Hijos de Dios
3
Tʉgooñaña mani Pacʉ Dio seeto manire cʉ̃ ca-mairijere.
Manire ca-maii aniri,
“Yʉ punaa ãma,”
manire ĩinucumi.
To bairi cʉ̃ punaa majuu mani ãa.
Aperã ati yepa macana camaja Dio punaa mani ca-aniere majiquẽema,
Diore ca-majiquena aniri.
2 Yʉ yarã,
yʉ ca-mairã,
Dio punaa majuu mani ãa.
Cʉ̃ punaa anibana quena,
cabero mani ca-baipe nipetirijere mani majiquẽe mai.
Ati wame jeto mani maji:
Jesucristo ati yepapʉ cʉ̃ ca-tunu ejaropʉ cʉ̃ ca-anie cʉtiere mani tʉjʉgarã.
Cʉ̃ ca-anie cʉtiere tʉjʉrã cʉ̃re bairo ca-ãna majuu mani anigarã.
3 Jesucristo caroorije mácʉ ãmi.
Mani quena cʉ̃re bairo mani ca-anipere mani tʉgooñanucu.
To bairi rooro mani ca-tʉgooñanucurijere wajoarã mani áa.
4 Nipetiro caroori wamere cá-ána Dio cʉ̃ ca-rotirijere ca-netonʉcarã ãma.
To bairi camaja nipetirã rooro cá-ána Diore ca-netoo nʉcarã ãma.
5 Caroorije mani cá-átiere netooʉ acʉ́ ca-ejawĩ Jesucristo ati yepapʉre,
mʉja ĩi maji.
Caroorije cá-átiñaquẽcʉ majuu ãmi Jesú.
6 To bairi camaja nipetirã caroaro Jesucristo mena ca-aninucurã caroorijere átiquetinucuma.
Caroorije cá-átinucurã maca Jesú mena macana aniquẽema,
Jesucristore ca-majiquẽna aniri.
7 Yʉ punaa riapere bairo ca-ãna,
mʉjaare yʉ ca-ĩi buiorijere tʉgooña majiña.
Aperã mʉjaare ca-ĩitorãre na api nʉcʉbʉgoqueti majuucõaña.
Caroaro cá-átinucurã maca caroarã ãma,
Jesú caroaʉ cʉ̃ ca-anore bairona.
8 Caroorije cá-átinucurã Sataná yarã ãma.
Sataná maca nemoopʉna caroorije cá-ácʉ ca-anicõañupi.
Sataná rooro cʉ̃ cá-átiere rei acʉ́ ca-ejayupi Jesucristo ati yepapʉre.
9 Cʉ̃ punaare cʉ̃re bairona na ca-ano na cá-ájupi Dio.
To bairo cʉ̃ cá-áto maca caroorijere átiquetinucuma.
Caroorije áticõa aninucu majiquẽema,
Dio punaa aniri.
10 Dio punaare,
Sataná yarãre oco bairo na mani tʉjʉ beje maji:
Noa caroare cá-átinucuquẽna,
aperãre ca-maiquẽna Dio punaa me ãma.
Amémonos unos a otros
11 Ca-ame maipe ãa,
ca-ĩrijere nemoopʉna mʉja queti apiricarã.
12 Caín ãnacʉre bairo mani baiqueticõarã mania.
Cʉ̃ baire ca-tei ca-aniñañupʉ cʉ̃a.
Sataná yaʉ aniri cʉ̃ baire ca-jĩa rocacõañupʉ.
Cʉ̃ ca-bairije cʉtie caroorije ca-ano maca cʉ̃ baire cʉ̃ ca-jĩa rocayupʉ Caín.
Cʉ̃ bai Abel cʉ̃ ca-bairije cʉtie maca caroa ca-añupe.
To bairi cʉ̃ tʉjʉ ʉgoobacʉ cʉ̃ ca-jĩa rocacõañupʉ Caín cʉ̃ bai Abel're.
