Un buen soldado de Jesucristo
2
To bairi Timoteo,
yʉ macʉre bairo ca-ãcʉ̃,
Jesucristo mʉre cʉ cá-átinemorije mena tʉgooña ocabʉtiya.
2 Yʉ ca-queti buioriquere aperã capaarã mena yʉre mʉ ca-apiriquere aperãre na buio netoña tunu.
Aperãre ca-queti buio neto ocabʉtirã macare na queti buio netoña.
To bairi naa aperãre na queti buio netonucugarãma tunu.
3 Mʉ quena popiye tamʉobacʉ quena nʉcaña,
Jesu ye quetire buio janaquetiri.
Uwamaʉ caroorãre ca-quẽ ocabʉtii popiye cʉ̃re to ca-bairo cʉ ca-nʉca ocabʉtirore bairona mʉ quena nʉca ocabʉtiya.
4 Nii uwamaʉ ũcʉ aperãre bairo,
“To bairona ca-anipaʉ yʉ ãa yʉ quena,”
ĩi majiquẽcʉmi.
Aperã uwamarã ca-aniquẽna maca noo na ca-booro áti aninucuma.
Uwamaʉ maca cʉ ʉpaʉ cʉ ca-rotirore bairo jeto átinucumi,
yʉ mena cʉ wariñuato ĩi.
5 To bairona ca-atʉri majocʉ aperãre atʉ ocabʉti netogʉ atʉrique ʉparã na ca-rotirije uniere bairona cá-átipaʉ ãmi.
Cʉ cá-átiquẽpata cʉ ca-atʉ netorije wapa cʉ̃re na ca-jooboriquere jooquetiborãma,
apero maca na ca-rotiquẽtopʉ cʉ ca-atʉro jʉgori.
6 To bairi tunu jĩcaʉ cʉ ya weje ca-paanucuʉ ti weje ca-rica cʉtiere jeimi cʉ majuuna.
Cʉ ye ca-paarique wapa wapataʉre bairo baiimi.
Mʉ quena Timoteo to bairona Dio yere mʉ cá-áto ca-bero caroare mʉ joogʉmi Dio yua.
7 Mʉre yʉ ca-ĩi queti buiorijere caroaro tʉgooñaña.
To bairo mʉ ca-tʉgooñaro mani Ʉpaʉ Dio caroaro mʉ ca-majiro mʉ átigʉmi.
8 Jesucristo cʉ ca-bairiquere tʉgooñaña tunu.
Ʉpaʉ David tirʉmʉpʉ macacʉ pãrami ati yepapʉ ca-buiayupi Jesu.
Cabero cʉ̃re na ca-jĩabato quena ca-tunu catiyupi Jesu.
Tie quetirena camajare na yʉ ĩi buionucu.
9 Tie queti caroa quetire yʉ ca-buio teñarije wapa popiye yʉ tamʉo.
To bairi caroorije cá-átacʉre bairona presopʉ yʉ ca-jõowã tie quenare.
To bairo presopʉ yʉre na ca-cũbato quena Dio ye queti maca presopʉ cũu roca majiña maa.
Nipetiropʉ jeja peticoagaro yua.
10 To bairi nipetiro yʉ ca-popiye tamʉorijere yʉ nʉcacõa.
Dio yarã cʉ ca-bejericarã cariape na apiʉjaato ĩi,
to bairona yʉ nʉcacõa.
Na quena Jesucristo mena to cãnacã rʉmʉ na ani wariñuu anicõato ĩi,
to bairo yʉ nʉcacõa.
11 Ati wame cariape queti ã:
Jesucristo rooro cʉ na cá-áto cʉ ca-bai yajiricarore bairo mani quena bai yajirã,
cʉ ca-catí tunuricarore bairo mani quena mani catínemogarã tunu.
To bairi jõ buipʉ cʉ mena mani anicõa anigarã to cãnacã rʉmʉ yua.a
12 To bairi ati yepapʉ cʉ ye quetire aperãre mani ca-buiorije wapa popiye baibana quena,
ape rʉmʉ cʉ̃re ca-rotinemorã mani anigarã.
To bairona ati yepapʉ,
“Aperã yʉ tutirema,”
ĩibana,
“Jesure yʉ majiquẽe,”
mani ca-ĩiata Jesu maca ape rʉmʉ mani quenare,
“Mʉjaare yʉ majiquẽe,”
mani ĩigʉmi.
13 To bairi mani ca-ĩirore bairo mani cá-áti peoquetibato quena cʉ maca cʉ ca-ĩirore bairona áticõa aninucugʉmi.
Cʉ maca cariape ca-ĩi aniri ĩito majiquẽemi.b
Un trabajador aprobado
14 To macana Jesu yere ca-apiʉjarãre caroaro na ĩi buioya,
mʉre yʉ ca-uca joorijere caroaro tiere na tʉgooña majiato ĩi.
Na ca-ame ĩi wada netorijere na jana rotiya mani Ʉpaʉ Dio cʉ ca-apirona.
To bairo na ca-ame wada netorije cawatoa macaje ãa.
