SEGUNDA CARTA DEL APÓSTOL
SAN PEDRO
Pedro escribe a los creyentes
1
Yʉ Simón Pedro mʉjaare yʉ queti uca joo.
Jesucristo cʉ̃ paabojari majocʉ yʉ ãa,
cʉ̃ ye quetire cʉ̃ ca-buio rotiricʉ aniri.
Ati pũuro mʉjaare yʉ queti uca joo jãare bairona Jesucristore ca-api nʉcʉbʉgorãre.
Cariape áami Dio.
Jesucristo to bairona cariape ãmi.
Manire ca-netoo catíoʉ ãmi.
To bairi cʉ̃re caroaro manire cá-átibojaʉre mʉja tʉgooña ocabʉti mʉja quena.
2 Caroaro mʉjaare yʉ ñuu roti.
Dio,
Jesucristo caroare mʉjaare na joato,
na ca-aniere mʉja ca-majinemoro jʉgori.
Cualidades del cristiano
3 Caroaʉ majuu ãmi Jesú.
Camaja nipetirã Jesúre caroaro cʉ̃ ca-ĩi nʉcʉbʉgoparã ãma.
Manire ca-bejeyupi,
cʉ̃re ca-majiparãre,
cʉ̃ yarã ca-aniparãre.
To bairi cʉ̃ ca-tutuarijere mani joomi caroare mani cá-áti majipere,
cʉ̃re mani cá-áti nʉcʉbʉgoparore bairo ĩi.
To bairi cʉ̃re ca-majirã aniri,
cʉ̃ yarã aniri caroare mani áti majigarã.
4 Caroaʉ majuu aniri,
“Caroare capee mʉjaare yʉ átibojagʉ,”
ca-ĩiñupi.
“Ati yepa macana yʉre ca-nʉcʉbʉgoquẽnare bairo mʉja cá-áti aniquẽto mʉjaare yʉ átibojagʉ.
Na maca roorije na ca-tʉgooñarije jetore átinucuma.
Nare bairo mʉja aniquetigarã.
Yʉre bairo ca-ãna maca na ãmaro ĩi mʉjaare yʉ átibojagʉ,”
manire ca-ĩi cũuñupi Dio.
Caroa majuu manire ca-ĩi cũuñupi.
To bairo manire cʉ̃ ca-ĩi cũuricarore bairona manire cá-átibojayupi,
cʉ̃ ca-anie cʉtiere manire joʉ.
5 To bairi mʉjaare Dio cʉ̃ cá-átibojape quenare tʉgooña ocabʉtiya.
Cʉ̃re tʉgooña ocabʉtiri caroa jeto átajecʉja.
Dio yere cariape api majiña.
6 Cariape api majiri mʉja majuuna caroorije mʉja cá-átiborijere áti ʉjaquẽja.
To bairo rooro mʉja cá-átiborije áti ʉjaquẽnana Jesucristo yere apiʉjacõa aninucuña.
Cʉ̃ yere apiʉjacõa aninucuri Dio cʉ̃ ca-anie cʉtiere bairo mʉja anigarã.
7 To bairo aniri aperãre na mairi na átinemoña.
8 To bairo ca-bairã ani ʉja majirã caroaro mʉja ani ocabʉtigarã.
Jesú cʉ̃ ca-boorijere mʉja áti majigarã.
To bairo mʉja ca-baiquẽpata maca jocarãna,
“Mani Ʉpaʉ Jesucristore ca-apiʉjarã jã ãa,”
mʉja ĩiborã.
9 To bairo caroaro ca-baiquẽna caroaro Dio yere ca-majiquẽna ãma.
Caroorije na cá-átajere Dio na cʉ̃ ca-majirio bojabatajere tʉgooñaquẽnama.
10 Yʉ yarã,
Dio cʉ̃ ca-bejericarã mʉja ãa mʉja quena.
To bairi cʉ̃ yarã aniri caroaro áti ocabʉtiya mʉja quena.
Jesucristo yere seeto tʉgooña ocabʉtiya.
Seeto tʉgooña ocabʉtiri atie mʉjaare yʉ ca-ĩi buiori wamere bairona áticõa aninucuña.
To bairo mʉja cá-áticõa aninucuata cʉ̃ mena macana mʉja anicõa anigarã.
Rooro cá-átinucurã mʉja aniquetigarã.
