Los que enseñan mentiras
2
Tirʉmʉpʉ cariape Dio ye quetire ca-buioricarã na ca-anibato quena aperã ca-ĩito pairã ca-añuparã,
“Dio ye quetire ca-buiorã jã ãa,”
camajare ca-ĩitorã.
Tirʉmʉpʉ na ca-ãnatore bairona ca-ĩitorã anigarãma yucʉ quenare mʉja watoapʉ.
Cariape macaje ca-buiorãre bairo ca-ĩitorije macare buiotogarãma.
“Ca-ĩito pairã ãma.
Cariape me ãa na ya wame,”
mʉja ca-ĩi majiquẽtona ĩitorica wame mʉjaare buiogarãma.
To bairo buiotorã cariape macaje Jesú ye quetire camaja na ca-tʉgooña mawijiaro átigarãma.
Mani Ʉpaʉ Jesú caroorije na cá-átiere cʉ̃ ca-wapayebojariquere booquẽema.
To bairi na majuuna na ca-bai botiorije wapa yoaro mee na reecõagʉmi Dio.
2 To bairo ca-buiotorã rooro na cá-áti aniere penigarãma camaja capaarã,
nare bairo áti ʉjagarã.
Rooro na cá-áti aniere tʉjʉrã aperã quena Cristo ye quetire ĩi epegarãma.
3 To bairi mʉjaare ca-ĩi buiotorã mʉja ye jeegarãma,
seeto apeye uniere ʉgoobana.
Ca-jʉgoyepʉna tirʉmʉpʉ caroorije na cá-átipe majicõaricʉmi Dio,
meere.
To bairi na popiyeyegʉmi Dio.
Na ca-aniparo jʉgoyepʉna,
“To bairo ca-ãnare seeto na yʉ popiyeyegʉ,”
ca-ĩi buio jʉgoyeyeyupi Dio,
meere.
4 Tirʉmʉpʉre Dio tʉ macana ángel maja cʉ̃re ca-bai botiorã quenare caroorã ya paʉpʉ ca-naitĩaropʉ na ca-reeyupʉ Dio.
Topʉna nare ca-bia cũucõañupʉ.
Caberopʉ cʉ̃re na ca-bai botiorique wapa na popiyeye majuucõagʉmi Dio.
5 Tirʉmʉpʉ quenare ati yepa ruʉ cʉ̃re ca-apiʉjaquẽnare na ca-reeyupʉ Dio.
To bairo ruubacʉ quena Noére cʉ̃ ca-netoo catíoyupʉ.
Noé camajare na ca-ĩi buionucubajupʉ.
“Caroorijere áti janaña,
caroa macare ája,”
nare ca-ĩibajupʉ.
Cʉ̃ ca-buiorijere ca-apigaquẽjuparã.
To bairo na ca-apiʉjagaquẽto tʉjʉʉ Noé jetore cʉ̃ ca-netoo catíoyupʉ Dio yua.
To bairi Noé jetore,
cʉ̃ nʉmo mena,
cʉ̃ punaa itiarã,
na nʉmoa menare na ca-netoo catíoyupʉ Dio ocho majuure.
6 To bairona Sodoma,
Gomora ca-wamecʉti macari macanare,
“Ñuuquẽema,”
ĩri na ca-joe ree peticõañupʉ Dio.
Na reeri,
“To bairona na átigʉmi Dio caroorã nipetirã na bero macana quenare,
camaja na ĩi tʉgooña majiato,”
ca-ĩiñupʉ Dio,
Sodoma,
Gomora macanare na rei.
7-8 Na reebacʉ quena jicãʉ ca-ñuʉre Lote ca-wamecʉcʉre cʉ̃ ca-buti rotiyupʉ Dio,
cʉ̃ catíato ĩi.
Lote maca caroorã tʉpʉ to bairona anicõari caroorije na cá-áti epenucurije tʉjʉ quepe,
Dio cʉ̃ ca-booquẽtiere na cá-áti netoro tʉjʉbacʉ to canacã rʉmʉ ca-tʉgooñarique painucuñupʉ.
9 To bairona caroare ca-boorãre popiye na ca-tamuoro na netoo majimi Dio.
Caroorã macare na popiyeyegʉmi camajare na cʉ̃ ca-bejeri paʉ ca-anopʉ.
10 Na majuuna na ca-boori wamere caroorije na cá-áti eperije cá-átinucurã quenare,
ʉparãre ca-bai botiorã quenare seeto na popiyeyegʉmi Dio.
Naa,
“Jã majuuna jã cá-átigari wame jã átigarã,”
ĩirã,
Dio cʉ̃ ca-cũricarã camajare ca-rotirãre na ĩi epe botioma,
na nʉcʉbʉgoquetiri.
11 Rooro na ca-bairijere Diopʉre wada paiquẽema Dio tʉ macana ángel maja maca.
Ángel maja to bairona ca-ĩitorã netoro ca-roti majirã anibana quena,
Diore,
“Rooro ca-ĩitorã na cá-átie wapa,
na popiyeyeya,”
ĩi punijiniquẽema ángel maja.
12 Ca-ĩitorijere ca-buio teñarã maca waibʉcʉrãre bairo ca-tʉgooñarique mana ãma naa.
Dio yere ca-majiquẽna anibana quena,
“Jãa jã maji majuucõa,
mʉjaa mʉja majiquẽe,”
ĩi epenucuma Dio ye quetire ca-apiʉja majuurã macare.
