PRIMERA CARTA DEL APÓSTOL
SAN PEDRO
Pedro escribe a los creyentes esparcidos
1
1-2 Yʉa Pedro mʉjaare yʉ queti uca joo.
Jesucristo cʉ̃ ca-buericʉ,
cʉ̃ ye quetire cʉ̃ ca-buio rotiricʉ yʉ ãa.
Ati pũuro mʉjaare yʉ queti joo aperoripʉ cá-aá baterãre.
Ponto,
Galacia,
Capadosia,
Bitinia na ca-ĩri yeparipʉ ca-ãnare mʉjaare yʉ queti uca joo mani Pacʉ Dio yarã cʉ̃ ca-bejericarãre.
Nemoopʉna mʉjaare ca-bejeyupi mani Pacʉ Dio,
Jesucristore ca-apiʉjarã mʉja ca-anipere.
Cʉ̃re mʉja ca-apiʉjaro mʉja ca-ano ca-wajoayupi mʉjaare.
To bairi Dio Espíritu Santo caroarã mʉja ca-ano áami,
Jesucristo cʉ̃ ca-rií ree yajibojarique jʉgori.
Caroaro mʉjaare yʉ ñuu roti.
Caroaro ani wariñuuriquere cʉ̃ joato Dio mʉjaare.
Alabanza a Dios
3 “Caroaro jãare mʉ cá-átibojayupa,”
jã ĩinucu mani Ʉpaʉ Jesucristo Pacʉ Diore.
Mani bopaco tʉjʉri cʉ̃ punaa ca-ãnare manire ca-cũuñupi.
Jesucristo cʉ̃ ca-bai yajiro bero cʉ̃ ca-tunu catíoyupi Dio Jesúre.
To bairi mani tunu catíogʉmi Dio.
4 Dio mʉja quenare mʉjaare joogʉmi mʉja ca-cʉgo ʉjapere ʉmʉrecóopʉ cʉ̃ ca-quenoo cũubojariquere.
Ati yepa macaje ca-boarije,
ca-petirije uniere bairo aniquẽe.
Mʉjaare cʉ̃ ca-cũubojarique maca ca-petirije unie mee ãa mʉja ca-ani wariñuupe maca.
5 Diore mʉja ca-nʉcʉbʉgorije jʉgori,
mʉjaare cotemi cʉ̃ cá-áti maji tutuarije mena.
Cabero cʉ̃ ca-tunu atí paʉ ca-anopʉ cʉ̃ ca-cotericarãre mʉja joogʉmi caroa majuure.
6 Ti wamere tʉgooñarã caroaro ca-yeri wariñuurã mʉja ãa,
yucʉre popiye ca-tamuorã anibana quena.
7 Jesucristore nʉcʉbʉgorique oro bejeriquere bairo ãa.
Camaja ¿orona to ãtí?
ĩirã peeropʉ roarãma.
Ca-jibiro caroorijere boo reema caroa oro jeto to tuato ĩirã.
Tiere bairona manire bairo ¿Jesucristore cariapena na nʉcʉbʉgotí?
ĩiro.
Rooro tamʉorã oro majuu ca-aniquẽtiere boo reericarore bairo caroorijere mani áti janarã.
To bairi Jesucristore mani ca-nʉcʉbʉgo janaquẽto tʉjʉ,
cariape yʉre nʉcʉbʉgoma,
ĩi tʉjʉgʉmi Dio.
Oro ca-wapa pacarije ãa.
Wapacʉtibato quena peticoapa.
Mani Jesucristore mani ca-nʉcʉbʉgorije oro netoro wapacʉti.
Jesucristore mani ca-nʉcʉbʉgorique maca petiquetigaro.
To bairi Jesucristo ati yepapʉre tunu ejaʉ,
“Caroaro yʉre mʉja ca-nʉcʉbʉgowʉ,”
ĩigʉmi.
