Pag̓ampu Ti Jesus Ang Asan Da Tung Pagpakugmatay Na Ipabistu Ni Ama Na Yang Kadëngëg̓an Na (17:1-5)
17
Taa numanyan,
pagkatapus ni Jesus ta pagparasanag̓ën na tung yamën natëtëngëd tung mga bag̓ay ang atia,
dayun dang tuminingarang nag̓ampu ang mag̓aning,
“Ama,
kinaw̓ut da yang uras ang ipinagtipu mu kang lag̓i para tung yëën.
Purisu yang nag̓ipag̓ampuu tung nuyu,
asan da ëngëd ipabistu mu yang kadëngëg̓anu ug̓ud ta yëën ang pag̓aningën mung Ana mung pangërëngan tung nuyu,
asana ra ka nga padëngëg̓ayu.
2 Magkabag̓ay ang yay ipabistu mu tia,
ay natëtëngëd pinakdulanaw ra nuyu ta pudirung maggaraëmën tung tanan ang mga tau ug̓ud yang kumpurming ipinagtalig mu tung yëën,
paëyanganu ta ipagpangabui nirang baklu ang anday pagtapusan na.
Jesus prays for his followers (Juan 17:1-26)
3 Kumus may ipagpangabui nirang maning tiang klasi,
yang ilyag nang ianing,
tanira may yawang ultimu ilëm ang Dios,
magkarapulitanamu ra ig tanira may yuung tinuw̓ul mua,
ya ka,
magkarapulitanami ra ka.
4 Kidispuis pa ta yëën,
talagang padëngëg̓ana ra yëën taa tung kaliw̓utan ang naa ëkël tung pagtalusu tung itinuw̓ul mu tung yëën.
5 Kapurisu,
Ama,
yang nag̓aingaluku si tung nuyu,
kung asanaw ra nganing tung nuyu,
padëngëg̓ay ka nuyung pabalikën tung dating pagkabëtangung masusulaw atiing asanaw pa tung nuyung indi pa nag̓aimu yang kaliw̓utan.
Yang Nag̓ipag̓ampu Ni Jesus Natëtëngëd Tung Mga Taung Nag̓apangugyatan Na (17:6-19)
6 “Simanyan yang mga tau taa tung kaliw̓utan ang kumpurming ipinagtalig mu tung yëën,
pinagpasanag̓anu ra natëtëngëd tung nuyu.
Nuyu kang lag̓i tanira baklu mu ipinagtalig tung yëën,
ang pagkatapus yang bitala mu ya ray pinanangëd nira.
7 Purisu simanyan,
nag̓amarësmësan da ka nira ang yang tanan ang ipinagtulduku tung nira,
ay liit tung nuyu.
8 Ay yang mga bitalang inintriga mu tung yëën,
ipinalatayu ra tung nirang inintriga,
ang pagkatapus,
pinauyunan da ka nira.
Kapurisu nabilug̓an da ka nirang pisan ang asanaw liit tung nuyu ig pamanangëd da ka ang yaway nagtuw̓ul tung yëën.
9 “Kapurisu,
Ama,
yang nag̓ipag̓ampuu tung nuyu simanyan,
bëlag̓an yang mga tau taa tung kaliw̓utan ang naa ang pagpakuindi tung yëën,
kung indi,
yang mga taung naang ipinagtalig mu tung yëën.
Taniray nag̓ipag̓ampuu tung nuyu,
Ama,
ay natëtëngëd tanira nuyu.
10 Ay yang tanan ang yëën,
nuyu ka.
Asta yang tanan ang nuyu,
yëën ka.
Dispuis,
taniray nag̓ikadëngëg̓u.
11 “Pagkatapus,
simanyan,
Ama,
magliitaw ra taa tung kaliw̓utan ang naang magbalik asan tung nuyu.
Piru yang nag̓apangugyatanung naa,
ya pay mangabutwan taa.
Kapurisu,
Ama,
yawang duruag kasagradu,
bantayan mu tanira tung mga tuksu ëkël tung kagaëman mu ang ya ra ka man taang ipinagpiar mu tung yëën,
ug̓ud pirming magsarasaan tanira ang katulad ka tung yatën ang pagsinasaay ra kang lag̓i.
12 Luyut dang luyut ang taawaw pa tung nira,
yuuy nagbantay tung nira ëkël tung kagaëman mung atiang ipinagpiar mu tung yëën.
Pinagmanadaanu ngani tanira ta mupia,
purisu anday naplëk tung yëën,
sapayan pa taang sam bilug ang anday dumang panampëtan na tung uri,
kung indi,
kadiaduan da ëngëd ang anday katapus-tapusan na ang asan da magkamatuud yang sasang napabtang tung kasulatan natëtëngëd tung anyab.
13 Piru simanyan,
Ama,
magbalikaw ra asan tung nuyu.
Ug̓aring mintras taanaw pa tung kaliw̓utan ang naa,
yang mga bag̓ay ang atia ya ray nag̓ipadngëlu tung nag̓apangugyatanu ug̓ud asan da ngaëyangay tanira ta kasadyaan yang mga isip nirang duru ang katulad ka tung kasadyaan yang isipu.
