Sirviendo según la capacidad que Dios nos ha dado
4
1-2 To bairi mʉja ca-tamuoata Jesucristo cʉ̃ ca-ãnajere tʉgooñaña.
“Cʉ̃ na ca-popiyeyeorique to ca-anibato quena caroorije cá-átiquẽjupi,”
ĩi tʉgooñaña.
“Cʉ̃ Pacʉ mena netoro ca-tʉgooña ocabʉtiyupi,”
ĩi tʉgooñaña.
To bairo ĩi tʉgooñarã to bairona mʉja quena Dio mena netobʉjaro mʉja tʉgooña ocabʉtigarã.
Noa tamuobana quena to bairo ca-tʉgooñarã Dio cʉ̃ ca-boorijere ána áama.
Caroorije macare átigaquẽema.
Ati yepa ãnaa caroorije camaja na cá-áti aninucurijere átigaquẽema.
3 Diore apiʉjagarã jʉgoye caroorije mʉja cá-áti majuucõañupa.
Diore ca-majiquẽna na cá-áticõa aninucuri wamere bairona mʉja cá-áti aninucubajupa,
caroorijere na cá-áti wariñuugari wamere bairona.
Rooro cá-áti eperã mʉja ca-anibajupa.
Noo eti cumuri,
boje rʉmʉri áti eti cumu mecʉrã,
Dio cʉ̃ ca-booquẽtiere weericarãre baje jeni nʉcʉbʉgorã mʉja cá-áti anibajupa,
Diore apiʉjagarã jʉgoye.
4 To bairi,
“¿Nope ĩirã na cá-áti jʉgorica wamere na átigaquẽetí yucʉra?”
mʉja ĩima aperã maca mʉja ca-bai aniere tʉjʉrã.
To bairi rooro majuu mʉja ĩima.
5 Dio maca na tʉjʉ bejeri na popiyeyegʉmi.
Camaja nipetirãre na tʉjʉ bejegʉmi.
Yucʉ ca-catírã,
ca-riaricarã quenare na tʉjʉ bejegʉmi.
Na tʉjʉ bejeri to bairona rooro mʉjaare ca-ĩirãre na popiyeyegʉmi Dio.
6 Mani jʉgoye macana,
meere,
ca-bai yajiricarã Dio ye quetire ca-apiyuparã.
Tie quetire apirã jicãarã ca-apiʉjayuparã.
Ca-apiʉjaricarã na ca-ano na yeri ca-yajiquẽjupe.
Yucʉra Dio mena ãma naa.
7 Yoaro mee ati ʉmʉrecóo petigaro.
To bairi caroaro tʉgooña majiña.
Maja catíya,
Diore ca-jeni nʉcʉbʉgocõana anigarã.
8 Ame maicõa aninucuña.
Ape wame netoro ca-ani majuuri wame ãa ame mairique.
Caroaro mʉja ca-ame maiata aperã caroorijere mʉjaare na cá-átiere mʉja majiriogarã.
9 Caroaro ame boca tʉjʉ nʉcʉbʉgoya.
Cá-aáteñarã quenare na boca tʉjʉ nʉcʉbʉgoya.
Yajioropʉ na ĩi wada ʉjaquẽnana.
10 Mani Pacʉ Dio to canacãʉpʉrena ricati majiriquere mani joomi di wame mani cá-átipa wamerire.
Cʉ̃ ya poa macana mani ca-ame átinemoparore bairo mani joomi.
To bairi caroaro ame átinemogarã mʉja nipetirije Dio cʉ̃ cá-áti majiori wame cõona caroaro áti aninucuña.
11 To bairi jicãʉ Dio ye quetire ca-buioʉ ucʉ̃,
“Dio maca yʉ majiomi yʉ ca-ĩi buiopere,”
cʉ̃ ĩi tʉgooñaato.
Apeĩ maca aperãre cá-átibojaʉ ucʉ̃,
“Dio ati wamere aperãre na yʉ cá-átibojaro áami,”
ĩri cʉ̃ átibojaato.
