LA CARTA DEL APÓSTOL SAN PABLO A
FILEMÓN
Pablo escribe a Filemón
1
Yʉ Pablo ati pũuro jʉgori petoacã mʉ yʉ queti joo mʉre,
Filemón.
Jesucristo ye quetire yʉ ca-buio teñarique wapa presopʉ yʉ jooma.
To bairi presopʉ ãcʉ̃ mʉ yʉ uca joo ati pũuro.
Yʉ,
mani yaʉ Timoteo quena mʉre jã queti joo.
Mʉ quena jãare bairona Jesú ye quetire ca-buionemoʉ mʉ ãñupa.
To bairi seeto mʉre jã mai.
2 Mʉ ya wiipʉ Jesú yere ca-neñapo buerã na quenare ati pũuropʉna na yʉ queti joo.
Mani yao quenare,
Apia ca-wamecʉco quenare cõ yʉ queti joo.
Arquipo quenare cʉ̃ yʉ queti joo.
Arquipo maca popiye cʉ̃ to ca-anibato quena jãare bairo Jesú ye quetire buionucumi.
To bairi mʉja ca-ano cõona mʉjaare yʉ uca joo ati pũurore.
3 Mani Pacʉ Dio caroaro ani wariñuurique mʉjaare cʉ̃ joato.
Mani Ʉpaʉ Jesucristo to bairona caroare mʉjaare cʉ̃ joato.
El amor y la fe de Filemón
4-5 Mani yarã mʉ tʉ cá-atána yʉ queti buioma caroaro mʉ cá-áti aniere.
“Filemón Jesucristore caroaro tʉgooña nʉcʉbʉgonucumi.
Aperãre ca-maii ãmi.
Jesú yarã nipetirã na quenare to bairona nare mai majuucõami,”
yʉ ĩi queti buioma mʉ tʉ cá-atána.
To bairi mʉ ca-aniere yʉ tʉgooña wariñuu.
To canacã rʉmʉ Diore,
“Ñuu majuucõa Filemón cʉ̃ ca-anie,”
cʉ̃ yʉ ĩinucu.
6 “Filemón Diore ca-apiʉjarãre na cʉ̃ ca-queti buioro caroaro na api majiato,”
Diore mʉ yʉ ĩi jenibojanucu.
“Jesucristo caroa cʉ̃ ca-joorijere Filemón na cʉ̃ ca-buioro nipetiro caroaro na majiato,”
mʉ yʉ ĩi jenibojanucu Diore.
7 Jesúre ca-apiʉjarãre caroaro na mʉ mai.
Caroaro na mʉ ca-mairo tʉjʉrã seeto yeri wariñuuma naa.
To bairi,
yʉ baire bairo ca-ãcʉ̃,
seeto yʉ wariñuu to bairo caroaro mʉ ca-aniere tʉgooñari.
Pablo pide un favor para el esclavo Onésimo
8-12 To bairo ca-baii mʉ ca-ano ape wame mʉ cá-átipere mʉre yʉ buiopa.
Onésimo,
mʉ paabojari majocʉ,
mʉre cá-aáweoricʉ atopʉ ãmi.
Yucʉacã cʉ̃ yʉ tunu aá roti mʉ tʉpʉ tunu.
Topʉ cʉ̃ ca-ejaro caroaro cʉ̃ boca tʉjʉya.
“¿Nope ĩi mʉ ca-rutirí?”
cʉ̃ mʉ ĩi tutiquẽpa.
Yʉ Pablo cabʉcʉ,
Jesucristo ye quetire buio teñari majocʉ yʉ ãa,
Jesú cʉ̃ ca-rotii.
To bairo ca-ãcʉ̃ yʉ ca-ano,
caroaro yʉre api nʉcʉbʉgogʉmi ĩi atiere mʉ yʉ buio mʉ cá-átipere.
Tutuaro mena mʉ yʉ ĩiquẽe.
Caroaro mena maca mʉ yʉ roti.
Onésimore mʉ paabojari majocʉre caroaro cʉ̃ boca tʉjʉya.
Yʉ ca-buiorijere caroaro apiʉjami.
Yucʉ Jesucristore tʉgooña ocabʉtimi.
To bairi yʉ macʉre bairo ca-ãcʉ̃ ãmi yucʉra.
Tirʉmʉpʉre Onésimo caroaro mʉ ca-paabojaquẽmi.
Yucʉra caroaro mʉ paabojagʉmi.
Yʉ quenare caroaro átinemonucumi.
To bairi Onésimore cʉ̃ yʉ tunu aá roti mʉ tʉpʉ.
