El Espíritu de Dios y el espíritu que está contra el Cristo
4
Yʉ yarã,
aperã oco bairo ca-ĩito teñarã ãma:
“Dio ye quetire ca-buioʉ yʉ ãa,
Dio cʉ̃ ca-buio joo rotiricʉ yʉ ãa,”
ca-ĩito teñarã capaarã ãma.
To bairi mʉja tʉpʉ na ca-ejaro na ca-buiorije ¿cariapena Dio ye,
Espíritu Santo mena to anibaparí?
ĩi tʉgooña majiña.
Dio ye cariape ca-ĩi buioquẽna na ca-ano tʉjʉ majiri na apiʉjaqueticõaña.
2 Cariape Dio ye queti majuu Espíritu Santo jʉgori ca-buiorãre oco bairo na mʉja tʉjʉ beje majigarã:
“Jesucristo Dio cʉ̃ ca-jooricʉ ãmi,
manire bairona camajocʉ rupaʉ mena ca-buiaricʉ ãmi,”
ĩima ca-ĩitoquẽna maca.
To bairo cariape ca-ĩirãre ca-api nʉcʉbʉgope ãa.
3 To bairo cariape Jesucristo cʉ̃ ca-aniere ca-ĩi nʉcʉbʉgoquẽna maca Espíritu Santore ca-cʉgoquẽna ãma naa.
Dio cʉ̃ ca-buio rotiricarã mee ãma naa.
Cristore ca-teerã maca ãma.
“Cristore ca-tei majuu anigʉmi jicãʉ,”
ca-ĩi buiori wamere mʉja apiricarã,
meere.
Cʉ̃re bairona Cristore ca-teerã jicãarã ani tʉgama,
meere.
Nana ãma,
“Dio ye quetire ca-buioʉ yʉ ãa,”
ca-ĩitorã.
4 To bairona ati yepapʉ ca-ĩito teñarã Sataná yarã ãma.
Mʉja maca Dio yarã mʉja ãa.
Sataná netoro ca-tutuaʉ ãmi Dio.
To bairi cʉ̃ Espíritu Santo mʉja mena cʉ̃ ca-ano Sataná yarã ca-ĩito pairãre na mʉja netoo nʉcañupa.
Nare mʉja ca-apiquetinucuñupa.
5 Naa ca-ĩito pairã ati yepa macana Diore ca-apiʉjaquẽna mena macana ãma.
To bairi Diore ca-nʉcʉbʉgoquẽna ye macajere caroorije macare buionucuma camajare.
To bairo na ca-ĩi buioro ati yepa macana Diore ca-apiʉjaquẽna maca caroaro na apiʉjama.
6 Mani maca Dio mena macana mani ãa.
To bairi cʉ̃ yarã ca-ãna mani ca-buiorijere apirãma.
Dio yarã ca-aniquẽna maca manire apigaquẽema.
To bairo na ca-bairijere tʉjʉrã,
oco bairo mani ĩi maji:
“Ati majana ãma cariapena Dio yere ca-nʉcʉbʉgorã.
I maja maca ãma ĩitoriquere ca-api nʉcʉbʉgorã,”
mani ĩi tʉgooña beje maji nare.
Dios es amor
7-8 Dio ca-maii majuu ãmi.
To bairi mani quenare ca-ame maipe ãa.
Aperãre ca-mairã Dio punaa ãma.
Diore ca-majirã ãma.
Noa aperãre ca-maiquẽna maca Diore majiquẽema.
9 Dio cʉ̃ Macʉ jicãʉna ca-ãcʉ̃re ati yepapʉ cʉ̃re joʉ,
manire cʉ̃ ca-mairije ca-iñooñupi.
Cʉ̃ mena mani ca-anicõa aninucuparore bairo ĩi ca-jooyupi cʉ̃ Macʉre.
10 Nemoona cʉ̃re mani ca-maiquetaje to ca-anibato quena manire ca-maiñupi.
Manire mairi cʉ̃ Macʉre ca-jooyupi.
To bairi cʉ̃ Macʉ manire cʉ̃ ca-bai yajibojarique jʉgori caroorije mani cá-átaje wapa majiriogʉ cʉ̃ ca-jooyupi cʉ̃ Macʉre.
To bairo manire cʉ̃ cá-átibojarique jʉgori mani maji ame mairique macajere.
11 Yʉ yarã yʉ ca-mairã,
Dio manire cʉ̃ ca-mairore bairona mani quena aperãre ca-ame maiparã mani ãa.
12 Jicãʉ mácana Diore ca-tʉjʉricʉ maami.
Cʉ̃re ca-tʉjʉquẽtana anibana quena aperãre mani ca-maiata mani mena cʉ̃ ca-aniere mani maji.
To bairi manire cʉ̃ ca-mairije jʉgori aperãre netobʉjaro na mani ca-mairo áami Dio.
13 Cʉ̃ Espíritu Santore mani ca-jooyupi Dio.
To bairi mani maji manipʉre cʉ̃ ca-aniere.
Cʉ̃ mena macana mani ca-anicõa anie quenare mani maji.
14 Jã majuuna jã ca-tʉjʉwʉ Dio Macʉre.
To bairi oco bairi wame jã queti buionucu:
“Cʉ̃ macʉ Jesúre ca-jooyupi cʉ̃ pacʉ Dio,
ati yepa macana caroorije wapare na netoogʉ.”
15 “Dio Macʉna ãmi Jesú,”
ca-ĩirã una caroaro Dio mena ãma.
Dio quena na mena anicõami,
“Cʉ̃ Macʉna ãmi Jesú,”
ca-ĩirã menare.
16 Tie jʉgori,
meere mani maji cariape Dio manire cʉ̃ ca-mairijere.
Dio maca camajare mairique macacʉ ãmi.
To bairi noa aperãre ca-mairã caroaro Dio mena ãma.
Cʉ̃ quena na mena anicõami.
17 Jesucristo ati yepapʉ cʉ̃ ca-ano cʉ̃ mena ca-añupi cʉ̃ Pacʉ Dio.
Jesucristo mena cʉ̃ ca-ãnatore bairona mani mena ãmi Dio mani quenare.
To bairi Dio camajare cʉ̃ ca-mairore bairo mani quena aperãre na mani mai maji Dio mena macana aniri.
To bairi camajare Dio cʉ̃ ca-bejeri rʉmʉ ca-anopʉ tʉgooña pai uwiricaro mano mani yuugarã.
18 Ca-ame mairã na ca-anopʉ uwirique maa.
Mani ca-ame maiata mani ame uwiquẽe.
Uwi tʉgooña bairique ãa,
jicã wame apeĩre rooro cʉ̃re mani cá-áto ĩibana.
To bairi,
“Mani cá-áti jʉgorique wapa mani popiyeyeboʉmi,”
ĩibana cʉ̃re mani uwirã.
To bairi apeĩ cʉ̃re mani ca-uwiata cʉ̃re mani mai majiquẽna.
19 Diore mani mai,
manire cʉ̃ ca-mai jʉgorique jʉgori.
20 “Diore yʉ mai,”
ĩibana quena aperãre mani ca-tʉjʉ tutiata,
ca-ĩito pairã mani ãnaa.
Camaja mani ca-tʉjʉricarã na mani ca-maiquẽpata Dio mani ca-tʉjʉquetacʉ quenare mani mai majiquẽna.
21 Oco bairo mani ca-rotiwĩ Jesucristo:
“Diore ca-mairã aniri aperã quenare na maiña,”
jã ca-ĩiwĩ.