na ra kang lag̓i para tung anya ig naskëan na ra kang lag̓i kung unu pay pakaw̓utun na.
Pagkatapus ya ray ipinaimatay ming ipinalansang tung krus ang yang mga taung namaglansang tung anya,
ya pa ka man yang anday pag̓intindi nira tung mga katuw̓ulan yang Dios.
24 Piru maskin binuatan mi ta maning tii,
binwi si ka ëngëd ang uman yang Dios.
Binawi na tung kagaëman yang kamatayën ay indi ra ka maimu tiang maawiran.
25 Bilang duun da tung anya nga matuuray yang sasang inaning ni Adi David atiing pagdayaw na tung Dios ang tukaw ang mag̓aning,
‘Pirming nag̓asimanu ti Yawing pagpakigsasa tung yëën ay nag̓akëgnganaw anya ta mupia ug̓ud indiaw ra dëlaan.
26 Purisu ya ray nag̓ikasadya yang isipu ta duru ang nunut da ka ta pagdarayawënu tung anya.
Ig kidispuis pa,
yuu maskin tau ilëm ang suitu ka man ta kamatayën,
piru may nag̓ipagpakbatu tung anya ang yay pag̓inëtëg̓an ang pisan yang isipu.
27 Ay kipurki nag̓askëanu,
Ampuanung Dios,
ang yang ispirituu indi mu patinirën ta mabuay duun tung Hades,
asta yang tinanguniung naa indi mu ra ka paduntun alang-alang da ilëm tung pinangakuan mu tung yëën ang sasang turuw̓ulun mung bilug yang isipu tung nuyu.
28 Ay talagang buiënaw si ka ëngëd nuyung umanc.
Purisu durung pisan agkasadya yang isipu tung uras ang atia ay natëtëngëd magsapënanita ra ang asta tung sampad,’
ag̓aaning.
Atia,
ya ray bitalang isinulat ni Adi David ang natëmëng dang pisan tung ni Jesus ang naa.
29 “Mga kaputulan,
kung natëtëngëd tung ni Adi David ang atiang kinaampu tang nagtukud tung sasang pag̓aradiën tung nasyun ta,
maktël yang isipung mag̓aning tung numyu ang talagang napatay ig yang tinanguni na ipinalg̓ud tung sasang lëyang ig yang pinanlug̓uran ang atia tung anya,
taa ka ang asta ra ilëm simanyan.
30 Tanya sasang manig̓ula atiing bui pa ig naskëan na ka ang may isinumpa yang Dios tung anya ang tung uri ta kaldaw,
may sasang kanubli na ang yay pasubliën na tung pagkaadi na.
31 Bilang atiing pag̓aning nang indi ra unu patinirën tanya ta mabuay duun tung Hades,
asta yang tinanguni na indi ra ka unu madunut,
ya ray pag̓ula na natëtëngëd tung mainabu tung pag̓aningën ang Cristo ang tanya buiën si kang uman yang Dios.
32 Yang gustuung ianing tia,
ti Jesus ang naang nag̓asambitu ya ra ka man ay binwi si kang uman yang Dios ig yaming tanan taa sistigusami tung pagkamatuud natëtëngëd tung nainabung atia.
33 Pagkatapus numanyan ya ray ipinalandaw ëngëd yang Dios ang pinakarung tung ampir tung tuu na ang para kasiraan da ka tanirang mamaggaraëmën.
Ig pinakdulan da ka yang pag̓aningën nang Ama Na ta pudir nang magpalampud tung Espiritu Santo tung mga tauan na ang katulad ka tung pinangakuan na.
Ang pagkatapus numanyan yang Espiritu Santong atia ya ra ka man ay ipinalampud na tung yamën ang yang kaalimbawaan na maning pa tung waing ibinukbuk na tung yamën.
Ya ra ka man taa yang natëngëran yang pruibang naa ang yamu mismu ay nag̓aita kag nag̓agngël tung yamën.
34-35 Bëlag̓an ang mag̓aning ang ti Adi David ingkëlan da yang Dios duun tung langit ang katulad ka tung binuat na tung ni Jesus,
kung indi,
naula na ilëm natëtëngëd tung pagpalandaw yang Dios tung ni Jesus atiing pag̓aning na ang,
‘Yang Ginuuu pinag̓aning da ni Yawi ang magkarung da unu tung tëpad na tung tuu mintras pamirdiën na unu yang tanan ang pamagkuntra tung anya ang asan da unu ipampabtangay na tung tarampakan yang kakay nae,’
mag̓aning.