To bairo bairã,
ricatiri macajere mʉja ca-ame átibojari wame cõo Dio mʉjaare cʉ̃ cá-áti majiorije jʉgori mʉja ame átinemogarã.
To bairo ána netobʉjaro Diore mʉja nʉcʉbʉgogarã.
Camaja nipetirã cʉ̃re na nʉcʉbʉgoato,
to canacã rʉmʉ ca-rotii cʉ̃ ca-ano maca.
Amén.
Sufriendo como cristianos
12 Yʉ yarã,
yʉ ca-mairã,
mʉja ca-tamuoata,
“Cristore ca-apiʉjaʉ yʉ ca-anibato quena ¿dope ĩiro yʉre to bairo to baití?”
ĩi tʉgooña acʉaquẽja.
To bairona mʉja ca-tamuopere rotimi Dio,
¿jocarã mee yʉre ca-apiʉjarãna na ãtí?
mʉja ĩi tʉjʉ majigʉ.
13 Oco bairo maca ĩi tʉgooña wariñuuña:
“Cristo ca-tamuoñupi.
To bairi yʉ quena yʉ tʉgooñarique paiquetigʉ tamuobacʉ quena.”
To bairo ca-ĩricarã Cristo cʉ̃ ca-tunu atí paʉpʉre,
camaja nipetirã cʉ̃re cá-áti nʉcʉbʉgori paʉpʉ seeto mʉja wariñuugarã yua.
14 To bairi Cristore ca-apiʉjarã mʉja ca-ano maca aperã mʉja tutigarãma.
To bairo mʉjaare na ca-ĩi tutirije to ca-anibato quena mʉja wariñuugarã,
Dio Espíritu Santore ca-cʉgorã aniri.
Espíritu Santo maca ca-tutuaʉ majuu aniri mʉjaare átinemogʉmi.
15 Aperã maca ãma camajare ca-jĩarã,
aperã yere ca-jee rutirã,
to canacã wame caroorije cá-ána,
aperãre ca-patowãcoorã ãma.
To bairo ca-bairã na majuuna na ca-bai buicʉtie wapa na ʉparã maca na popiyeyegarãma.
To bairi mʉja maca to bairo ca-bairã aniqueticõaña mʉjaa.
Mʉja quena nare bairo aperãre rooro mʉja cá-ápata mʉja quenare mʉja popiyeyegarãma ʉparã.
16 Nii mʉja yaʉ ucʉ̃ Cristore ca-apiʉjaʉ cʉ̃ ca-anie jʉgori aperã cʉ̃re na ca-popiyeyeata,
cʉ̃ bobo tʉgooñaqueticõato.
Oco bairo maca Diore cʉ̃ ĩato:
“Caroaro yʉre mʉ átibojayupa.
Cristore ca-apiʉjaʉ yʉre mʉ ca-cũuñupa,”
Diore cʉ̃ ĩato.
17-19 To bairi Dio mʉjaare cʉ̃ ca-popiye cʉti rotiro caroare áti janaquẽja.
“Cariape Dio yʉre coteri wariñuurique yʉ joogʉmi,”
ĩi tʉgooñaña,
nipetirije “To bairo yʉ átigʉ” cʉ̃ ca-ĩrije cõo cá-ácʉ cʉ̃ ca-ano maca.
Yucʉacana cʉ̃re ca-apiʉjarãre mani cá-átajere tʉjʉ cõoñagʉmi Dio.
To bairi manire,
cʉ̃ ca-apiʉjarãre tʉjʉ cõoñaʉ ¿dope bairo cʉ̃ ácʉati cʉ̃ ye quetire ca-apiʉjaquẽna macare?
Dio cʉ̃re ca-apiʉjarãre pairo na ca-popiye tamuorijere na netooboja majimi Dio.
Caroorã macare,
cʉ̃re ca-apiʉjaquena,
caroorãre dope bairo na ca-popiye tamuopere na netoobojaquetigʉmi.