16
“Yang mga bag̓ay ang atia,
ipinakdëku rang lag̓i tung numyu ug̓ud indiamu ra maplëkan ta ipagtalig mi tung yëën.
2 Sipurki yang mainabu,
ityapuiraënamu ra yang mga pamagpakigmaëpët tung mga pagsaragpunan mi.
Bëlag̓an ilëm maning tia yang buatën nira tung numyu,
ang indi,
may uras ang kaw̓utun ang kung tinu pay mangimatay tung numyu,
kalaum na ya ray ustung pagsirirbisyuën na tung Dios.
3 Yang mga bag̓ay ang maning tia ya ray buatën nira tung numyu natëtëngëd indiami kang lag̓i nag̓ailala nira ni Ama.
4a Kapurisu ya ray nag̓ipabantayung lag̓i tung numyu, ug̓ud kung kaw̓utun da nganing yang uras ang ipagbuat nira ta maning tia tung numyu, madëmdëman mi ang yuu ka man mismu ay nagpakdëk tia tung numyu.
Natëtëngëd Tung Pag̓urubraën Yang Espiritu Santo (16:4b-24)
4b “Yang tukaw indiamu pinakdëku yang mga bag̓ay ang atia, ay taanaw pa tung numyu.
5-6 Piru simanyan magbalikaw ra tung nagpangay tung yëën ang pagkatapus bëlag yamu magtalimaan tung yëën kung ariaw pa manganing,
kung unu pay pagkabëtangu duun tung panganinganu,
ang indi,
yamu ra sampiay ta kapungaw ming subra!
More teaching about the Holy Spirit (Juan 16:5-33)
7 Piru iugtulu tung numyu yang kamatuuran,
mas maayën ngani tung numyu ang yuu magliit da.
Sipurki kung indiaw magliit,
yang Manigpadag̓ën-dag̓ën ang ya ra yang Espiritu Santong atiang nag̓ianingu,
indi mangay taa tung numyu.
Piru kung magliitaw ra,
ya ray ipaangayu tung numyu.
8-11 Kung kumaw̓ut da nganing,
ya ray magpabatikal tung mga isip yang mga taung pamagpaguyud tung sistimang pangkaliw̓utan ang kamali yang pag̓irintindiën nira natëtëngëd tung kasalanan.
Kipurki paintindiën na tanira ang talagang kasalanan nirang dakulu ang indi nira ag̓italig tung yëën yang mga sadili nira.
Pati yang pag̓irintindiën nira kung tinu pa ëngëd ay matadlëng,
ipabatikal na ka tung mga isip nira ang kamali ka.
Kipurki paintindiën na ra tanira ang yuu ray pinapruibaan ni Ama ang matadlëngaw gatëd pinabalikaw ra anya duun tung anya.
Indiaw ra ngani maita mi taa.
Asta yang pag̓irintindiën nira sigun tung pagsirintinsiaën yang Dios tung mga tau,
ya ka,
ipabatikal na ka tung mga isip nira ang kamali ka.
Kipurki paintindiën na ra tanira ang yang tingkaw ra yang Dios ang sinintinsiaan,
ya ra ti Satanas ang yay pagmangulu tung sistimang pangkaliw̓utan ang tung uri pati tanirang kumpurming pagpaguyud pa,
madamay ra ka.
12 “Dakëlë pa rin yang gustuung ipakdëk tung numyu,
piru indi mi pa ka ilëm masarangan ta pag̓intindi simanyan.
13 Piru kung kumaw̓ut da nganing yang Espiritu Santong magparasanag̓ën tung numyu,
asan da ëngëd tung anya nga tultulay mi yang tamang pag̓irintindiën tung Dios.
Sipurki yang ipasanag na tung numyu bëlag̓an sadiling bëët-bëët na ilëm,
ang indi,
kumpurming unu pay magngël na tung yëën,
ya ray ipakdëk na tung numyu.
Asta yang mga bag̓ay ang magkarainabu tung panalungaan,
ipabunayag na ra ka tung numyu.
14 Tanya,
anday dumang padëngëg̓an na,
kung indi,
yuu ra ay kipurki tung yëën ngagngëlay na yang mga bag̓ay ang atiang ipalatay na tung numyu.
15 Piru bëlag̓an ang mag̓aning ang yang ipalatay nang atia tung numyu,
yëën ilëm ang sadili,
ang indi,
ti Ama ya kay may anya natëtëngëd tung paglinikutay yamën.
Purisu ya ray nag̓ipag̓aningu tung numyu ang tung yëën ngagngëlay na yang kumpurming ipalatay na tung numyu.
Yang Pagpungawan Nira Baliskarën Ni Jesus Ang Yay Ikasadya Nira (16:16-33)
16 “Simanyan indi ra ilëm buay,
malipataw ra tung mata mi.
Pagkatapus,
indi ka ilëm buay,
maitaw si ka numyung uman,”
mag̓aning.
17 Taa,
simanyan,
yang dumang mga aruman yamën ang nag̓apangugyatan ni Jesus,
namag̓araning-aningan dang mag̓aning,
“Unu pa kaya ay linagpakan yang bitala nang atia ang indi ra ilëm unu buay,
malipat da unu tung mata ta ang pagkatapus,
indi ka ilëm unu buay,
maita ta si ka unung uman.