Tie caroaro na ca-bairo átiquẽe.
To bairi camaja tiere apirã tʉgooña mawijianucuma.
15 To bairi Dio mʉre cʉ cá-áti rotirijere mʉ ca-majiro cõo caroaro ája,
aperãre Dio ye quetire buiori.
“Caroaro cʉ̃re yʉ cá-áti rotirijere áami Timoteo,”
Dio mʉre cʉ ĩato ĩi,
Dio ye queti caroaro cariape macaje jeto aperãre na ĩi buionucuña.
To bairo caroaro ácʉ Diore mʉ tʉgooña boboquetigʉ.
16 Ati yepa macana Diore ca-apiʉjaquẽna na majuuna na ca-ĩi tʉgooñarije aperã na ca-ĩi buioro na apiquẽja.
Ca-ñuuquẽtie ãa.
Camaja tiere ame buiorã netobʉjaro caroorã ani nutuaborãma.
17 Tie mani rupaʉpʉre ca-boarije cáncer ca-wamecʉtie riaye ca-boarije ca-bʉcʉanemorore bairona áa.
Tiere bairona baima Imeneo,
Fileto ca-wamecʉna.
Nana carooye tua jʉgoyupa tie ca-ñuuquẽtiere apibana.
18 Ca-ñuuquẽtierena queti buionucuma camajare tunu.
“Ca-bai yajiricarã ca-catí tunuñupa mere,”
na ĩi queti buioma aperãre.
To bairo na ca-ĩi queti buiorije jʉgori aperã cariape Jesure ca-apiʉjabatana tʉgooña mawijiama.
19 To bairo ca-ĩitorã ricati na ca-queti buiobato quena,
Dio ye queti maca cariape ĩrique anicõa.
Tiere wajoa majiña maa.
Dio ye queti ucarica pũuro oco bairo ĩrique queti ãa:
“Mani Ʉpaʉ Dio cʉ yarãre majimi.”
Ape wame quena oco bairo ĩi ucarique a:
“ ‘Dio yaʉ yʉ ãa,’
ca-ĩirã maca caroorijere na áti janacõato.”
20 Pairi wii camaja capaarã na ca-ani wiipʉre ca-pee jotʉri ãa.
Caroa rʉri oro mena o plata mena na cá-áta rʉri ãa.
Ape rʉri ca-watoa macaje ríi mena,
yucʉ mena na cá-áta rʉri ãa tie quena.
To bairi ti wii ʉpaʉ boje rʉmʉ ca-ãno caroa rʉri oje cojeri tie jetore peoʉmi,
camajare na nuugʉ.
Apeye caroori rʉribʉja jeto peoʉmi cawatoa rʉmʉ ca-ano,
o caroorije jetore jãagʉ.
21 To bairona Diore nʉcʉbʉgorã caroa rʉ ca-ʉpaʉ ti rʉre mai,
caroa rʉ cʉ ca-oje cojerore bairona mani bai Dio yarã ãnaa.
Mani maca caroorije áti janari Dio cʉ ca-booro cõo mani áti majigarã,
ca-ani majuurije Dio yere mani áti majicõa aninucugarã.
22 Aperã cawamarã Diore ca-apiʉjaquẽna caroorije na majuuna noo na ca-boorijere na cá-átiere tʉgooñaqueti netoocõaña,
nare bairo átiquẽcʉna.
Ca-ñuurije macare tʉgooñari tie jetore áticõa aninucuña.
Diore tʉgooña nʉcʉbʉgonucucõaña.
Aperãre na mairi caroaro na átinemonucuña.
Aperã mena caroa ãnajecʉja.
Aperã caroorije cá-átiquẽna mena,
Diore ca-jeni nʉcʉbʉgonucurã mena caroaro na mena anicõaña.
23 Ca-ame wada netorãre na apiqueticõaña.
Na maca ca-api majiña maniere tʉgooñanucuma,
ca-ñuuquẽtiere.
Tie jʉgori ame tutirique aápá.
To bairi tiere ca-ĩi buiorãre na apiqueticõaña.
24 Mani Ʉpaʉ Dio cʉ yarã cʉ ca-rotirã caroaro na ca-ãno boomi.
To bairi aperã mena ca-ame wada neto quetiparã ãma.
Caroaro maca aperã mena ca-aniparã ãma.
Caroaro aperãre Dio yere ca-buio majirã ca-aniparã ãma.
Ca-punijiniquẽna na ãmaro,
Dio ye quetire ca-buiorã anigarã.
25 To bairi ricati ca-tʉgooñarãre,
cariape ca-aniere ca-booquẽnare caroaro na ĩi buioya.
Dio nare cʉ wajoato ĩi,
to bairo caroaro punijinirique mano na ĩi buioya.
To bairo na mʉ ca-buioro na maca wajoari,
cariape macare api nʉcʉbʉgogarãma.
26 To bairo cariape maca apirã Sataná cʉ ca-rotirã ca-anibatana cʉ janacõagarãma yua.
To bairi Satanáre cʉ ca-buti weoricarã aniri cʉ api netoocõagarãma Satanáre yua.