Advertencia a los ricos
5
Ca-apeye unie pairã yʉ apiya mʉjaa.
Mʉja ca-popiye tamuopere tʉgooñarique pai otiya.
2 Apeye unie pairo majuu caroa to ca-anibato quena yajigaro.
Mʉja jutii quena caroa majuu to ca-anibato quena caroorãacã ʉga reegarãma.
3 Mʉja ye ca-wapa pacarije ca-ajiyari cuiri niyeru cuiri mʉja majuuna mʉja ca-cũbatie ʉtabutigaro.
To bairi tie to bairo ca-bairijere tʉjʉri,
“Caroaro aperãre na mʉja cá-átinemoquẽjupa,”
mʉja ĩi tʉjʉgʉmi Dio.
To bairi tie mena caroaro camajare na mʉja cá-átinemoquetaje wapa mʉja popiyeyegʉmi Dio.
To bairona mʉja popiyeyegʉmi Dio camaja caroorije na cá-átaje wapa nare cʉ̃ ca-popiyeyeri rʉmʉ ca-anopʉre.
Ati rʉmʉri pairo apeye uniere ca-cũurã mʉja anibana quena caberopʉ popiye tamuorique mʉjaare anigaro.
4 Mʉja wejeri paabojari majare caroaro na mʉja ca-wapayequẽjupa.
Na mʉja ca-wapayequẽtiere tʉjʉ majimi mani Ʉpaʉ Dio.
To bairi caroaro na mʉja ca-wapayequẽnare na tʉjʉmi Dio na ca-tʉgooñarique pairijere.
5 Nuuricʉ wecʉre cʉ̃ nuuma camaja,
caroaʉ cʉ̃ ca-riicʉtopʉ cʉ̃ mani jĩa ʉgagarã ĩirã.
To bairi cʉ̃ na ca-nuuro caroaro ʉga wariñuumi wecʉ,
“Cabero yʉ jĩa ʉgagarãma,”
ĩi tʉgooñaquẽcʉna.
Cʉ̃re bairona mʉja bai,
yucʉacã ati yepapʉ ãnaa.
Mʉja majuuna mʉja ca-boorijere mʉja áti wariñuunucu,
caberopʉ Dio mʉjaare cʉ̃ ca-popiyeyepere tʉgooñaquẽnana.
6 Aperãre caroaro cá-ánare presopʉ na mʉja ca-jooyupa.
Na joo,
ñee caroorije wapa meena nare aperãre mʉja ca-jĩa rotiyupa.
Dope bairo mʉjaare ca-boca áti majiquẽjupa.
To bairi mʉja macare mʉja popiyeyegʉmi Dio yua.
La paciencia y la oración
7 Yʉ yarã,
mani Ʉpaʉ Jesú cʉ̃ ca-tunu atípere caroaro tʉgooña yuuya.
Mʉja weje macaje ʉgariquere oterã mʉja tʉgooña patowãcaquẽe tie mʉja ca-ʉgapere.
Mʉja ca-oterique ca-ocaro bero bʉti,
ca-yoaro beropʉ ca-rica cʉtopʉ mʉja ca-ʉgapere mʉja tʉgooña yuu maji.
8 To bairona mani Ʉpaʉ Jesú cʉ̃ ca-tunu atípere tʉgooña yuuya.
Petoacã rʉja cʉ̃ ca-tunu atíparo jʉgoye.
To bairi yeri ocabʉtiya.
Jesúre cʉ̃ tʉgooña janaquẽja.
9 Aperãre,
“Rooro mʉja áa,”
na ĩi tʉjʉ muiquẽja.
To bairo ca-ĩi tʉjʉ muirã mʉja ca-ãmata mani Ʉpaʉ Jesú cʉ̃ ca-tunu ejari paʉpʉ,
“Rooro mʉja cá-ápʉ́,”
mʉja ĩigʉmi mʉjaare tunu.
Petoacã rʉja cʉ̃ ca-tunu atíparo jʉgoye.
10 Dio ye quetire ca-buiori maja tirʉmʉpʉ macana na ca-bairiquere tʉgooñaña.
Aperã maca Dio ye quetire na ca-buiorijere apigateerã na ca-popiyeyeyuparã.
Nare na ca-popiyeyerije to ca-anibato quena ca-tʉgooñarique paiquẽjuparã.
To bairona ca-tʉgooñarique paiquetipe ãa mani quenare.
