La enseñanza sana
2
Mʉ maca,
Tito,
Jesú ye queti majuure cariape macaje jetore buioya.
2 Cabʉcʉrã to macana caʉmʉare oco bairo na ĩi buioya:
“Caroaro tʉgooña maja catíya.
Caroaro ája,
aperã caroaro mʉjaare na ĩi tʉgooñaato ĩirã.
Caroa macaje átajere beje majiña.
Cariape Jesú ye jetore apiʉjaya,
cariape macaje jetore.
Diore cʉ̃ nʉcʉbʉgoya.
Cʉ̃ yarã quenare to bairona na nʉcʉbʉgoya,
na átinemori.
Diore apiʉja janaquẽja,
popiye mʉja ca-bairije to ca-anibato quena.”
To bairona na buioya to macana cabʉcʉrã caʉmʉare.
3 Cabʉcʉrã romiri to macana quenare oco bairo na ĩi buioya:
“Caroarã,
Dio cʉ̃ ca-boorore bairo jeto anicõaña.
Caroorije aperãre na ĩi buio batequeticõaña.
Eti cumuqueticõaña.
Caroa jetore na áti majioña aperãre.
4 Cawamarã romirire caroa jetore na cá-áti ani majipere na buioya,”
na ĩiña cabʉcʉrã romiri macare.
To bairi cawamarã romiri maca na manapʉare caroaro nare na maiato,
na punaa quenare.
5 Caroa átajere na beje majiato cawamarã romiri.
Caroorije cá-áti eperã na aniqueticõato.
Na yere caroaro na paacõa aninucuato.
Aperãre na mai tʉjʉri caroaro nare na átinemocõa aninucuato.
Na manapʉare nare na áti nʉcʉbʉgocõa aninucuato.
To bairona caroaro na anicõato cawamarã romiri.
Cabʉcʉrã romiri macare,
“To bairo caroaro na ca-baipere na majioña cawamarã romirire,”
na mʉ ĩigʉ Tito.
Nare na ca-majioquẽpata caroaro ani majiquetiborãma.
To bairi aperã maca ñuuquẽto na cá-átiere tʉjʉrã na wada paiborãma.
“Dio ye quetire na ca-buionucurije ñuuquẽe,”
ĩi wada paiborãma.
To bairi,
“Cawamarã romiri caroaro na ca-anipere na majioña,”
na mʉ ĩigʉ cabʉcʉrã romiri to macanare.
6 To bairona caʉmʉa cawamarã,
“Mʉja quena caroa macare mʉja cá-áti anipere beje majiña,”
na ĩi buioya,
Tito,
na quenare.
7 Mʉ majuuna caroa átajere na áti majiocõa aninucuña,
Tito,
cawamarãre.
To bairo caroa mʉ cá-áto tʉjʉrã,
“Mani quena Titore bairo caroaro mani áti anigarã,”
ĩi tʉgooñagarãma yua.
Jesú ye quetire buioʉ cariape jeto buioya.
Ricati ape wame buioqueticõaña.
Caroaro nʉcʉbʉgorique mena cariape buioya.
8 To bairo cariape Jesú ye quetire nʉcʉbʉgorique mena mʉ ca-buioro aperã ca-booquẽna maca,
“Caroorije ĩinucuma Jesú yere ca-buio teñarã,”
manire ĩi wada pai majiquetigarãma.
Na majuuna tʉgooña bobogarãma yua.
9 Oco bairo na ĩi buioya aperãre paabojari majare:
“Mʉja ʉparã nipetiro mʉjaare na cá-áti rotirijere caroaro ája.
Nare jã cá-átibojarije na tʉjʉ wariñuato ĩirã,
caroaro paaya.
Na ca-ĩri wamere na boca wada canamuqueticõaña.
10 Mʉja ʉparã ye apeye uniere jee rutiqueticõaña.
Caroa macare ája,
mʉja ʉparã,
‘Caroarã majuu ãma jã paabojari maja,’
mʉjaare na ca-ĩi tʉjʉ wariñuu nʉcʉbʉgoparore bairo ĩirã.
To bairo caroaro mʉja ca-bairo mʉja ʉparã,
‘Dio ye queti ca-ñuurije ãno.
Mani paabojari maja tiere apiʉjari caroaro átinucuma,’
mʉja ĩigarãma.
To bairona caroaro tʉgooñagarãma Jesúre,
manire ca-netooricʉre.”
To bairo na ĩi buioya,
Tito,
aperãre paabojari majare.
11 Mani Pacʉ Dio camaja nipetirã manire ca-mai tʉjʉyupi.
Mani mai tʉjʉri cʉ̃ Macʉre ca-jooyupi,
caroori paʉpʉ mani cá-aábopere nare cʉ̃ netoobojaato ĩi.
12 To bairi cʉ̃ ca-tʉjoorije jetore mani cá-áticõa aninucupere boomi Dio.
Caroorije,
ati yepa macana cʉ̃re ca-nʉcʉbʉgoquẽna maca caroorije na cá-átiganucurije uniere mani cá-átiquetipere boomi.
“Caroa wame macare yʉ átigʉ,”
mani ca-ĩi beje majipere boomi Dio.
Ca-ñuurijere Dio cʉ̃ ca-boorije cá-ána mani ca-anipere boomi Dio.
Ati yepapʉ mani ca-ani rʉmʉri cõona to bairo caroarã jeto mani ca-anipere boomi Dio.
13 To bairi mani Ʉpaʉ majuu Jesucristo,
caroorije manire ca-netoobojaricʉ cʉ̃ ca-tunu atípere mani yuugarã.
Cʉ̃ mena mani ca-anicõa aninucupere mani tʉgooña cote wariñuu yuugarã.
Seeto cʉ̃ ca-ajiya baterije mena tunu atígʉmi Jesú.
14 Jesucristo cʉ̃ majuuna manire ca-bai yajibojayupi caroorije mani cá-átie wapa.
Yʉ yarã majuu,
ca-ñuurije macare cá-átigarã na ãmaro ĩi,
mani cá-átibojayupi Jesucristo.
15 To bairi tiere na ĩi buionucuña,
Tito to macanare.
Tutuaro to bairijere na áti ocabʉti rotiya.
To bairo cá-áti ocabʉtiquẽnare oco bairo na ĩiña:
“Rooro mʉja áa.
Cariape macaje macare ája,”
na ĩi buionucuña.
To bairona na ca-ĩi rotipaʉna mʉ ãa mʉa.
To bairi nʉcʉbʉgorique mena na ĩi buioya,
“Ca-roti majiquẽcʉ ãmi,”
mʉre na ca-ĩiquetiparore bairo ĩi.