11 To bairi mani Ʉpaʉ Jesucristo manire ca-netoo catíoricʉ tʉpʉ mʉja ejagarã mʉja quena.
Cariape cʉ̃ yarã mʉja ca-ano maca cʉ̃ mena mʉja anicõa aninucu rotigʉmi.
12 Atie mʉjaare yʉ ca-ĩrije,
meere,
mʉja majirã bairã pʉa.
Atiere majiri caroaro mʉja átinucu Dio yere mʉja ca-apiriquere.
To bairo mʉja cá-átinucurije to ca-anibato quena mʉjaare yʉ buionemonucu,
tiere na majiritiqueticõato ĩi.
13-14 Petoacã rʉja yʉ ca-bai yajiparo jʉgoye.
Mani Ʉpaʉ Jesucristo yucʉacana yʉ ca-bai yajipe yʉre buio majio tʉgawĩ.
To bairi yʉ ca-catíri rʉmʉri ca-ano cõo caroaro mʉjaare yʉ queti buionemogʉ atie,
caroare mʉja cá-áti aninucupere,
caroaro na majiato ĩi.
15 To bairi caroaro atiere yʉ uca,
yʉ ca-bai yajiro beropʉ to bairo quena yʉ ca-ĩi buioriquere na tʉgooña majiato ĩi.
To bairi mʉja majicõa anigarã nairoacã mʉjaare yʉ ca-ĩi buioriquere yua.
Los que vieron la grandeza de Cristo
16 Meere,
mʉjaare jã ca-ĩi buiowʉ mani Ʉpaʉ Jesucristo cʉ̃ ca-tutuarije majuure.
Cʉ̃ ca-tunu atípe quenare mʉjaare jã ca-ĩi buiowʉ.
Mʉjaare buiorã aperã na majuuna na ca-tʉgooñari wame,
meere mʉjaare jã ca-ĩi buiowʉ.
Ĩitorique ca-aniquẽtiere mʉjaare jã ca-queti buiowʉ.
Jã majuuna jã ca-tʉjʉwʉ Jesú caroaro majuu cʉ̃ ca-aniecʉtiere.
Cʉ̃ ca-aji baterije quenare ʉ̃taʉ bui Dio cʉ̃ ca-ejaricʉpʉ jã ca-tʉjʉwʉ.
To bairi caroaro,
cariape majuu mʉjaare jã ca-queti buiowʉ.
17-18 Topʉ mani Pacʉ Dio jã ca-iñoowĩ cʉ̃ Macʉ Jesú caroaro cʉ̃ ca-aniecʉtiere.
Cʉ̃ ca-aji baterije quenare jã ca-iñoowĩ.
“Ani yʉ Macʉ,
yʉ ca-maii majuu ãmi.
Cʉ̃ mena seeto yʉ wariñuu,”
Dio ʉmʉrecóopʉ cʉ̃ ca-ĩiro jã ca-apiwʉ.
Ti paʉ ca-ano ʉ̃taʉpʉ Dio cʉ̃ ca-ani paʉpʉ Jesucristo mena jã ca-ãmʉ.
Nipetirijere jã ca-tʉjʉwʉ.
To bairo caroaro ca-tʉjʉricarã aniri cariape mʉjaare jã ĩi buio.
19 Dio ye quetire ca-buioricarã tirʉmʉpʉ macana na ca-ĩi ucarica wamere,
“Jocarã mee ca-ĩiñupa,”
jã ĩi maji.
To bairi na ye na ca-ucariquere caroaro apiʉjaya mʉja quena.
Apiʉjarã Dio yere caroaro ca-majirã mʉja anigarã mʉja quena.
Aperã maca ati yepa macana Diore ca-majiquẽna ãma.
To bairi cʉ̃ ye quetire ca-jooyupi Dio,
camaja tiere na majiato ĩi.
To bairi tirʉmʉpʉ macana na ca-ucañariquere buenucuri apiʉjanucuña mʉja quena.
20-21 Oco bairi wame caroaro tʉgooña majiña:
Dio ye quetire ca-buioricarã ãnana na majuuna tʉgooñari,
“Dio ye quetire yʉ buiogʉ,”
ca-ĩi majiquẽjupa.
Dio Espíritu Santo maca Dio ye quetire na ca-ucapere na ca-majioñupi.
To bairi jicãʉ mácana Dio ye quetire tirʉmʉpʉ macana na ca-ucariquere mani majuuna ricati wame,
“Oco bairo maca ĩigaro ĩi,”
mani ĩi majiquẽe.