11 “Diore ca-apiʉja janaquẽna popiye nare to ca-anibato quena wariñuurã áama,”
mani ĩi maji.
Job tirʉmʉpʉ macacʉ cʉ̃ ca-popiye tamuoriquere mani maji.
Tamuobacʉ quena yeri ocabʉtiri Diore ca-apiʉja janaquẽjupʉ Job.
To bairo cʉ̃ ca-tamuoro bero Dio caroaro wariñuuriquere cʉ̃ ca-jooyupʉ.
To bairona mani quenare mani ca-tamuoro mani mai tʉjʉʉmi Dio.
Mani mai tʉjʉri,
caroaro mani átinemogʉmi Dio yua.
12 Yʉ yarã,
ape wame,
meere mʉjaare yʉ ca-ĩi buiorique netoro oco bairi wame cá-átipe ãa:
Cariape macaje,
ĩi jocaquetaje jetore ĩiña mʉjaa,
“Dio mena jã ĩi,”
ĩiquẽnana.
Ĩitori mee,
“Jã átigarã,”
ĩirã to bairona ája.
Ape wame cá-átiquetana ãnaa cariape,
“Jã átiquẽpʉ,”
ĩiña.
Cariape jeto ca-ĩiparã mani ãa.
Jocarãna ca-ĩirã mani ca-ãmata mani popiyeyegʉmi Dio.
13 Mʉja ca-popiye tamuoata Diore cʉ̃ jeni nʉcʉbʉgoya mʉja ca-popiye tamuorijere.
Mʉja mena macana ca-wariñuurã Diore cʉ̃ na ĩi wariñuu bajaato.
14 Jicãʉ ucʉ̃ mʉja mena macacʉ cʉ̃ ca-riaata Jesúre ca-apiʉjarãre ca-jʉgo ánare na cʉ̃ piato.
Na cʉ̃ ca-piiro na maca ca-riaʉ tʉpʉ atí,
Diore cʉ̃ na jenibojaato.
Cʉ̃pʉre ʉje wareri,
“Jã Ʉpaʉ Jesú,
mʉ yaʉ cʉ̃ ca-ano maca cʉ̃ mʉ catíowa,”
Diore cʉ̃ na ĩi jenibojaato.
15 “Cʉ̃ átinemogʉmi Dio,”
Diore cʉ̃ ĩi tʉgooña nʉcʉbʉgori cʉ̃ na ca-ĩi jenibojaro ñuugʉmi ca-riaʉ na mena macacʉ.
Cʉ̃ catíogʉmi Dio.
Ca-riabatacʉ caroorije cʉ̃ cá-átaje to ca-ãmata tiere cʉ̃ majiriobojagʉmi Dio.
16 To bairi caroorije ána mʉja mena macana Jesúre ca-apiʉjarãre ame buioya.
To bairi Diore ame ĩi jenibojaya.
To bairo mʉja ca-ame ĩibojaro cʉ̃ mʉja ca-jenirijere mʉja apigʉmi Dio.
Apiri,
mʉja netoogʉmi mʉja ca-riaye cʉtiere.
Capee caroare átibojagʉmi Dio ca-ñuʉ cʉ̃re ca-apiʉjaʉ cʉ̃ ca-jeniro.
17 Elías ca-wamecʉcʉ Dio ye quetire buiori majocʉ ca-añupʉ.
Diore cʉ̃ ca-jeniriquere tʉgooñaña.
Manire bairona ca-baii camajocʉ ca-añupʉ.
Manire bairona ca-baii anibacʉ quena,
“To ocaqueticõato,”
Diore seeto cʉ̃ ca-ĩi jeniñupʉ.
To bairo Diore cʉ̃ ca-ĩi jeniro ati yepapʉ ca-ocaquẽjupe itia cʉma,
ape cʉma recomaca.
18 Cabero Diore cʉ̃ ca-jeniro ca-ocayupe tunu.
Ca-ocaro bero na ca-oterije ca-putiyupe tunu.
19-20 Yʉ yarã,
ati wame majiña mʉjaa:
Jicãʉri una mʉja mena macana Dio Wadariquere ca-apiʉjaricarã anibana quena Jesúre na ca-majiritiata tʉgooña ocabʉtiriquere nare ca-joope ãa.
To bairo Jesúre tʉgooña ocabʉtiriquere na mʉja ca-jooro pairo na caroorije to ca-anibato quena tiere na majiriobojagʉmi Dio.
To bairi na yeri ca-yajiboriquere netogarãma yua.
To cõona ãa.