La venida del Señor
3
Yʉ yarã,
yʉ ca-mairã,
atie mʉjaare yʉ ca-queti joo bapoorije ãa ati pũuro.
Ca-jʉgoye macá pũurore yʉ ca-queti joowʉ.
Ati pũuro quenare mʉjaare yʉ queti joo,
Dio ye quetire cariape jeto na tʉgooñaato ĩi.
2 Dio ye quetire ca-buioricarã tirʉmʉpʉ macana na ye queti buioriquere tʉgooñaña tunu.
Mani Ʉpaʉ manire ca-catíoʉ,
cʉ̃ ca-rotirique quenare tʉgooñaña tunu.
Jãa cʉ̃ ca-bue jʉgoeparã tiere jã ca-buiowʉ cʉ̃ ca-rotiriquere.
To bairi tiere mʉjaare jã ca-buio netoriquere majiritiqueticõaña.
3 Ati wamere caroaro majuu tʉgooña ʉjaya:
Ati yepa ca-petiparo jʉgoyeacãpʉ Dio yere seeto ca-ĩi eperã anigarãma.
Na majuuna caroorije na cá-átigari wame jeto átigarãma.
4 Oco bairo ĩi epegarãma:
“¿Noopʉ cʉ̃ ãtí,
‘Yʉ tunu atígʉ,’
ca-ĩricʉ?
Tunu atíquẽcʉmi.
Tirʉmʉpʉ mani ñicʉ jãa na ca-ãna yʉteapʉna ca-bairique na ca-bai yajiro bero quenare to bairona anicõa aninucu.
Ñee wajoaquẽe.
Ati yepa nemoo to ca-ani jʉgori paʉ ca-ãnajere bairona anicõa.
To bairi tunu atíquẽcʉmi,”
ĩi epegarãma.
5 To bairo ĩirã,
oco bairije tʉgooñagaquẽema:
Tirʉmʉpʉ Dio,
“To ãmaro,”
ĩri ati yepare,
ati ʉmʉrecóo quenare ca-rupeoyupi Dio.
Cʉ̃ ca-rotiro yepa oco pupeapʉ ca-ãnaje ca-buiayupa.
“Oco ricati jeto to tuaato,”
ĩri ati yepa macajere ca-quenooñupi Dio.
6 Cabero ati yepare Dio cʉ̃ ca-ruuro ati yepapʉ ca-anibatana ca-rua yaji peticoajuparã.
To bairo áti reecõari ati yepa jicãni ca-tunu wajoayupi Dio.
7 Cʉ̃ ca-wajoaricaro bero ati ʉmʉrecóo to bairona anicõa mai Dio cʉ̃ ca-rotiro.
To bairo rotibacʉ quena nipetiro macajere caberopʉ reegʉmi tunu peero mena.
Cʉ̃re ca-nʉcʉbʉgoquẽnare,
“Meere,
mʉjaare yʉ popiyeyegʉ,”
cʉ̃ ca-ĩri rʉmʉ ca-anopʉ to bairona na reegʉmi Dio tunu.
8 To bairi yʉ ca-mairã,
atiere tʉgooñaña:
Mani Ʉpaʉ Dio patowãcaquẽemi ati ʉmʉrecóore cʉ̃ ca-wajoanemopere.
Mil canacã cʉma yoaro majuu yuubacʉ quena jicã rʉmʉre bairona tʉgooñaʉmi cʉ̃ ca-yuurijere.
9 To bairi,
“Yoaro majuu cʉ̃ ca-ĩriquere átiquẽemi Dio,
reequẽcʉmi yua,”
ĩi tʉgooñabapa camaja jicãarã.
Jocarãna to bairije ĩi tʉgooñabama.
Camajare na bopaco tʉjʉri nemoona reequẽemi Dio mai.
Jicãʉ macare rocagaquẽemi.
Nipetirã caroorije na cá-átiere na ca-tʉgooñarique pairo,
na ca-wajoaro boomi Dio.
To bairi cʉ̃ ca-tunu atíparo jʉgoye caroorije na cá-átie,
na ca-tʉgooñarije na wajoato ĩi yoaro yuumi Dio.
Nare rooro cʉ̃ ca-popiyeyepe patowãcaquẽemi.
10 To bairi mani Ʉpaʉ Jesú,
“To cõopʉ tunu atígʉmi,”
mani ĩi majiquẽe.
Jee rutiri majocʉre,
“To ca-paʉ majuu atígʉmi,”
cʉ̃ mani ca-ĩi majiquẽtore bairona tunu atígʉmi Jesú.
Jesú cʉ̃ cá-ató uwioro ca-bairije ca-bʉjʉrije mena ʉmʉrecóo reegaro.
Nipetiro ʉmʉrecóopʉ ca-bujurã quena ʉ̃ʉ reegarãma.
Ati yepa quena,
ato macaje nipetirije camaja na cá-átie nipetiro ʉ̃ʉ reegaro yua.
11 To bairona,
“Dio ati yepa macajere reegʉmi,”
ĩi majirã Dio cʉ̃ ca-boorije caroare cá-átinucurã ãña.
12 Dio to bairo cʉ̃ ca-wajoapere wariñuurique mena tʉjʉ jooya.
“Yoaro mee mani Ʉpaʉ tunu atígʉmi,”
ĩi tʉgooñari cʉ̃ ca-boorije ája.
Ti rʉmʉ ca-ano ati ʉmʉrecóo macaje ʉ̃ʉ reegaro.
13 To bairona ca-uwiorije ca-anipe to ca-anibato quena,
mani maca,
“Ca-ñuuquẽtiere yʉ wajoagʉ,”
Dio cʉ̃ ca-ĩi cũuriquere mani yuu tʉgooña wariñuu.
Cawama ʉmʉrecóo,
cawama yepa anigaro.
Ti paʉ ca-ano caroarã,
ca-ñuurije cá-ána jeto anigarãma.
14 To bairi yʉ ca-mairã,
cawama ʉmʉrecóo,
cawama yepa quenare ca-tʉgooña yuurã aniri caroare áticõa aninucu ocabʉtiya mʉja quena.
To bairo mʉja cá-áto caroaro ca-ãnare mʉja bʉga ejagʉmi Jesucristo,
tunu ejaʉ.
Caroorije mana,
ca-bai bui cʉtiquẽnare mʉja bʉga ejagʉmi caroaro mʉja cá-áticõa ocabʉtiata.
15 To bairi caroaro majiña.
Mani Ʉpaʉ Jesú quepequẽemi,
aperã quena,
“Caroorije yʉ cá-átajere yʉre majirioya,”
yʉ na ĩato ĩi.
To bairona ca-ĩi buioyupi mani yaʉ Pablo,
mani ca-maii,
mʉjaare queti joʉ.
Dio cʉ̃ ca-majirije jʉgori mʉjaare ca-queti jooyupi Pablo ti wamere.
16 Cʉ̃ ca-uca queti jooro canacã ni to bairo jeto ca-ĩi buionucuñupi ati wamere ati yepare Dio cʉ̃ ca-wajoapere.
To bairo queti joobacʉ quena jicã wameri ca-majiriori wameri ca-ĩiñupi.
Ti wame uno cʉ̃ ca-ĩriquere apirã jicãarã caroaro ca-majiquẽna,
ca-apiʉja ocabʉtiquẽna maca,
“Ricati ĩigʉ ĩicʉmi Pablo,”
mʉjaare ĩitoma,
api mawijiabana.
Apeye Dio ye queti ucarique nipetirije na ca-buerije to bairona ricati ĩitoma.
To bairo ricati na ca-ĩi buiotorique wapa na reegʉmi Dio.
17 Yʉ yarã,
meere,
mʉjaare yʉ queti buiowʉ jocarãna,
“Dio yere cariape jã ĩi buio maji,”
ca-ĩitorã na ca-anipere.
To bairi caroaro tʉgooña majiña ati wamere,
caroorã Diore ca-bai botiorã na ca-ĩitorije macare mani apiʉjare ĩirã.
Cariape macajere apiʉjacõa aninucuña.
18 Mani Ʉpaʉ Jesucristo manire ca-netoo catíoʉ caroaro manire cʉ̃ cá-átibojarijere tʉgooñanemoña.
Cʉ̃ ca-aniere tʉgooña majinemoña.
To canacã rʉmʉ netobʉjaro cʉ̃ ca-aniere majinemoña.
Yucʉacã,
to canacã rʉmʉ quenare caroaro cʉ̃re mani wariñuu nʉcʉbʉgocõa aninucurã.
Wariñuurique cʉ̃re mani joocõa aninucurã.
To cõona ãa.
Amén.