Asta tiing sam bilug pang aning na ta nungayna ang indi ta unu maita natëtëngëd magbalik da unu tung ni Ama na,
unu pa kayay gustu nang ianing?
18 Unu pa atiing naaning nang atii ang indi ra ilëm unu buay?
Indi ilëm nag̓askëan ta kung unu pay gustu nang ianing,”
mag̓aning tanira.
19 Simanyan nag̓askëan da ni Jesus ang gustu rin nirang magtalimaan tung anya kung unu pay linagpakan yang mga bitala nang atia.
Purisu dayun dang nag̓isplikar tung nirang mag̓aning,
“Naa pala,
ya ray nag̓apagkërësënan mi yang mga bitalaw ang indi ra ilëm buay malipataw tung mata mi ang pagkatapus,
indi ka ilëm buay maitaw si ka numyung uman?
20 Taa,
simanyan iparangkaw ra tung numyu yang kamatuuran kung unu pay linëgdangan na.
Ta yamu,
magtarangitënamung mag̓urulimëngmëngën.
Piru yang mga taung pamagkuntra tung yëën,
ya ray mamagkalipay ta mupia.
Piru yang kapupungawën ming atia ya ray magyaring kasadyaan mi.
21 Katulad ang pisan tung baw̓ay ang mangana.
Kung kaw̓utun da nganing yang uras ang ipangana na,
magbalunbun da ta siit nang puirti.
Piru kung maluangan da nganing,
malipatan na ra yang siit ang atiang pinasaran na,
ay natëtëngëd tung kalipay yang isip nang may mula rang baklung natau tung kaliw̓utan.
22 Maning kang pisan tia tung numyu.
Simanyan ag̓ampayanamu ra ta kapungaw mi.
Piru kung mag̓irita-ita si kang uman,
masadyang pisan yang mga isip mi.
Dispuis yang kasadyaan ming atia,
anda ray sarang ang mapanguat.
23 Kung kaw̓utun da nganing yang uras ang atia,
anda ray ingalukun mi tung yëën.
Manangëramu ra tung yëën,
kung unu pay ingalukun mi tung ni Amang yuuy kabakëran mi,
ipakdul na tung numyu.
24 Luyut dang luyut,
anday iningaluk mi tung ni Amang yuuy kabakëran mi.
Purisu mag̓ingalukamu ra tung anya ig pakdulanamu ra ka anya ug̓ud sadyaanamu rang pisan.
25 “Yang mga bag̓ay ang naang ipinagpakaw̓utu tung numyu,
ipinapanawu tung mga pananglit.
Piru may uras ang kaw̓utun ang bëlag dang pananglit ang gamitënu,
ang indi,
idiritsyu ra yang ipasanag̓u tung numyu natëtëngëd tung ni Ama.
26 Kung kaw̓utun da nganing yang uras ang atia,
magdiritsyuamu ra ilëm tung ni Amang mag̓ingaluk natëtëngëd ka man yamu mga tauanu.
Anda ray kaministiran ang pangakuanamu pa yëën ang yuu pay mag̓ampu para tung numyu.
27 Sipurki tanya mismu nag̓apaggëgma ra tung numyu natëtëngëd yamu naggëgma tung yëën ig nanangëramu ra ka ngani ang yuu duunaw tung anya nagliit.
28 Duunaw ka man tung ni Ama nagliit ang minangay taa tung kaliw̓utan ang naa.
Utru si,
taanaw si ka magliit tung kaliw̓utan ang naa ang magbalik tung anya,”
mag̓aning ti Jesus.
29 Simanyan,
yaming nag̓apangugyatan na,
nagtimalësami kang mag̓aning,
“Atia,
bëlag dang pananglit,
ang indi,
ipinalw̓aw mu ra.
30 Baklu ra nga marësmësay yamën ang ta yawa nag̓asangkad mung pisan yang tanan ang bag̓ay maskin yang nag̓abtang tung mga isip yamën.
Maskin may nag̓aisipan ilëm yamën ang talimaanën tung nuyu,
nag̓askëan mu ra kang lag̓i baklu sambitay yamën.
Kapurisu asanami rag panangëd ang yawa tung Diosa ka man nagliit.”
31 Mag̓aning ti Jesus ang minlës,
“Taa,
panangëramu ra simanyan,
aa?
32 Piru tandaan mi taa yang bitalaw.
Magkakaw̓ut da yang uras,
kuminaw̓ut da nganing ang magkarawasakamu ra ka ëngëd ang masiglibri tung anya-anyang balay.
Yuu ra ka ilëm butwanay mi.
Piru basin maning da tiang mainabu,
piru indiaw ka mapisanan,
ay ti Ama pagpakigsasang pirmi tung yëën.
33 Yang tanan ang atia ipinagpakdëku ra tung numyu ug̓ud may kalimëngan yang mga isip mi ëkël tung pagkinapulitay ta.
Ay tung kaliw̓utan ang naa,
siguradung mapasaranamu ra ta mga kaliwag̓an.
Piru maski maning tia,
paktëlën mi ra yang mga isip mi,
sipurki ta yëën,
nandëëg̓aw ra tung sistima na.”