Deberes de los creyentes
3
Apeye na ĩi buionemoña Jesucristore ca-apiʉjarãre.
Caroaro na cá-áti majiparore bairo oco bairije na ĩi buioya,
Tito:
Maca ʉparã,
gobierno macanare caroaro na apiʉjaya.
Aperã quenare nipetiro caroa wamerire na átinemocõa aninucuña.
2 Aperãre rooro na wada paiqueti majuucõaña.
Aperã mena na ame ĩi wada canamuqueticõaña.
Caroaro na mena ãña.
Camaja nipetirã mena ĩi daque buionucuña.
To bairije na ĩi buioya to macanare,
Tito.
3 Mani quena tirʉmʉpʉ Dio yere ca-tʉgooña majiquẽna mani ca-anibapʉ.
Dio cʉ̃ ca-rotirijere mani cá-átiquetinucuwʉ.
Cariape mani ca-tʉgooñaquẽpʉ.
Mani majuuna ca-ñuuqueti wamerire mani cá-átigarijere átinucubana caroorijere mani cá-áti jana majiquẽpʉ.
Rooro aperãre mani cá-áticõa aninucuwʉ.
Aperã yere tʉjʉ ʉgoo,
ame tʉjʉgatee,
ame tuti ca-bairã mani ca-aninucubapʉ.
4-5 To bairo roorije mani ca-ãnaje cʉtibato quena mani ca-mai tʉjʉyupi Dio.
Mani mai tʉjʉri caroori paʉ majuupʉ cá-aáboricarãre manire ca-netoowĩ.
Mani majuuna caroa mani cá-átie wapa mee mani ca-netoowĩ.
Cʉ̃ majuuna mani mai tʉjʉri manire ca-netoowĩ.
Ʉgueri coje reericarore bairona caroorije mani cá-átiere rei mani ca-netoo catíowĩ.
Caroarã maca cawamarãre bairona mani ca-ano manire ca-wajoawĩ.
To bairo ácʉ cʉ̃ Espíritu Santo jʉgori cawama yericʉna ca-aniparãre manire ca-wajoawĩ caroa ca-anie macare mani cá-áti aninucuparore bairo.
6 Jesucristo manire ca-netooricʉ jʉgori manire ca-joo netowĩ Dio cʉ̃ Espíritu Santore.
7 To bairi mani mai tʉjʉri,
“Caroorije mana ãma,”
mani ĩi tʉjʉmi Dio yua,
Jesucristo manire cʉ̃ ca-bai yajibojaro ĩi.
To bairo,
“Caroorije mana ãma,”
manire ĩi tʉjʉri cʉ̃ mena to canacã rʉmʉ ca-anicõa aninucuparãre manire ca-cũuñupi.
To bairi cʉ̃ tʉpʉ mani ca-anicõa aninucupere mani tʉgooña wariñuu yua.
8 Cariape atie quetire mʉ yʉ buio,
Tito.
To bairi atie mʉ yʉ ca-queti buio joorijere caroaro na buio apioya seeto Diore ca-apiʉjarãre.
Caroa na áticõa aninucuato ĩi na ĩi buioya.
Caroa macaje majuu jetore na cá-átipere mʉ yʉ queti buio joo.
9 Cawatoa macajere ca-wadarãre na apiquẽja.
Camaja ca-ani jʉgoricarã ãnana na wamerire yoaro cõoñariquere wadama.
Moisé tirʉmʉpʉ macacʉ cʉ̃ ca-rotirique quenare ame wada netonucuma.
Ñeere cá-átipe me ãa na ca-ame ĩi wada netorije.
To bairi nare bairo ti uniere ame ĩi wada netoqueticõaña.
Na apiqueticõaña.
10 Nii nare bairona ca-ĩi wada netoʉ ucʉ̃ mʉja mena cʉ̃ ca-ãmata caroaro cʉ̃ ĩi buioya.
“Jã ca-tʉgooña ricawati wada netoro átiqueticõaña,”
cʉ̃ ĩiña.
Jicãni o pʉgani cʉ̃re mʉ ca-buiobato quena cʉ̃ ca-apigaquẽpata,
“To cõona,
jã mena aniqueticõaña,”
cʉ̃re mʉ ĩigʉ.
11 “Ca-ñuuquẽtie jetore tʉgooñabacʉ caroorije cá-áti paii ãmi,”
cʉ̃ mʉ ĩi tʉjʉ majigʉ.
Cʉ̃ majuuna ape wame cʉ̃ ca-buionucurije wapa cʉ̃ popiyeyegʉmi Dio.
To bairi to bairona ca-ĩi wada neto paii ucʉ̃re mʉ buugʉ.
Instrucciones personales
12 Yucʉacãre Artema ca-wamecʉcʉre cʉ̃ joʉ o Tíquico macare cʉ̃ joʉ yʉ joogʉ mʉ tʉpʉ.
Cʉ̃ ca-ejaro beroacã yoaro mee mʉ apá.
Nicópoli na ca-ĩri macapʉre yʉ anigʉ.
Topʉ yʉ anicõagʉ ati puere.
To bairi topʉ Nicópolipʉ yʉre mʉ tʉjʉ apá.
13 Senas ca-wamecʉcʉ ʉparã na ca-rotirijere ca-buenucuʉ,
Apolo ca-wamecʉcʉ mena na cá-aáteñapere na átinemoña.
Jesú ye quetire na ca-buio teñaparore bairo nipetiro na ca-boopere na jooya.
14 Ape wame quena Cretapʉ macana mani yarãre,
“Caroaro paarique cʉja,”
na ĩi buioya.
To bairo na ca-jʉ paanemoro caroaro aperãre cá-átinemocõana anigarãma na quena.
Saludos y bendición final
15 Yʉ mena atopʉ ca-ãna nipetirã ñuu rotima.
To macana mani yarã Jesúre ca-apiʉjarã caroaro na ñuato.
Mani Pacʉ Dio caroare mʉjaare cʉ̃ joato.
To cõona ãa.