36 Kapurisu duun da ngaintindiay yang intirung nasyun tang naang Israel ang ti Jesus ang naang nag̓aaningu,
ag̓ad ta numyu ya ray ipinalansang mi tung krus,
piru ya pa ka ëngëd ay ipinagpailala ra yang Dios ang pinapaggaëm na bilang tanya ka man yang pag̓aningën ang Cristong nag̓aëlatan ta kang lag̓i,”
mag̓aning duun ti Pedro.
37 Taa numanyan,
pagkagngël da yang mga tau yang pinag̓aning ni Pedrong atia,
pinandulutan da ta mupia yang mga isip nira.
Ya ra mamanalimaan tung ni Pedro may tung kadaklan ang mga taralig̓an ni Ginuung Jesus ang mag̓aning,
“Mga putul,
unu pa kaya ay dapat ang buatën yamën?”
38 Mag̓aning ti Pedrong nagtuw̓al,
“Manlignaamu ra tung binuatan ming atia tung anya ig sasa may sasa tung numyu masigpabënyag ang masigpailala tung publiku ang talagang nagsukuamu ra ka man ang matuud tung anyang nagpagaëm.
Ya ray buatën mi ug̓ud mapatawaramu ra yang Dios tung mga kasalanan ang nagkarabuat mi.
Atia,
buluntaranamu ra ka anyang patiniran tung Espiritu Santo.
39 Yang pagpatinir nang atia tung numyu,
ya kang lag̓i ay pinangakuan nang ikaayën mi pati yang mamagsurubli-subli tung numyu asta tung tanan ang mga taung alalawid tung banwa ta ang kumpurming tinu pay imbitarën ni Yawi ang ya ka man ay Dios ang pag̓atuuan tang mga Israel,”
mag̓aning duun ti Pedro.
40 Taa numanyan,
duru pa kang mga bitalang ipinagpaingmatuud na tung nirang ipinag̓asig̓-asig ta maning taa:
“Italig mi ra tung ni Jesus yang mga sadili mi ug̓ud tapnayënamu ra anyang ipalibri tung sintinsiang dangatën yang mga masigkanasyun tang naang durug kalain yang pagpakuindi nirang atia tung anya,”
mag̓aning.
Tulung Liw̓u NGa Tauan Ang Pamagtalig Da Tung Ni Jesus (2:41-42)
41 Kapurisu numanyan dakëlë ra tung nirang namagpauyun da tung bitala ni Pedro.
Dayun dang namampabënyag ang namampailala ang tanira nagtalig da ka man ang matuud yang mga sadili nira tung ni Jesus.
Purisu tung uras ang atii,
mga tulung liw̓u nga tauan ang nangadulang dang namagpakigsapën tung kaugpuan yang dating mga tumatalig tung ni Jesus.
42 Numanyan yang nag̓apadërëpan nira ta maayën ya ra yang pagpatulduk nira tung mga apustul may yang pagsarasaan nirang magpurutul.
Muya-muyang pamagsararuan ang katuglayunan da ka yang pagpiringas-pinagasan nira ta tinapay sigun tung pagpakugmatay ni Ginuung Jesus para tung niraf.
Natëtëngëd Tung Sistima Nirang Mga Tumatalig Ang Durug Tinlu (2:43-47)
43 Taa numanyan,
pinagbatikalan da ta mupia yang isip yang kadaklan ang mga tau asan natëtëngëd durung mga pruibang maktël ang ipinagpaita ni Jesus ëkël tung mga taralig̓an nang pinampaktël na.
44 Asta yang tanan ang mga tumatalig namagpadayun tung pagpurutulan nirang durug tinlu ang pamagparakdul-pakdulan kung tinu pay may kaministiran.
45 Bilang kung tinu pay may ganadus ubin dumang mga kaayënan,
ya ray ipinaalang nira ug̓ud yang bayad nang kuarta ipanëptëp tung mga kaarumanan nira.
Kumpurmi yang kaministiran nirang sasa may sasa,
ya ray pinatëng-patëng nirang pinamakdulan.
46-47 Dispuis kaldaw-kaldaw durug dërëp tanirang pamagsaragpun-sagpun duun tung palayas yang pagtuuan yang mga Judiong atiang pinakalusu.
Pagkatapus pamagbalay-w̓alay pa tanirang pamagsararuan ang tuglayun da ka yang pagpiringas-pingasan nira ta tinapay sigun tung pagpakugmatay ni Ginuung Jesus.
Pamanadyaan ta durung pamagsararuan ang tëdëk tung mga pupusukun nira ig nunut da ka ta pagdarayawën nira tung Dios.
Dispuis nag̓agalang da ka tanira ta mupia yang kadaklan yang mga masigkanasyun nirang mga Judio.
Kidispuis pa ti Ginuung Jesus,
sigi-sigi yang pagpadulang na tung kinadakël nira ëkël tung mga taung baklung nag̓apanapnay na.