LA CARTA DEL APÓSTOL SAN PABLO A
TITO
Pablo escribe a Tito
1
Yʉ Pablo ati pũuropʉ petoacã mʉ yʉ queti joo mʉre,
Tito.
Dio cʉ̃ paabojari majocʉ yʉ ãa,
cʉ̃ ye quetire buio teñaʉ.
Jesucristo ye quetire cʉ̃ ca-buio rotiricʉ yʉ ãa.
Dio cʉ̃ ca-bejericarãre yʉ buio rotimi Dio,
Jesucristo yere na api nʉcʉbʉgoato ĩi.
Cʉ̃ ye queti cariape macaje ãa,
na ĩi majiato ĩi yʉ buio rotimi Dio.
Tie quetire api nʉcʉbʉgorã,
Dio cʉ̃ ca-boorore bairo caroaro ani majigarãma.
2 To canacã rʉmʉ Dio mena na ca-anicõa aninucupe quenare majigarãma.
Tirʉmʉpʉre ati yepa átigʉ jʉgoye,
“Yʉ mena anicõa aninucugarãma,”
ca-ĩiñupi Dio.
Ca-ĩi jocaʉ mee cʉ̃ ca-ano to bairona caroaro mani ca-anicõa anipere mani tʉgooña wariñuu ani maji,
cʉ̃re api nʉcʉbʉgorã.
3 Ca-yoaro bero cʉ̃ ca-boori paʉ ca-anopʉ mani ca-majioñupi Dio tirʉmʉpʉ cʉ̃ ca-ĩi cũurica wamere.
“Yʉ mena anicõa aninucugarãma yʉre ca-apiʉjarã,”
cʉ̃ ca-ĩriquere manire ca-majioñupi.
“Tierena mʉ buio teñagʉ,”
yʉ ca-ĩi buiowĩ Dio.
Mani caroorijere manire ca-netoobojaricʉna yʉ ca-ĩi buiowĩ.
To bairo yʉre cʉ̃ ca-buio teña rotirore bairona yʉ áa yua.
4 Tito,
mʉre yʉ ca-buiorique apiri Jesucristore mʉ ca-apiʉja jʉgowʉ.
To bairi yʉ macʉre bairo yʉ ca-tʉgooñaʉ mʉ ãa.
Mani Pacʉ Dio caroaro wariñuuriquere mʉre cʉ̃ joato.
Jesucristo,
caroorije mani cá-átiere manire ca-netoobojaʉ cʉ̃ quena to bairona caroa ani wariñuuriquere mʉre cʉ̃ joato.
El trabajo de Tito en Creta
5 Tito,
yʉ yaʉ,
mʉ yʉ ca-cũuwʉ Creta na ca-ĩri poapʉ ca-pairi ya recomaca ca-ani poa yucʉ poapʉ.
Topʉ Jesúre ca-apiʉjarãre na yʉ ca-buio peoquetajere na buioya ĩi,
mʉ yʉ ca-cũuwʉ.
“Cristore ca-apiʉjarãre ca-jʉgo aniparãre na bejeya,”
mʉ yʉ ca-ĩiwʉ,
to canacã macapʉ Cristore ca-apiʉjarãre ca-jʉgo aniparãre.
6 To bairi camaja,
“Caroaro cá-ána ãma,”
na ca-ĩirãre na mʉ bejegʉ.
Jicão jeto ca-nʉmoa cʉnare,
cá-áti epericarã cʉtiquẽnare na mʉ bejegʉ.
Na punaa Jesú ye quetire ca-apiʉjarã anigarãma.
“Roorije cá-átinucurã,
na pacʉare ca-boca wada canamurã ãma,”
aperã na ca-ĩi majiquẽna anigarãma na punaa.
To bairona na punaa mena caroaro ca-ãna jetore ca-bejepe ãa Jesúre ca-apiʉjarãre ca-jʉgo aniparãre.
7 Dio yere ca-rotirã ca-aniparã caroorije cá-átiquẽnare mani boo.
Ca-roti uwiorãre mani booquẽe.
Caroaro mena ca-rotirã macare mani boo.
Ca-punijini tuti pairãre mani booquẽe.
Ca-mecʉorijere ca-eti pairã quenare mani booquẽe Dio yere ca-rotiparãre.
To bairona aperãre ca-uwa pairãre mani booquẽe.