14 Ta yëën,
itinalig̓u ra tung nira yang bitala mu ang pagkatapus asan da tanira nga kuntraay yang mga taung pamagpaguyud pa tung sistima yang kaliw̓utan ang naa.
Ay ya pa ag̓ari,
yang sistimang atia pinanalyuran da nirang namanulad tung yëën ang bëlag̓anaw kang lag̓ing lug̓ud asan.
15 Indiaw ka pag̓ingaluk ang tanira paliitën mu tung kaliw̓utan ang naa,
ang indi,
yang nag̓ipag̓ampuu tung nuyu ang tanira bantayan mu ra ta mupiang manadaan ug̓ud indi maëklan ta aklës ni Satanas ang yay pinangapunglan yang tanan ang mga malalain ang pag̓urubraën.
16 Yang sistima yang kaliw̓utan ang naang nag̓amanguluan na,
pinanalyuran da nirang namampakbung tung yëën ang yuu bëlag̓anaw kang lag̓i lug̓ud asan.
17 Yang gustuu,
Ama,
papagtëërën mu yang mga isip nirang magtuman yang kalëlyag̓an mu.
Ang para magkamaningan da ta maning tia,
luakan mu yang mga kinaisipan nira yang kamatuuran natëtëngëd tung nuyu ang yay nag̓adapatan yang tanan ang ipinagtulduku tung nira.
18 Kipurki katulad ka tung yëën ang tinuw̓ul mung magparakaw̓utun yang bitala mu tung mga tau taa tung kaliw̓utan ang naa,
tanira ya ra kay panuw̓ulunung magparakaw̓utun ka natëtëngëd tung yëën.
19 Purisu natëtëngëd tung nira,
tëërënu ra ëngëd yang isipung magtalus tung itinuw̓ul mu tung yëën ug̓ud pati tanira tëërën da ka nira yang mga isip nirang magtuman yang ituw̓ulu tung nira ëkël tung kamatuuran ang naang nag̓iluak mu tung mga kinaisipan nira.
Nag̓ipag̓ampu Ni Jesus Yang Dumang Mga Taung Mamagtalig Da Ka Tung Anya (17:20-26)
20 “Ama,
bëlag̓an ilëm yang mga arumanung naa yang nag̓ipag̓ampuu tung nuyu,
ang indi,
pati yang kumpurming magtalig ka tung yëën ëkël tung balitang ipagpakaw̓ut nira tung nira,
ya ka.
21 Yang gustuung gustu,
Ama,
tanirang tanan ang mga tumatalig tung yëën ay magsarasaan da ta mupia ang katulad ka tung pagsinasaay tang durua ang yawa,
Ama,
pagpakigsasa tung yëën ig yuu kay pagpakigsasa tung nuyu.
Maning tia yang nag̓aingaluku tung nuyu ay ug̓ud tung pagsarasaan nira,
asan da mamanangëd yang kadaklan ang mga tau ang yawa ka man yang nagtuw̓ul tung yëën.
22 Yang kadëngëg̓an ang ipinakdul mu tung yëën ang nagparanëk tung pagkabëtangu,
ya ra kay ipinakdulu tung nirang tanan ug̓ud tung pagpararanëkan nira,
asan da tanira magsarasaan ta maayën ang katulad ka tung yatën ang pagsinasaay kang lag̓i.
23 Bilang ëkël tung pagpakigsasaw tung nira may kadëngëg̓an da ka nira ang katulad ka tung yëën ang may kadëngëg̓anu ka ëkël tung pagpakigsasa mu tung yëën.
Yang nag̓asikaru ëngëd asan ay ug̓ud asan da magkatinlu yang pagsarasaan nira ang para asan da ngaintindiay yang kadaklan ang mga tau ang yawa ka man yang nagtuw̓ul tung yëën ig asan da ka nga bilug̓ay nira ang nag̓agëgmaan mu tanira ang katulad ka tung paggëgma mu tung yëën.
24 Ama,
yang mga taung naang ipinagtalig mu tung yëën,
gustuu ang kung ariaw pa,
ay duun ka tanira tung tëparu ug̓ud mabilug̓an da nira yang kasusulawënu atiing dating ipinakdul mu tung yëën natëtëngëd tung gëgma mu tung yëën atiing indi pa nag̓aimu yang kaliw̓utan.
25 “Ama,
yawang pulus tung tama yang pag̓abuat mu,
india pa ka ëngëd nag̓ailala yang mga taung pamagpaguyud pa tung sistima yang kaliw̓utan ang naa.
Piru ta yuu,
nag̓ailalaa kang lag̓i yëën pati mga taung naang nag̓apangugyatanu,
nag̓askëan da ka nira ang yawa ka man yang nagtuw̓ul tung yëën.
26 Ay pinagpasanag̓anu ra natëtëngëd tung pagkadios mu ig ya kay nag̓apadayunanu ug̓ud yang gëgmang nag̓ipaita mu tung yëën,
mapanimanan da ka nira tung mga sadili nira ang pati tanira lug̓ud da ka asan ëkël tung yëën ang pagpakigsasa tung nira,”
mag̓aning ti Jesus ang pag̓ampu.