No hay que hacer distinción entre personas
2
Yʉ yarã,
apeye mʉjaare yʉ ĩi buiopa:
Mani Ʉpaʉ Jesucristo ca-ñuu netoʉ majuure ca-majirã aniri pairo ca-apeye cʉgorã quenare ca-apeye unie mana quenare jicãro cõona na maiña.
Jicãʉ pairo ca-cʉgoʉre,
“Ani ca-ani majuʉ ãcʉmi.
Cʉ̃ yʉ maibʉja.
Aperã ca-cʉgoquẽna macare na yʉ maiquẽe,”
ĩi tʉgooñaqueticõaña mʉjaa.
2 To bairi mʉja ca-neñapori paʉ pʉgarã camaja jicãʉ caroa jutii jañari caroa wamo jãarica beto,
ca-ajiyari beto tu jãaricʉ,
apeĩ ca-bopacoʉ jutii ca-boarijere jañaricʉ,
to bairo ca-ãna na ca-jãa ejaata ¿dope bairo na mʉja ĩibocʉtí?
3 Ca-apeye unie paii macare tʉjʉ mairã,
“Atona caroa pãipʉre ruiya,”
¿cʉ̃ mʉja ĩibocʉtí?
Ca-bopacoʉ macare caroaro cʉ̃ ĩiquẽnana,
“To bairona ti paʉpʉna tʉjʉnucucõaña,”
o “Yepapʉna ruiya,”
¿cʉ̃ mʉja ĩibocʉtí?
4 To bairona ca-ĩi tʉgooñarã mʉja ca-ãmata camajare jicãro cõona ca-mai tʉjʉquẽna mʉja aniborã.
To bairona rooro tʉgooñari camajare jicãro cõona na mʉja mai tʉgooñaquẽe.
Ca-apeye unie pairã quenare,
ca-apeye unie mana quenare jicãro cõona na mʉja mai tʉgooñaquẽe.
5 Yʉ yarã,
caroaro yʉ apiya mʉjaa.
Ca-bopacoorã na ca-anibato quena Dio maca caroaro na mai tʉjʉmi.
Na mai tʉjʉri capaarã na ca-cũuñupi cʉ̃re ca-apiʉjaparãre.
To bairi Ʉpaʉ Dio cʉ̃ ca-anopʉ caroaro anigarãma cʉ̃re na ca-apiʉjaata.
6 Mʉja maca ca-apeye unie manare to bairona na mʉja tʉjʉ reecõa.
Caroaro mʉja tʉgooñaquẽe.
Ca-apeye unie pairã maca rooro mʉja átinucuma.
Caʉparã tʉpʉ mʉja ñe aánucuma,
“Rooro áama,”
mʉja ĩi wadajãrã.
Ñuuquẽtie mʉjaare na ca-ĩi eperije to ca-anibato quena caroaro na mʉja tʉjʉ nʉcʉbʉgo nare.
Ca-bopacoorã macare na mʉja tʉjʉ nʉcʉbʉgoquẽe,
rooro mʉjaare cá-átiquẽna na ca-anibato quenare.
7 Jesúre ca-majirã mani ca-ãmata cʉ̃ yarã mani ãa.
To bairi aperã Jesú ye quetire na ca-buioro apirã mani wariñuu.
Ca-apeye unie pairã maca Jesú ye quetire apirã rooro ĩi epema.
8 Mani Ʉpaʉ Dio oco bairo manire ca-rotiyupi cʉ̃ Wadariquepʉ:
“Mʉja majuuna mʉja ca-mairore bairona aperã quenare na maiña,”
ca-ĩiñupi Dio.
Tie cʉ̃ ca-rotirijere mani ca-apiʉjaata caroaro cá-ána mani anigarã.
9 To bairo caroaro cá-ána anibana quena ca-apeye unie pairã jetore mʉja ca-tʉjʉ nʉcʉbʉgoata roorije cá-ána mʉja ãa.
To bairi ñuuquẽto mʉja ĩimi Dio.
“Yʉ ca-rotirije cariape ca-apiʉjarã mee mʉja ãa,
rooro cá-ána mʉja ãa,”
mʉja ĩimi Dio.
10 Dio Wadarique nipetirije cʉ̃ ca-rotiriquere átibana quena jicã wameacã átiquẽnana cariape cʉ̃ ca-rotiriquere ca-apiʉjaquẽna mani ãa.