Caroorijere ca-paa wapatarãre mani booquẽe.
Caroa macaje macare ca-paa wapatarã macare mani boo Dio yere ca-rotiparãre.
8 To bairo quena aperã cá-aáteñarã na ca-ejaro caroaro na tʉpʉ ca-ani rotirãre mani boo.
Caroa átajere cá-áti wariñuunucurãre mani boo.
Caroaro áti ãnaje jetore ca-beje majirãre mani boo.
Cariape cá-ána,
Dio cʉ̃ ca-tʉjoorijere cá-ána,
caroorije cá-átibopere ca-tʉgooña yajio ocabʉtirã mani boo.
To bairo ca-bairã ñuubʉjama.
9 To bairi Jesucristo ye quetire nemoo cʉ̃ ca-buio rotiriquere,
cariape macaje jetore ca-buiorãre mani boo.
To bairo ca-bairãre mʉ ca-bejerã cariape macajere buio majigarãma.
Aperã ricati ca-buiorã quenare,
“To bairo me ãa,
oco bairo maca ãa cariape wame,”
na ĩi buio majiogarãma.
To bairo na ca-ĩiro ricati ca-buiorã maca ñuuquẽto na ca-tʉgooñari wamere buio janagarãma yua.
To bairona ca-ãnare caroarãre na ca-bejepe ãa Jesucristore ca-apiʉjarãre ca-jʉgo aniparãre.
10 Capaarã ãma topʉ ti poapʉ Creta yucʉ poapʉre cariape macajere ca-bai botiorã.
Ca-ĩitorije macare buioma.
Yoaro wadabana quena ca-ani majuurijere buioquẽema.
To bairona ca-ĩito wadarã aperã netoro to bairije ca-ñuuquẽtiere wadanucuma judío maja jicãarã.
11 Ca-buioya manipa wamere na buionucuma.
Ca-apiricaro tʉjoorijere jã ca-buiorije wapa apeye uniere manire na joato ĩirã,
buio teñatonucuma.
To bairo na ca-ĩitorije apiri jicã wiiri macana Jesú ye quetire ca-apibatana api janacõama yua.
To bairi nare ca-ĩitorijere ca-buio teñanucurãre na ca-buio jana rotipaʉ mʉ ãa,
Tito.
12 Jicãʉ na yaʉna cabero ca-baipere ca-buio jʉgoyeyei oco bairije na ca-ĩiñupʉ:
“Mʉjaa ati paʉ Creta yucʉ poa macana ca-ĩito pairã mʉja ãa.
Ca-ñuuquẽna mʉja ãa.
Ʉga pacabana quena mʉja majuuna mʉja paaquẽe,”
ca-ĩiñupʉ jicãʉ cʉ̃ yarãre ti poa macanare.
13 Cariape na ca-ĩiñupʉ Creta poa macanare.
To bairona bainucuma.
To bairi,
“Baiqueticõaña mʉjaa,”
seeto na ĩi buioya Tito,
Jesú ye quetire.
Cariape macaje jetore na apiʉjaato ĩi tutuaro na ĩi buioya.
14 Oco bairo na ĩi buioya:
“Judío maja cawatoa ca-ani wameri na ca-ĩi buiorijere apiqueticõaña.
Cariape macaje macare ca-bai botiorã na majuuna na ca-tʉgooñari wame na cá-áti rotirijere na apiʉjaqueticõaña,”
na ĩi buioya seeto topʉ Cretapʉ macanare.
15 Caroaro tʉgooñariquere ca-tʉgooñacõana caroaro áticõa aninucuma.
Diore ca-api nʉcʉbʉgoquẽna maca rooro ca-tʉgooñanucurã aniri caroorije jeto átinucuma.
Na ca-tʉgooñarijepʉ caroorije jeto tʉgooñanucuma.
Ca-ñuurije macare tʉgooña majiquẽema.
16 “Diore ca-majirã jã ãa,”
ĩibana quena caroorije átinucuma.
To bairo rooro na cá-átinucurijere tʉjʉrã,
“Ca-ĩitorã ãma,
Diore ca-majirã me ãma,”
mani ĩi maji.
Dio cʉ̃ ca-boorijere ca-bai botiorã ãma.
Na majuuna na ca-boorijere Dio cʉ̃ ca-tʉjooquẽtie jetore átinucuma.
Caroa macare áti majiquẽema.