Cómo será la gente en los últimos días
3
Timoteo,
ati wame quena caroaro tʉgooña majiña.
Ati ʉmʉrecoo ca-ani tʉjari rʉmʉri ca-ãnopʉ popiye majuu ca-bairije anigaro.
2 Camaja caroorã majuu anigarãma ati yepapʉre.
Na majuu na ca-anie jetore tʉgooñagarãma,
aperãre mai tʉjʉquẽnana.
Niyerure tʉjʉ ʉgoogarãma.
“Aperã netoro ca-majii yʉ ãa,
ca-ani majuʉ yʉ ãa,”
seeto ca-ĩirã anigarãma.
Diore cʉ bai netoo nʉcari aperãre ca-wada pairã anigarãma.
Na pacʉa na ca-rotiro na apiʉjaquetigarãma.
Caroaro aperã nare na cá-átinemobato quena,
“Caroaro mʉja ájupa,”
ca-ĩiquẽna anigarãma.
Dio yere ca-tʉgooña nʉcʉbʉgoquẽna anigarãma.
3 Aperãre na tʉgooña maiquetigarãma.
Aperãre na tʉjʉ bopacooquetigarãma.
Caroorije ame ĩi buio bategarãma.
Noo caroorije na cá-átigarijere jana majiquetigarãma.
Ca-uwarã majuu ca-ãna anigarãma.
Dio cʉ ca-tʉjoorijere átigateegarãma.
4 Aperã,
na mena macana ca-anibatana quenare rooro na átigarãma.
“Caroorije ãa mani cá-átie,”
ĩi majibana quena noo na ca-boorije caroorije jetore átinucugarãma.
“Seeto majuu aperã netoro ca-majirã jã ãa,”
ĩi tʉgooñagarãma.
Noo na cá-átiga wariñuurije jetore tʉgooñagarãma,
Dio macare tʉgooñaquẽnana.
5 Diore ca-nʉcʉbʉgorãre bairo baibana quena baitorique jeto átigarãma,
na yeri ca-tʉgooñarijere Dio cʉ ca-wajoa majipe macare booquetiri.
Na una mena bapacʉtiqueti majuucõaña.
6 Na mena macana jĩcaarã ape wiiripʉ aáteñanucuma.
To bairo aáteñarã wiiripʉ jãa,
oco bairo cãromiare na ĩinucuma:
“Dio ye quetire mʉjaare jã buiorã apʉ́,”
na ĩitoma.
To bairo na ca-ĩitorijere na apiʉjama cãromia caroaro ca-tʉgooña ocabʉtiquẽna.
Noo na ca-boorije caroorijere ca-ʉgari peanucurã,
na ca-buiorijere apiʉjama cãromia caroaro ca-tʉgooña ocabʉtiquẽna.
7 To bairo rooro cá-ána romiri ca-ĩitorã na ca-ĩi buiorijere seeto apibana cariape queti macaje macare api majiquẽema.
8 Cãromiare ca-ĩitorã tirʉmʉpʉ macana cúmúa Janes,
Jambres,
ca-wamecʉna ca-aniñaricarãre bairona ãma.
Moisére ca-booquẽjuparã.
Dio ye queti Moisé cʉ ca-buiorije quenare ca-booquẽjuparã.
Yucʉ rʉmʉrire ca-ĩito teñarã quena na ãnanare bairona cariape macaje Dio ye quetire booquẽema yucʉ quenare.
Caroorije macaje jetore tʉgooñanucuma.
9 To bairo na ca-ĩito teñarije to ca-anibato quena na ca-ĩri wame nipetirãpʉre jejaquetigaro.
Camaja,
“Ca-ĩitorije ãa na ca-buiorije,”
ĩi majigarãma.
Tirʉmʉpʉ Janes,
Jambres anana na ca-ĩitoriquere ca-majiñuparã to macana.
To bairona yucʉ quenare ca-ĩito teñarãre maji peticoagarãma camaja yua.
El último encargo de Pablo a Timoteo
10 Mʉ maca Timoteo,
camajare yʉ ca-queti buionucurijere caroaro mʉ maji.
Yʉ cá-áti aniere,
yʉ cá-átigarije quenare mʉ maji.
Diore yʉ ca-tʉgooña nʉcʉbʉgorijere mʉ maji tie quenare.
Aperã rooro yʉre na cá-átibato quena yʉ ca-nʉcanucurijere mʉ maji.
Camajare yʉ ca-mairije quenare mʉ maji.
Jesucristo yere yʉ ca-queti buiorije jʉgori yʉ ca-popiye cʉtiere mʉ maji.
Popiye baibacʉ quena yʉ ca-buio janaquetaje quenare mʉ maji.
11 Antioquíapʉ,
Iconiopʉ,
Listrapʉ,
to cãnacã macaripʉ macana rooro yʉre na cá-átaje quenare mʉ maji.
Rooro yʉ ca-popiyeyewã,
Jesucristo yere yʉ ca-buio teñarije wapa.
To bairo rooro yʉre na cá-átibato quena mani Ʉpaʉ Dio maca yʉ ca-matabojawĩ yʉre na ca-jĩaborique cõo.
12 To bairona na popiyeyegarãma nipetirãre Jesure ca-apiʉjarã cʉ ca-boorijere cá-átinucurãre,
cʉ ye quetire ca-booquẽna maca.
13 Caroorije cá-ána,
ca-ĩitori maja maca caroorije áti ani nutuagarãma.
Aperãre ĩitonemo nutuagarãma.
Sataná ye ca-ĩi jocarijere apiʉjabana camajare buiotogarãma tunu.
14 Mʉ maca Timoteo cariape macaje maca mʉ paco,
mʉ ñico,
yʉ quena jã ca-ĩi buioro mʉ ca-apiʉjawʉ mʉa.
“Ca-ĩitorã me ãma yʉre ca-buioricarã,”
mʉ ĩi maji.
To bairi cariape jeto apiʉja anicõaña,
ape wame tʉgooñaquẽcʉna.
15 Cawimaʉ ãcʉ̃pʉna Dio ye queti ucarica pũuri macajere mʉ ca-maji bʉcʉawʉ.
Tiere buei Dio yere mʉ ca-majiwʉ.
Tiere majii,
Jesucristore tʉgooña nʉcʉbʉgoʉ,
to bairo mʉ cá-áto mʉ ca-netoowĩ Dio mʉ ca-yajibopere.
16 Dio ye queti ucarica pũuri to cãnacã pũuro Dio cʉ ca-majiorije mena,
“Ocõo bairo ĩi ucaya,”
nare cʉ ca-ĩiro na ca-ucarique ãa.
Tiere bueri cariape macajere mani majigarã.
Tiere buerã di wame uno,
“Tie caroorijere cá-áti janape ãa,”
mani ĩi maji.
“To bairo maca ca-ñuurije cá-átipe ãa,”
mani ĩi maji.
Tunu to bairona nipetirije caroa mani cá-áti anipere mani maji Dio Wadariquere buerã.
17 Cʉ Wadariquere ca-jooyupi Dio cʉ yarãre,
noo ca-boorije ca-ñuurijere na áti majiato ĩi.