11 Tirʉmʉpʉ Dio cʉ̃ ca-rotiriquere cũʉ oco bairo ca-ĩiñupi:
“Áti epericarã cʉtiqueticõaña.”
To bairi,
“Aperãre jĩaqueticõaña,”
ca-ĩiñupi Dio.
To bairi apeo mena áti epequetibana quena camajocʉre mani ca-jĩaata Dio cʉ̃ ca-rotiriquere ca-ano cõona ca-apiʉjaquẽna mani aniborã.
12 To bairi mʉjaa,
Dio ye queti buiorique jʉgori ca-tʉjʉ beje ecooparã aniri caroaro ãnajecʉja.
Caroaro wadaya.
Cʉ̃ ca-roti cũurique macare mani cá-ápata caroaro mani ani majigarã.
13 To bairi tunu noa una aperãre ca-bopaco tʉjʉquẽnare na bopacoo tʉjʉquetigʉmi Dio na quenare.
Na popiyeyegʉmi Dio camajare cʉ̃ ca-tʉjʉ bejeri rʉmʉ ca-anopʉ.
Aperãre ca-bopaco tʉjʉrã maca caroaro netogarãma ti paʉ ca-anopʉ.
La fe y las obras
14 Yʉ yarã,
ape wame mʉjaare yʉ ĩi buiopa:
“Diore ca-apiʉja nʉcʉbʉgorã jã ãa,”
ca-ĩirã anibana quena aperãre na mani cá-átinemoquẽpata jocarãna,
“Diore yʉ apiʉja nʉcʉbʉgo,”
ca-ĩirã mani aniborã.
To bairo ca-ĩi jocarã mani ca-ãmata manire netooquetigʉmi Dio.
15-16 To bairi jicãʉ mani yaʉ jutii mani,
ca-ñigo riaʉ cʉ̃ ca-anibato quena,
“Ñuubʉja,
jutii caroare mʉ bʉgagʉ,
ʉgarique quenare mʉ cʉgogʉ,”
cʉ̃ mani ca-ĩi ñuu roti tʉjʉata ñuuquẽe.
Cʉ̃re mani ca-joobopere,
cʉ̃ mani ca-nubopere cʉgobana quena tiere cʉ̃ jooquẽnana cʉ̃ mani ca-ñuu roti tʉjʉrije ñuuquẽe.
17 To bairona,
“Diore yʉ apiʉja nʉcʉbʉgo,”
ĩibana quena caroaro mani cá-átiquẽpata ca-ĩi jocarã mani ãa.
18 Yʉ ca-buiorijere mʉja ca-api majiquẽpata oco bairo mʉjaare yʉ ĩi buiopa:
Caroare mʉja cá-átiquẽpata,
“Caroaro Diore ca-apiʉja nʉcʉbʉgorã ãnama,”
mʉjaare yʉ ĩi majiquẽe.
Yʉ macare caroare yʉ cá-áto tʉjʉrã,
“Diore ca-apiʉja nʉcʉbʉgoʉ ãcʉmi,”
yʉre mʉja ĩi maji.
19 “Dio jicãʉna ãmi cá-áti nʉcʉbʉgopaʉ,”
mʉja ĩi.
Jocarã meena to bairo mʉja ĩi.
Wãtia quena to bairona,
“Dio jicãʉna ãmi cá-áti nʉcʉbʉgopaʉ,”
ĩi majima.
To bairo Diore ca-ĩi majirã anibana quena na maca Diore uwirã nanaama.
Cʉ̃ uwibana quena caroa macare átiquẽema naa.
To bairi mʉja maca,
“Diore yʉ api nʉcʉbʉgo,”
ca-ĩirã aniri caroare ája.
20 Caroaro mʉja tʉgooñaquẽe.
Ricati mʉja tʉgooña.
Oco bairo maca ani majuu:
“Dio jicãʉna ãmi mani cá-áti nʉcʉbʉgopaʉ.
Cʉ̃re yʉ apiʉja nʉcʉbʉgo yʉa,”
ca-ĩirã anibana quena aperãre mani cá-átinemoquẽpata Diore ca-apiʉja nʉcʉbʉgoquẽnare bairona mani ãa.
