La lengua
3
Yʉ yarã,
Dio Wadariquere ca-buiori maja capaarã mʉja anigabapa.
To bairo anigabana quena jicãarã jeto buiori maja ca-aniparã mʉja ãa.
Dio Wadariquere buiori maja na majuuna caroare na cá-átiquẽpata rooro tamuorique na joogʉmi Dio.
Cʉ̃ Wadarique ca-buioquẽnare jĩa netoro popiye tamuorique na joogʉmi Dio.
Tiere tʉgooña majirã cʉ̃ Wadarique ca-buiorã capaarã ca-aniquetiparã mʉja ãa.
2 Mani nipetirã jicãʉ rʉjaricaro mano caroorijere mani átinucu.
To bairo cá-ána anibana quena jicãʉ maca caroorije ĩiquẽcʉna caroa macaje jeto cʉ̃ ca-wadaata caroaʉ ãcʉmi.
Cʉ̃a nipetirije cʉ̃ cá-átigari wame cõo caroa macaje jeto cá-áti nutuacʉ ãcʉmi caroa macaje jetore ca-ĩi wadaʉ.
3 To bairi caballore camajare ca-umaʉre cʉ̃ tʉgooñañajate.
Capaii cʉ̃ ca-anibato quena cʉ̃ rijeropʉre come wẽe mani ca-jãata ti wẽe mena cʉ̃ mani wee tu maji.
To bairona mani ñemero õca ñemeroacã to ca-anibato quena tore mani ca-jʉgo tʉgooña majiata nipetiro mani ca-aniere caroaro mani ani maji.
4 Cumua ca-pairica juti ajeri mena yo,
mani cá-áto wino mena cá-aátia quenare tʉgooñañajate.
Wino ca-papuro pairica to ca-anibato quena wee turica pãi mena tia ʉpaʉ ti pãi mena wee turi noo cʉ̃ ca-booro aá majimi.
5 To bairona mani ñemero õca pãiacã to ca-anibato quena caroaro tore mani ca-jʉgo tʉgooña majiata caroorije mani ca-ĩibope ĩi majiquẽto.
To bairi ñemerore caroaro mani ca-jʉgo tʉgooñaquẽpata seeto caroorije jʉgo wada pairique ãa.
Peero quenare tʉgooñañajate.
Weje ca-pairi wejere mani ca-jĩa tuata peero õca peeroacã anibato quena yoaro mee joe peocõa.
6 To bairona ãa mani ñemero.
Mani ñemero jʉgori caroorije wadarique ãa.
To bairi to canacã wame caroorije ca-ĩirã mani ãa.
Ape wame mani rupaʉ macaje mena caroorije mani cá-áto aperãre ca-rooye tuu netorije ãa mani ñemero mena caroorijere mani ca-ĩi wadaro.
To bairi mani ca-anie quenare rooye tua mani ñemero mena rooro mani ca-wadaata.
Sataná yarã wãtia na ca-wadajãrijere mani ca-apiʉjaata rooro wada pairique ãa.
7 Macanʉcʉ macana nipetirã aña,
ca-wʉʉrã,
ria macana,
waibʉcʉrã nipetirã caroaro na mani cʉgo maji,
na mani roti maji,
nuuricarãre na mani ca-booata.
8 Nare nuu,
nare majio,
baibana quena mani ñemero macare dope bairo mani roti majiquẽe.
“Caroorije ĩiquẽja,”
mani ĩi majiquẽe mani ñemerore.
Caroorije aperãre na mani ca-ĩi wadaata seeto na mani rooye tuu.
9 Mani Ʉpaʉ Diore mani Pacʉre caroare cʉ̃ mani wada mani ñemero mena.
To menana caroare Diore wadabana quena caroorije mani ĩi wada aperãre camajare Diore bairona ca-bairã cʉ̃ cá-átanare.
10 Ñemero menana ca-ĩi nʉcʉbʉgori wame mani ĩi wada Diore.
To bairo ĩibana quena to menana caroorije quenare mani ĩi aperãre.
Yʉ yarã,
to bairo ca-ĩiquetiparã mani ãa.
11 Yepa pupea ca-oco butiri ope quenare jicã opepʉna oco caroa jeto ca-butirore,
ca-piyarije ajuyaro butiquẽe.
12 To bairona bai higuera ca-wamecʉtii quena.
Olivo na ca-ĩrije macare rica cʉtiquẽto higuera yucʉ.
To bairona bai ʉje wʉ quena.
Higuera ca-wamecʉtie macare rica cʉtiquẽto.
To bairi oco yepa pupea ca-oco butiri ope quena jicã opepʉna ca-ocaarije ca-butiata ca-ocaaquẽtie butiquẽto.
To bairi caroa jetore ĩi wadacõari caroorije macare ca-wadaquetipe ãa.
La verdadera sabiduría
13 Caroaro ca-tʉgooña majirã anigarã caroa macaje jeto ája mʉjaa.
To bairi,
“Ca-maji netoʉ yʉ ãa,”
aperãre ĩiqueticõaña.
Aperã maca caroa macajere mʉja cá-átinucurije tʉjʉrã,
“Caroaro ca-tʉgooña majirã ãma,”
mʉjaare ĩi tʉgooñagarãma.
14 Mʉja yeripʉ aperãre na mʉja ca-tʉjʉ ʉgooata,
na mʉja ca-peju cʉpata caroaro ca-tʉgooña majirã mee mʉja ãa.
To bairi,
“Aperã netoro ca-majii yʉ ãa,”
ĩi tʉgooñaquẽja.
To bairo mʉja ca-ĩi tʉgooñaata jocarãna mʉja ĩi.
15 Dio cʉ̃ ca-tʉgooña majirore bairo mʉja tʉgooñaquẽe.
Ati yepa macana maca Diore ca-majiquẽnare bairo mʉja tʉgooñacõa.
Mʉja majuuna mʉja ya wame jetore tʉgooñari Dio cʉ̃ ca-tʉgooñarore bairona mʉja tʉgooñaquẽe.
Sataná yarã wãtia na ca-tʉgooñarore bairona ãa to bairo mʉja ca-tʉgooñarije.
16 Aperãre ca-tʉjʉ ʉgoorã,
ca-pejucʉna na ca-anopʉre ame tutirique,
caroorije nipetiri wame jeto ãa.
17 Dio cʉ̃ ca-tʉgooña majirore bairo maca ca-tʉgooñarã mani ca-ãmata caroaro na mani tʉgooñagarã aperãre.
Mani ame tutiquetigarã.
Caroaro nʉcʉbʉgori wadarique mena mani anigarã.
Aperãre na mai tʉjʉri na mani átinemogarã.
Camajare jicãrore bairo jeto na mani mai tʉjʉgarã.
Ca-ĩito pairã mani aniquetigarã.
18 Aperãre caroaro na mani cá-ápata mani majuu caroaro ca-ãna Dio cʉ̃ ca-boorore bairo ca-ãna mani anigarã.