13 To bairi Diore ca-majiquẽna maca caroaro mʉja ca-áti aniere tʉjʉrã mʉjaare tʉjʉ ʉgoorã tutiborãma.
Caín cʉ̃ baire cʉ̃ ca-tʉjʉ ʉgooricarore bairo cá-ána ãnama.
Mʉjaare na ca-tʉjʉ tutiro tʉgooña acʉaqueticõaña.
14 Aperãre na mani ca-maiata,
“Dio punaa mani ãa,”
mani ĩi maji.
Ca-jʉgoye Jesucristore majiquetibana mani ca-ame maiquẽjupa.
Yucʉra Jesucristore ca-apiʉjarã aniri mani ame mainucu yua.
Mani ca-ame maiquẽpata tirʉmʉpʉ mani ca-ãnatore bairona mani aniborã.
To bairi ca-yajicoaparã mani aniborã.
Dio yarã mani aniquetiborã.
15 Aperãre ca-tʉjʉ teerã ca-jĩarãre bairona ãma.
Aperãre ca-jĩarã Dio tʉpʉ ca-anicõa aninucuparã mee ãma.
Meere,
tiere caroaro mʉja maji.
16 Jesucristo manire mairi manire ca-bai yajibojayupi.
Tiere tʉgooñari mani maji ame mairique majuu ca-aniere.
To bairi mani quena mani yarãre mairã mani ca-catíri rʉmʉri cõo nare ca-átinemoparã mani ãa.
Nare mani bai yajibojaborã nare seeto majuu mani ca-maiata.
17 Capee apeye ca-cʉgoʉ cʉ̃ yaʉ ca-bopacoʉre ca-joopaʉ ãmi.
Pairo cʉgobacʉ quena,
cʉ̃re cʉ̃ cá-átinemoquẽpata,
cʉ̃ yaʉre ca-maiquẽcʉ ãmi.
Dio,
“Ame maiña,”
cʉ̃ ca-ĩriquere cʉgoquẽemi cʉ̃ yeripʉre.
18 Aperãre átinemoquetibana quena,
“Aperãre ca-maii yʉ ãa,”
ca-ĩirã mani aniquẽna.
“Aperãre ca-mairã jã ãa,”
ĩirã,
cariapena nare mai majuucõari caroaro nare cá-átinemope ãa.
Confianza delante de Dios
19-20 Ape paʉra mani yeripʉ oco bairo mani tʉgooñaborã:
“Carooʉ majuu yʉ ãcʉ̃.”
To bairo tʉgooñabana quena aperãre na mani ca-maiata,
“Dio mena caroaro yʉ ãa,”
cariape mani ĩi maji.
Dio punaa mani ca-ano maca mani yerire maji peocoami Dio.
Mani yeripʉ mani caroorijere majirio majimi.
21-22 Mani yeripʉ,
“Caroorije yʉ cá-átie wapa ãa,”
ca-ĩi tʉgooñarã mani ca-aniquẽpata uwirique manona Diore mani jeni maji.
Cʉ̃ ca-rotirijere,
cʉ̃ ca-tʉjoorijere mani cá-áto mani ca-jenirijere mani joogʉmi Dio.
23 Oco bairije ãa Dio cʉ̃ ca-rotirique:
Cʉ̃ Macʉ Jesucristore apiʉja nʉcʉbʉgo rotimi.
Ape wame quena rotimi Dio:
Jesú jãare cʉ̃ ca-rotiricarore bairona manire ame mai rotimi Dio.
24 Dio cʉ̃ ca-rotiriquere mani cá-átinucuata caroaro cʉ̃ mena mani anicõa.
Dio quena mani mena anicõami.
Cʉ̃ Espíritu Santore manire cʉ̃ ca-jooricʉ jʉgori mani maji mani mena cʉ̃ ca-aniere.