To bairi waibʉcʉrãre camaja nare na ca-jĩarore bairona na reegʉmi Dio ca-ĩitorã quenare.
13 Na popiyeyegʉmi Dio,
aperãre rooro na cá-átie wapa.
Oco bairo áama ĩitoriquere ca-buio teñarã:
Ñamipʉre rooro átiri,
ʉmʉreco quenare paaquetiri rooro na cá-átigarije áti wariñuuma.
Ca-ñuuquẽna majuu ãma.
Mʉja ca-neñapo boje ʉgaro Diore ca-apiʉjarãre bairona baitori mʉja mena neñapo ʉganucuma na quena.
To bairi na bapa cʉtiqueticõaña,
nare bairo rooro mani baire ĩirã.
14 Cãromiare na tʉjʉcõari,
caroorije na átigama,
caroorije áti janagaquetiri.
Caroare cá-áti ocabʉtiquẽnare na wadajãnucuma,
na quena caroorije na áparo ĩirã.
Apeye uniere boo neto majuucõama.
To bairi aperã yere seeto jee majima ĩitorique mena.
To bairo rooro majuu na cá-átinucurije wapa na popiyeyegʉmi Dio.
15 Cariape macaje Dio yere apigaquetibana apeye jeto tʉgooñanucuma.
To bairo tʉgooñari Balaam,
tirʉmʉpʉ macacʉ Beor macʉ cʉ̃ cá-átatore bairona áama.
Balaam caroori wame cá-átigabajupʉ,
niyeru wapatagʉ.
To bairi burra bui ca-peja aájupʉ,
caroori wame átii aácʉ.
16 To bairo cʉ̃ cá-áto tʉjʉri burra cʉ̃ yao cʉ̃re ca-umaona cʉ̃ ca-ĩi tutiyupo.
Burra ca-wada majiquẽco anibaco quena ca-wadayupo Balaam're Dio cʉ̃ ca-wada rotiro.
To bairi burra camajocʉre bairona,
“Átiqueticõaña,”
Balaam're cʉ̃ cõ ca-ĩiro apiri dope bairo caroori wame cʉ̃ cá-átiboriquere cá-áti majiquẽjupʉ yua.
17 To bairi,
“Ca-ĩitorã ãnama,”
na ĩi majiquẽema camaja yucʉ quenare.
“Na mena macana jã anigarã,
wariñuugarã,”
camaja na ca-ĩrije to ca-anibato quena wariñuuquetigarãma nare na ca-apiʉjaata.
Caroorã ya paʉpʉ ca-naitĩaro majuupʉ Dio cʉ̃ ca-reeparã ãma,
meere.
18 Ca-ĩito pairã ca-ĩiña maniere ĩinucuma,
“Caroaro ca-majirã jã ãa,”
ca-ĩirã anibana quena.
Na majuuna rooro na cá-átigarijere áti rotima aperã quenare.
“To bairo ána mʉja ani wariñuugarã,”
ĩitonucuma.
To bairo na ca-ĩrijere apirã noa caroorije cá-áti ʉjagarã na ca-wadarijere apima.
Jicãarã Jesú ye quetire cawama apirã quena na apima ca-ĩitorãre.
Ca-ĩitorã macare apiʉjari caroorije áti anicõama tunu.
Ca-ñuuquẽtiere na ca-janabatajere áticõa aninucugama tunu,
na apibana.
19 Ape wame oco bairo ĩinucuma ca-ĩitorã:
“Jãare bairo ána mʉja quena mʉja majuuna mʉja ca-booro mʉja áti majigarã,”
ĩitonucuma,
jocarãna.
“Noo jã ca-boori wame jã áti maji,”
ca-ĩirã anibana quena caroorije jeto áti majima.
Caroare áti majiquẽema.
To bairona ca-ãna caroorije jeto cá-áti jana majiquẽna to bairona cá-ána anicõagarãma.
20 Jicãarã mani Ʉpaʉ Jesucristo,
manire ca-netoo catíoʉ cʉ̃ ca-aniere majiri,
ati yepa macana caroorije na cá-átinucurijere bairo cá-áti janarã ãma bairã pʉa.
To bairo ca-bairã cabero tunu caroorije na cá-áti ʉjanemoata ca-jʉgoyepʉna na ca-ãnato netobʉjaro rooro majuu ani ʉjagarãma.
21 Dio yere ca-majiricarã anibana quena cabero na majuuna majiriticoapa yua.
Majiriticõari,
to bairona bai botionucuma tunu.
Caroa wamere Dio cʉ̃ ca-rotirique ca-majiricarã anibana quena apiʉjaquetinucuma.
Nemoona na ca-majiquẽpata ñuuboricaro.
Yucʉra netoro na popiyeyegʉmi Dio na ca-apiʉjaquẽtie wapa.
22 Roorije átinemogama tunu.
To bairo átinemobana camaja na ca-buionucuri wamere bairona bainucuma.
Oco bairi wame ĩima camaja:
“Yai cʉ̃ ca-mʉño cũuriquerena tunu ʉga bapoocõami tunu.
Yeje quenare camaja caroaro cʉ̃ na ca-ujuurije to ca-anibato quena caroori rapʉ jeto ujacõami tunu.”
To bairona yai,
yeje na cá-átore bairona áama camaja Dio yere ca-apibatana.
Dio yere apibana quena netobʉjaro caroorije átiganucuma tunu.