Consejos para los creyentes
5
To bairi mʉjaare,
Jesucristo yere ca-buio jʉgorãre caroaro mʉjaare yʉ queti buiopa.
Yʉ quena Dio yere ca-buio jʉgoʉ yʉ ãa,
mʉjaare bairona.
Cristo popiye majuu cʉ̃ ca-tamuorore ca-tʉjʉricʉ yʉ ãa.
Yʉ quena Jesucristo mena ca-anipaʉ yʉ ãa,
cʉ̃ ca-tunu atípa rʉmʉ ca-anopʉ.
Camaja nipetirã nare cʉ̃ ca-rotiri paʉ ca-anopʉ cʉ̃ mena yʉ anigʉ.
2 Nuuricarã oveja ca-wamecʉnare ca-coterã caroaro na cotema.
Na ca-coterore bairona Diore ca-apiʉjarãre caroaro na jʉgo anicõaña mʉjaare cʉ̃ ca-jʉgo ani rotirãre.
“Dio jãare cʉ̃ ca-booro wariñuurique mena cʉ̃re jã átibojagarã,”
ĩri na jʉgo ãña,
aperã mʉjaare na ca-rotiro jʉgori mee.
“Nare jã jʉgo anigarã,
wapa jeniquẽnana,
to bairona na mairã,”
ĩi tʉgooñari nare jʉgo anicõaña.
3 Apeye unie ca-rotiri majare bairo mʉja majuuna yeri ocabʉti uwiorã na baiqueticõaña Diore ca-apiʉjarãre mʉjaare cʉ̃ ca-jʉgo ani rotirãre.
Caroaro ãnajecʉja.
Na quena caroaro nare mʉja ca-jʉgo aniere tʉjʉrã caroaro aniere cʉtigarãma.
4 To bairi caroaro nare mʉja ca-jʉgo ani majiata mani Ʉpaʉ Jesucristo mʉja mena wariñuugʉmi.
Tunu ati yepapʉ cʉ̃ ca-tunu ejari paʉ wariñuu neto anicõarije,
ca-ani petiquẽtiere joogʉmi mʉjaare.
5 Mʉjaa,
cawamarã mʉja jʉgoye macana cabʉcʉrãre na áti nʉcʉbʉgoya.
Mʉja nipetirã ame nʉcʉbʉgoya.
“Yʉa aperã netoro ca-ãcʉ̃ yʉ ãa,”
ĩi tʉgooñaqueticõaña.
To bairo ca-ĩi tʉgooñarã mʉja ca-ãmata mʉja átinemoquetiboʉmi Dio.
“Cawatoa ca-ãcʉ̃ yʉ ãa,”
ca-ĩi tʉgooñarã macare na átinemomi Dio,
na tʉjʉ wariñuuri.
6 To bairi mʉja majuuna mʉja yeripʉ,
“Aperã netoro ca-majirã jã ãa,”
ĩi tʉgooñaqueticõaña,
Dio jicãʉna ãmi ca-maji majuʉ ĩirã.
“Dio mena cawatoa ca-ãcʉ̃ yʉ ãa,”
ca-ĩi tʉgooñape ãa.
To bairo,
“Cawatoana ca-ãna jã ãa,”
mʉja ca-ĩi tʉgooñaro ʉparãre bairo mʉja cũugʉmi Dio cʉ̃ ca-boori paʉ ca-anopʉ.
7 Nipetirije mʉja ca-tʉgooñarique pairijere Diore cʉ̃ ĩi buioya,
seeto mʉjaare ca-maii cʉ̃ ca-ano maca.
8 Maja catíya.
Tʉgooña majiña mʉjaa,
Sataná caroorije mani cá-áto átiremi ĩirã.
Sataná mʉja wapacʉ ãmi yai ca-ñigo riaʉ cʉ̃ ca-jĩa ʉgapaʉre cʉ̃ ca-macarore bairo ca-baii.
To bairona Sataná camajare cʉ̃ ca-yeri rooye tuuparãre macaʉmi.
9 To bairi Sataná cʉ̃ ca-wadajãrijere api botio ocabʉtiya.
Cristo macare apiʉja nʉcʉbʉgo ocabʉtiya.
Popiye mʉja ca-tamuori paʉ,
“Aperã Jesucristore ca-apiʉjarã ati yepapʉ ca-ãna na quena to bairona tamuoma,”
ĩi tʉgooña majiña.
10 To bairi ati yʉteacã jeto mʉja popiye tamuogarã.
To bairo mʉja ca-tamuori paʉ yeri ocabʉtirique mʉja joogʉmi Dio.
Mʉja átinemogʉmi,
netobʉjaro mʉja ca-nʉcʉbʉgoparore bairo ĩi.
Mani bopaco tʉjʉmi manire.
Cristo mena to canacã rʉmʉ ca-anicõa aninucuparã mʉjaare ca-cũuñupi Dio mʉja quenare.
11 Cʉ̃ ca-roti majirije petiquetigaro.
To bairona to baiato.
Saludos finales
12 Ati pũuroacã mʉjaare yʉ queti joo,
Silvano yʉre cʉ̃ ca-ucanemorije mena.
Yʉ baire bairona cʉ̃ yʉ mai Silvanore.
Cʉ̃ quena Diore caroaro ca-apiʉjaʉ ãmi cʉ̃a.
Yeri ocabʉtiriquere mʉjaare yʉ queti joo,
rooro mʉja ca-tamuoro.
“Ca-jocaquẽtie ãa atie queti Dio manire cʉ̃ ca-tʉjʉ mairije,”
mʉjaare yʉ ĩi.
Atie quetire apiʉja janaquẽja,
mʉja ca-tamuorije to ca-anibato quena.
13 Cristore ca-apiʉjarã Babilonia na ca-ĩri maca macana ñuu rotima.
Mʉjaare bairona Dio cʉ̃ ca-bejericarã ãma na quena.
Marco quena ñuu rotimi.
Yʉ mena macacʉ seeto yʉ ca-maii ãmi cʉ̃a.
14 Caroaro ame boca tʉjʉya ame mairique mena.
Wariñuurique mʉjaare cʉ̃ joato Dio,
Cristore ca-apiʉjarãre.
To cõona ãa.