To bairi jocarãna,
“Diore yʉ apiʉja nʉcʉbʉgo,”
mani ĩicõa.
21 Mani ñicʉ Abraham ãnacʉ cʉ̃ cá-átajere mʉjaare yʉ ĩi buiopa.
Dio,
¿Abraham caroaro yʉre ca-apiʉja nʉcʉbʉgoʉ cʉ̃ ãtí?
ĩi Isaá cʉ̃ macʉrena cʉ̃ ca-jĩa joe buje mʉgo joo rotiyupʉ.
To bairo cʉ̃re cʉ̃ ca-ĩiro ʉ̃ta tutu bui cʉ̃ ca-jĩaboyupʉ Abraham cʉ̃ macʉ Isaáre.
To bairo cʉ̃ ca-jĩagari paʉna Dio maca cʉ̃ ca-matayupʉ.
Cʉ̃ matari,
“Caroaro yʉre ca-apiʉja nʉcʉbʉgoʉ ãmi Abraham.
Caroorije cá-átiquẽcʉ cʉ̃ yʉ ĩi tʉjʉ,”
cʉ̃ ca-ĩiñupʉ Dio.
22 Cʉ̃ ca-bairica wamere caroaro api majiña mʉjaa.
Diore caroaro ca-apiʉja nʉcʉbʉgoʉ aniri cʉ̃ ca-ĩrijere bairo cá-ájupʉ Abraham.
To bairi mani maca to bairo cʉ̃ cá-átajere tʉgooñari,
“Caroaro Diore ca-apiʉja nʉcʉbʉgoʉ ca-añupi Abraham,”
mani ĩi maji.
23 To bairi Dio ye quetire ca-buioricʉ tirʉmʉpʉ macacʉ oco bairo cʉ̃ ca-ĩi ucarica wamere bairona ca-baiyupe:
“Diore ca-apiʉja nʉcʉbʉgoyupʉ Abraham.
To bairo cʉ̃ ca-apiʉja nʉcʉbʉgoro tʉjʉri,
‘Caroorije cá-átiquẽcʉ ãmi Abraham,’
cʉ̃ ca-ĩi tʉjʉyupʉ Dio.”
To bairi,
“Dio yaʉ majuu ãmi Abraham,”
cʉ̃ ca-ĩiñuparã aperã quena.
24 To bairi ati wamere mʉja majirã:
Diore apiʉja nʉcʉbʉgori caroare cʉ̃ ca-boori wame jetore mani cá-áto tʉjʉʉ,
“Caroorije manare bairona na yʉ tʉjʉ,”
manire ĩimi Dio.
“Diore ca-apiʉja nʉcʉbʉgoʉ yʉ ãa,”
ĩibana quena cʉ̃ ca-boori wamere mani cá-átiquẽpata,
caroorije cá-áti pairãre bairo mani tʉjʉʉmi Dio.
“Caroorije manare bairo na yʉ tʉjʉ,”
mani ĩiquẽcʉmi Dio cʉ̃ ca-boorije macare mani cá-átiquẽpata.
25 Rahab ãnaco cõ ca-bairique quenare mʉjaare yʉ ĩi buiogʉ.
Ca-jʉgoyepʉ caʉmʉa na cá-áti eperico anibaco quena cabero Dio yere apiʉjari Israel maja ca-yajioropʉ cõ ya macapʉre na ca-tʉjʉra ejaro cõ ya wiipʉ na ca-jãa rotiyupo.
Cabero aperã nare na ca-jĩagaro ape wãpʉ na ca-ruti rotiyupo.
To bairo caroaro cõ cá-áto tʉjʉʉ,
“Caroorije cá-átiquẽcore bairona ãmo,”
cõ ĩi tʉjʉricʉmi Dio Rahab're.
26 Camajocʉ cʉ̃ rupaʉ cʉ̃ yeri to ca-manicõaata ca-bai yajiricʉ ãmi.
Tʉgooñaqueti,
wãrequeti baiimi.
To bairona rupaʉ ca-bairore bairona,
“Diore yʉ apiʉja nʉcʉbʉgo,”
ca-ĩirã anibana quena caroare mani cá-átiquẽpata ñuuquẽe.
Jocarãna,
“Diore yʉ apiʉja nʉcʉbʉgo,”
ca-ĩirã mani aniborã.