4
Timoteo yʉ yaʉ,
mʉ cá-átipere nʉcʉbʉgorique mena caroaro mʉre yʉ buio.
Dio cʉ ca-tʉjʉro,
Jesucristo quena cʉ ca-tʉjʉro mʉre yʉ buio.
Mani Ʉpaʉ Jesucristo camaja ca-catírãre,
ca-riaricarã quenare na tʉjʉ bejei acʉ́ atígʉmi.
Caʉpaʉ majuu anigʉmi.
2 To bairi mʉ maca tiere tʉgooñari Dio ye quetire buiocõa aninucuña to cãnacã rʉmʉ.
Ca-apigarãre,
ca-apigaquẽna quenare na buioya.
Camaja caroorije na cá-átiere na majioña.
“To bairije átiqueticõaña,”
na ĩña.
“Ocõo bairo maca cá-átipe ãa,”
na ĩña.
Tʉgooña uwaquẽcʉna caroaro mena na buiocõa aninucuña.
3 Ape rʉmʉ camaja cariape quetire ca-apigateerã anigarãma.
Na majuuna na ca-api tʉjoorijere apigarã ricati nare ca-jʉgo bueparãre macagarãma.
To bairo na cá-áto capaarã ricati nare ca-jʉgo buerã anigarãma,
na ca-apigarijere ca-buiorã maca.
4 To bairi nare ca-buerã ricati jetore na ĩi buiori,
cariape macajere na ca-apigateero roque na átigarãma.
To bairo na cá-áto ca-ñuuquẽtie jetore apiʉjagarãma.
5 Mʉ maca Timoteo,
maja catíri caroaro tʉgooñaña.
Nare bairo rooro mʉ aniquetigʉ mʉa.
To bairi popiye tamʉobacʉ quena cariape Jesu ye quetire bairo buio teñacõa aninucuña.
Mʉ ye paarique Dio mʉre cʉ cá-áti rotiriquere áti peocõaña.
6 Yʉ ca-bai yajiparo,
meere ejagaro bai.
Dio yere yʉ cá-átaje wapa yʉre jĩagarãma.
Petoacã rʉja yʉre na ca-jĩaparo.
7 Ca-atʉrã,
aperãre atʉ netogarã seeto majuu na ca-ocabʉtirije mena na cá-átore bairona ocabʉtiri yʉ cá-ápʉ́ yʉ paariquere.
Dio yʉre cʉ cá-áti rotiriquere yʉ áti yaparo tʉga.
Jesure yʉ ca-tʉgooña nʉcʉbʉgorijere yʉ janaqueti majuucõa.
8 To bairi Dio yʉre cʉ ca-joope caroare cʉgo yuʉmi yua.
To bairi mani Ʉpaʉ cariape ca-tʉjʉ bejei maca cʉ ca-tunu ejari rʉmʉ ca-ãno tiere yʉ joogʉmi yua.
Aperã quenare to bairona na joogʉmi.
Nipetirã cʉ̃re ca-nʉcʉbʉgorã,
cʉ ca-tunu atípere ca-yuu tʉgooñarã quenare caroare na joogʉmi.
Instrucciones personales
9 Timoteo,
mʉ ca-ocabʉtiro cõo yoaro mee yʉre tʉjʉ ajá.
10 Demas yʉ mena ca-anibatacʉ yʉre cá-aáweocoami,
ati yepa macajere boobacʉ.
Jesu ye netobʉjaro boomi ati yepa macaje macare.
Tesalónica na ca-ĩri macapʉ cá-aácoami.
Cresente maca Galacia na ca-ĩiropʉ cá-aácoami.
Apeĩ,
Tito ca-wamecʉcʉ Dalmacia na ca-ĩiropʉ cá-aácoami.
Aperãre Jesu ye quetire buio teñarã aána cá-aácoama na maca,
Cresente,
Tito yua.
11 To bairi Lucas jeto yʉ mena tuami mai.
To bairi Timoteo,
yoaro meebʉja mʉ apá.
Marco mena pʉgarã mʉja apá.
To bairi Marco maca yʉ átinemogʉmi.
12 Tíquicore cʉ yʉ ca-joowʉ Efeso macapʉ.
13 Mʉ maca acʉ́ camisa ca-pairo ca-bui macatore mʉ neapá.
Troa na ca-ĩri macapʉ,
Carpo ya wiipʉre yʉ ca-cũurajawʉ.
Yʉ papera tunuari quenare,
apeye papera pũuri quenare mʉ jee apá.
Papera pũuri macare mʉ majiritiquẽpa.
Tie roquere yʉ boo majuucõa.
14 Apeye tunu Alejandro ca-wamecʉcʉ comee mena ca-paa quenoori majocʉ rooro majuu yʉ ca-ami.
To bairi rooro yʉre cʉ cá-átato cõo cʉ popiyeyegʉmi mani Ʉpaʉ Dio.
15 Caroaro cʉ mʉ tʉjʉ majiwã.
Rooro mