PRIMERA CARTA DEL APÓSTOL
SAN JUAN
El mensaje de la vida
1
1-2 Yucʉacã Jesucristo ye queti buiogarã mʉjaare uca joorã jã áa.
Nemoona ca-anicõañupi Jesucristo cʉ̃ Pacʉ mena.
Ca-anicõa aninucuʉ aniri mani quenare anicõa aninucupere ca-joʉ ãmi.
Dio ye quetire ca-buio majuʉ aniri ca-ejayupi ati yepapʉ.
Jã mena ca-ãmi.
Ati yepapʉ ejari mani Pacʉ mena mani ca-anicõa aninucupere jã ca-ĩi buiowĩ.
Jã majuuna cʉ̃ ca-buioriquere jã ca-apiwʉ.
Cʉ̃re jã ca-tʉjʉwʉ.
Cʉ̃re jã ca-pãañawʉ.
To bairo cʉ̃ mena ca-ãnana aniri cʉ̃ cá-átajere jã ca-tʉjʉriquere,
cʉ̃ ca-buiorique quenare mʉjaare buio joorã jã áa.
Dios es luz
3 To bairi mʉja quena jãare bairo caroaro Dio mena,
cʉ̃ Macʉ Jesucristo mena caroaro mʉja ca-aniparore bairo ĩirã buio joorã jã áa jã ca-tʉjʉriquere,
jã ca-apiriquere.
4 To bairi mani ca-wariñuucõa aninucuparore bairo ĩirã atiere mʉjaare jã queti buio uca joo.
5 Jesucristo jãare cʉ̃ ca-buiorique mʉjaare queti buiorã jã áa.
Oco bairo jã ca-ĩi buiowĩ:
Ca-bujurijere bairo ca-ãcʉ̃ caroaʉ ãmi Dio.
Ca-naitĩaropʉ ca-ãcʉ̃re bairo mee ãmi;
caroorije mácʉ majuu ãmi Dio.
6 To bairi,
“Dio mena caroaro mani ãa,”
ca-ĩirã anibana quena,
caroorije mani cá-áti ãmata ca-naitĩãrõpʉ ca-ãnare bairo,
ca-ĩito pairã mani aniborã.
To bairo ĩirã cariape cá-átiquena mani aniborã.
7 To bairi Dio cʉ̃ ca-boori wame maca ána caroaro Dio mena mani ãa.
Aperã mena quena caroaro mani ãa.
To bairo Dio cʉ̃ ca-boori wame cá-ána mani ca-ãmata caroorije mani cá-átiere mani coje reebojanucumi Jesucristo,
manire ca-rií ree yajibojaricʉ aniri.
8 “Caroorije mácʉ yʉ ãa,”
mani ca-ĩata mani majuuna ĩitorã mani ĩi.
To bairo mani ca-ĩata Dio ye queti cariape macajere mani tʉgoñaquẽe.
9 To bairi caroorije mani cá-átajere Diore mani ca-buio peoro,
majirio peocoagʉmi caroorije mani cá-átajere.
“Caroorije mʉja cá-átaje nipetirijere yʉ reebojagʉ,”
cʉ̃ ca-ĩricarore bairona cariape majiriogʉmi.
Ʉgueri coje reericarore bairona caroorije mani cá-átaje nipetirijere majiriobojagʉmi.
10 “Camaja nipetirã caroorije cá-ána ãma,”
mani ca-ĩi queti buioyupi mani Pacʉ Dio.
To bairi,
“Caroorije yʉ átiquẽe,”
mani ca-ĩata,
“Jocʉna ca-ĩiñupi Dio,”
ca-ĩirãre bairo mani aniborã.
To bairo ĩirã cariape cʉ̃ ca-wadariquere ca-apigaquẽnare bairona mani aniborã.