8 Jesucristore ca-tʉjʉñaquetana anibana quena cʉ̃re mʉja mai.
Yucʉ quenare cʉ̃re apiʉjari,
cʉ̃ tʉjʉquetibana quena seeto majuu wariñuurique mena mʉja ãa.
Cʉ̃ mena mʉja ca-wariñuurije maca dope bairo ĩi buio majiña maa.
9 To bairi Jesucristore caroaro ca-apiʉjarã mʉja ca-ano mʉja yeri cʉ̃ tʉpʉ ca-anicõa aninucupere mʉja ca-jooyupi Dio,
caroorã ya paʉpʉ cá-aáboricarãre.
10 Tirʉmʉpʉ Dio ye queti buiori maja ãnana oco bairo ca-ĩi buio jʉgoyeye ucayupa:
“Dio camajare bopaco tʉjʉri cʉ̃re ca-apiʉjarã rooro na cá-átajere majirio,
nare netoogʉmi,”
ca-ĩi ucayupa.
Tiere buiobana quena na majuu na ca-buiorijere ca-api majiquẽjuparã.
To bairi tiere majigarã seeto bue,
ca-tʉgooñañuparã.
11 To bairi Espíritu Santo Dio ye queti buiori maja ananare na ca-majioñupi Jesucristo ati yepapʉ rooro popiye cʉ̃ ca-tamuopere.
Cʉ̃re na ca-jĩaro bero,
tunu catí,
cʉ̃ pacʉ Dio mena Ʉpaʉ ani,
camaja cʉ̃re na cá-áti nʉcʉbʉgopere nare ca-majioñupi Espíritu Santo.
To bairi Dio ye quetire buiobojari maja ãnana caroaro bue,
“¿Nii cʉ̃ ãcʉati Dio cʉ̃ ca-bejepaʉ majuu?
¿Noo cõopʉ to bairoatí atie Dio Espíritu manire cʉ̃ ca-majiorije?”
ca-ĩi tʉgooñañuparã.
12 To bairi,
“Mʉja ca-bai yajiro beropʉ baigaro,”
na ca-ĩi majioñupi Dio Espíritu Santo na ãnanare.
To bairi mani na bero macana mani ca-ani yʉtea ca-anopʉ ca-baiwʉ na ãnana na ca-ĩi buio ucarica wame yua.
To bairi na ca-buioriquere ati yʉteapʉ ca-bairiquere Jesú ye quetire mʉjaare ca-ĩi buioyupa aperã yua.
Espíritu Santona ʉmʉrecoopʉ cá-atácʉ nare cʉ̃ ca-buio majioro ocabʉtirique mena ca-buioyupa.
To bairi cariape tie quetire mʉja ca-apiyupa.
Ti wamere Dio camajare cʉ̃ ca-bopaco tʉjʉrijere tʉgooñanucurãma Dio tʉ macana ángel maja na quena.
Dio nos llama a una vida santa
13 To bairi mʉja cá-átipere caroaro majuu tʉgooña majiña.
Maja catí tʉgooñaña.
Dio noo cõo camajare bopaco tʉjʉri caroare manire joogʉmi Jesucristo cʉ̃ ca-tunu ejari rʉmʉ ca-anopʉ.
To bairi tiere caroaro tʉgooñacõa aninucuña.
14 Dio punaa aniri mʉja Pacʉ Diore caroaro ca-apiʉjarã ãña.
Ca-jʉgoyepʉ mani pacʉ Diore majiquena mʉja ca-boorore bairo caroorijere mʉja cá-átinucuricarore bairo átinemoqueticõaña.
15 Caroa macare ája.
Dio manire ca-bejericʉ caroorije mácʉ ãmi.
To bairi mani quena caroorije mána ca-aniparã mani ãa.
16 Dio Wadariquepʉ oco bairo ĩi ucarique ãa:
“Ca-ñuʉ,
caroorije mácʉ yʉ ãa.
