SEGUNDA CARTA DEL APÓSTOL
SAN JUAN
La verdad y el amor
1
Yʉ Jesucristore ca-apiʉjarãre ca-jʉgo ãcʉ yʉ ãa.
Yʉ yao,
ati pũuro mʉre yʉ queti joo.
Dio cʉ ca-bejerico mʉ ãa.
Mʉ punaa quenare na yʉ queti joo.
Seeto mʉjaare yʉ mai.
Cariape yʉ ĩi.
Jicãʉna mʉjaare ca-maii mee yʉ ãa.
Jesucristo ye quetire ca-apiʉjarã nipetirã na quena maima mʉjaare.
2 Cariape macaje Jesucristo ye quetire ca-apiʉjarã mani ca-ano seeto mʉjaare yʉ mai.
Tie quetire mani yeripʉ mani majicõa aninucugarã.
3 To bairi caroare mani joogʉmi mani Pacʉ Dio.
Cʉ Macʉ Jesucristo quena to bairona caroare mani joogʉmi.
Mani mai tʉjʉri caroa ani wariñuuriquere mani joogʉmi.
To bairo caroaro mani átibojagʉmi,
cariape mani mairi.
4 Jĩcaarã mʉ punaare na bʉga ejaʉ,
cariape mani Pacʉ Dio cʉ ca-rotiriquere bairo na cá-áto seeto yʉ ca-tʉjʉ wariñuuwʉ.
5 Yʉ yao,
yucʉacã mʉ yʉ buiopa.
Ca-ame maipe ãa.
Cawama rotirica wame me ãa tie.
Nemoopʉ tiere mani ca-apinucuwʉ ame maiña ĩriquere.
6 Mani ca-ame maiata Dio manire cʉ ca-rotirica wame mani áa.
Mani ca-ame mai rotiyupi.
Ti wame,
“Ca-ame maicõape ãa,”
ĩriquere nemoopʉ mʉja apinucuricarã.
Los engañadores
7 Ati yepapʉ ca-ĩi buio mawijio teñarã,
ca-ĩito teñarã capaarã ãma.
“Jesucristo Dio cʉ ca-jooricʉ,
manire bairona camajocʉ rupaʉ mena ca-buiaricʉ ãmi,”
ca-ĩrijere nʉcʉbʉgoquẽema.
To bairo ca-ãna ca-ĩito pairije buio teñama.
Jesucristore ca-teerã ãma naa.
8 To bairi caroaro tʉgooña majirique mena ãña.
Na unare apiʉjaqueticõaña.
Nare mʉja ca-apiʉjaata Dio caroare mʉjaare cʉ ca-joogarijere jooquetiboʉmi.
Na ca-buiorijere mʉja ca-apiquẽpata maca,
caroaro Dio cʉ ca-boorije áticõari,
mʉjaare Dio cʉ ca-joope nipetirijerere mʉja bʉga ejagarã.
Caroare mʉja joogʉmi cariape macajere mʉja ca-apiʉja anicõarije wapa.
9 Nii Cristo cʉ ca-buiorique ca-aniquẽtierena apeye buio ajurique macare ca-buioʉ Dio cʉ ca-buio joo rotiricʉ me ãmi.
Diore ca-ʉpaʉcʉcʉ me ãmi cʉ ũcʉ.
Cristo cʉ ca-buiorique jetore cariape ca-buiocõa aninucurã maca caroaro ãma mani Pacʉ Dio mena,
cʉ Macʉ Jesu mena.
10 To bairi aperã Jesucristo ye queti majuu ca-aniquẽtiere,
ricati ca-buio teñarã mʉja tʉpʉ na ca-ejaata mʉja ya wiiripʉ na ani rotiquẽja.
Na mena caroaro wadapeniqueticõaña.
“Caroaro mʉjaare to baiato,”
ĩrica wame uno na ĩiqueticõaña.
11 To bairo na unare caroaro mʉja tʉpʉ mʉja ca-ani rotiata caroorije na cá-átie,
ca-ñuuquẽtie na ca-buio teñarijere cá-átinemorã mʉja aniborã.
Palabras finales
12 Capee majuu mʉjaare yʉ ca-ĩi buiogarije anibapa.
Ati pũuropʉ yʉ ucaquẽcʉ baii pʉa.
Cabero mʉja tʉpʉ yʉ aágʉ.
To bairi mʉja tʉpʉ yʉ ca-ejaata caroaro mani ame wadapeni wariñuugarã yua.
13 Mʉ yao,
Dio cʉ ca-bejerico punaa ato macana ñuu rotima mʉjaare.
To cõona ãa.