Caroaro cʉ̃ boca tʉjʉya seeto yʉ ca-maiire.
13 To bairo cʉ̃re tunu aá rotibacʉ quena Onésimore cʉ̃ yʉ boobapa atopʉre yʉ mena,
yʉre cá-átinemopaʉ ĩi.
Presopʉ yʉ ca-ano caroaro yʉ átinemonucumi.
Mʉna yʉre mʉ cá-átinemoborore bairona ácʉ caroaro majuu yʉ átinemonucumi.
14 To bairo atopʉre cʉ̃ ca-tua pe boobacʉ quena Onésimore,
“Yʉ tʉpʉ tuaya,”
mʉ jeniquẽcʉna cʉ̃ yʉ ĩi majiquẽe.
To bairi mʉ tʉpʉ cʉ̃ yʉ tunu aá roti.
To bairi mʉ tʉpʉ Onésimo cʉ̃ ca-ejaro mʉ ca-booata cʉ̃ mʉ tunu aá rotigʉ yʉ tʉpʉre tunu.
Pablore cʉ̃ átinemoato ĩi,
cʉ̃ mʉ tunu aá rotigʉ.
15-16 Tirʉmʉ bʉjaacã mʉre ca-rutiricʉ anibacʉ quena yucʉ mʉ tʉpʉ tunu aágʉmi tunu.
Mʉ ruti weoquetigʉmi yua.
Jesú ye quetire ca-apiʉjaʉ aniri mani baire bairo ca-ãcʉ̃ ãmi.
Yʉ ca-maii ãmi Onésimo.
To bairi cʉ̃re yʉ ca-mairo netoro mʉ maca cʉ̃ mʉ mai netogʉ yucʉra.
Mʉ paabojari majocʉ anibacʉ quena mʉ baire bairo ca-ãcʉ̃ anicõa anigʉmi.
17 To bairi,
Pablo yʉ yaʉ,
yʉ ca-maii ãmi ĩi,
Onésimore caroaro cʉ̃ boca tʉjʉya.
Yʉ mʉ ca-boca tʉjʉborore bairona caroaro cʉ̃ boca tʉjʉya.
18 Caroorije mʉre cʉ̃ cá-áti majuucõarique to ca-ãmata yʉ maca mʉ yʉ wapayegʉ.
Mʉre cʉ̃ ca-wapamoata quena mʉ yʉ wapayegʉ yʉ majuuna.
19 Yʉ majuuna yʉ uca joo atiere.
To bairi jocʉ mee yʉ ĩi.
Onésimo apeye uniere mʉre cʉ̃ ca-wapamoata cʉ̃ yʉ wapaye peocõabojagʉ.
Nemoona Jesú ye quetire mʉ yʉ ca-buiowʉ.
Yʉ ca-buioquẽpata tiere apiquẽcʉna caroorã ya paʉpʉ cá-aápaʉ mʉ aniboricʉ.
To bairi tie caroa majuure mʉ yʉ ca-buioriquere wapa ca-wapamoʉre bairona mʉ bai.
To bairo mʉ ca-anie to ca-anibato quena,
“Yʉ mʉ wapamo,”
yʉ ĩiquẽe.
20 Filemón,
yʉ yaʉ,
Diore ca-apiʉjaʉ mʉ ãa.
To bairi mʉ yʉ ca-ĩirore bairo ája.
Onésimore caroaro cʉ̃ boca tʉjʉya,
caroaro Pablo cʉ̃ wariñuu tʉgooñaato ĩi.
21 Yʉ ca-boorijere átigʉmi Filemón,
mʉre ĩi tʉgooñari atiere mʉ yʉ uca joo.
Cʉ̃ yʉ ca-ĩrije netoro átigʉmi,
mʉ yʉ ĩi tʉgooña.
22 Apeye tunu,
mani Pacʉ Diore yʉre mʉ ca-jenibojanucuri wamere cʉ̃ apiato Dio.
To bairi yʉ buugarãma,
yʉ tʉgooña.
To bairi mʉ tʉpʉ yʉ ca-ejaparore quenoo yuuya.
Saludos y bendición final
23 Mʉ ñuu rotimi Épafra.
Cʉ̃ quena yʉ mena presopʉ ca-ãcʉ̃ ãmi,
cʉ̃ quena Jesucristo yere cʉ̃ ca-buio teñarique wapa.
24 Marco,
Aristarco,
Demas,
Lucas mʉ ñuu rotima na quena.
Jesucristo ye quetire yʉre ca-buionemorã ãma na quena.
25 Mani Ʉpaʉ Jesucristo caroa yeri wariñuuriquere mʉre cʉ̃ joato.
To cõona ãa.