To bairi mʉja quena caroorije mána anicõaña,”
17 Diore,
“Jã Pacʉ,”
cʉ̃re mani ĩi,
cʉ̃ jenirã.
Dio ape rʉmʉpʉ camaja nipetirã na cá-átajere jeniña bejegʉmi.
Nipetirãre jicãro cõo mani cá-átaje cõore bejegʉmi.
Cʉ̃re ca-apiʉjaquetanare na popiyeyegʉmi.
To bairi yucʉre mani Pacʉ Diore nʉcʉbʉgori caroare ája ati yepa ãnapʉ.
18 Mʉja ñicʉ jãa na ca-ãnaje cʉtiere bairo mʉja ca-aninucubajupa.
To bairo rooro mʉja ca-ãnajere mʉja ca-netoobojayupi Dio.
Caroaro mʉja majirã pairo manire cʉ̃ ca-wapayebojariquere.
Apeye unie ca-petirije,
niyeru oro unie mena manire ca-wapayebojaquẽjupi Dio.
19 Pairo ca-wapacʉti netorije mena maca ca-wapayebojayupi manire.
Cristo manire cʉ̃ ca-rií ree yajibojarique mena maca ca-wapayebojayupi.
Judío maja Diore áti nʉcʉbʉgorã waibʉcʉrã,
caroarã jeto na ca-jĩa joe buje mʉgonucurique ca-añupa.
To bairi waibʉcʉ na ca-jĩa joe buje mʉgoricarore bairona Dio cʉ̃ macʉ Jesucristore caroorije mácʉre,
caroorije mani cá-átaje wapa manire cʉ̃ ca-bai yajibojaro cá-ájupi Dio.
20 Nemoopʉre ati yepare átigʉ jʉgoyepʉna Cristo manire cʉ̃ ca-bai yajibojapere ca-maji jʉgo tʉgayupi Dio.
To bairi ati yʉteapʉre ca-ejayupi Cristo,
manire bai yajibojaʉ acʉ́.
21 Manire cʉ̃ ca-bai yajibojaro bero cʉ̃ ca-tunu catíoyupi Dio.
Cʉ̃ tunu catío,
cʉ̃ ca-ne aájupi cʉ̃ tʉpʉ,
camaja Jesúre na ca-nʉcʉbʉgoparore bairo ĩi.
To bairi Cristo manire cʉ̃ ca-bai yajibojaro maca Diore mʉja apiʉja nʉcʉbʉgo mʉja quena.
Cʉ̃ nʉcʉbʉgori mʉja quena Dio mena mʉja ca-anicõa aninucupere mʉja tʉgooña wariñuu.
22 Cariape macaje quetire mʉja ca-api nʉcʉbʉgoyupa.
Apiʉja nʉcʉbʉgorã,
mʉja yeripʉ rooro átajere mʉja ca-janañupa.
To bairi cʉ̃re ca-apiʉjarã jicʉ̃ punaare bairo mʉja ame mai.
To bairi seeto mʉja yeri mena ame maiña.
23 Mani pacʉa punaa buiarãpʉ ca-bai yajiparã mani ãa.
Yucʉra Dio ca-anicõa ãcʉ̃ cʉ̃ ye quetire ca-petiquẽtie jʉgori cʉ̃ punaa maca mani ãa.
To bairona cʉ̃ punaa,
cʉ̃ mena ca-anicõa aninucuparãre manire ca-cũuñupi Dio,
cʉ̃ ye quetire mani ca-apiʉjaro.
24 Oco bairo ĩi ucarique ãa:
“Taa yoaro mee jinicõapa.a
Ca-oarije quena caroa anibato quena yoaro mee jini.
Taa yoaro mee ca-jinirijere bairona mani camaja quena mani bai yajigarã.
25 Dio Wadarique maca petiquetigaro.
To canacã rʉmʉ anicõa aninucugaro.
Ti wamerena Dio Wadarique caroa quetire ca-buioyupa aperã mʉja quenare.”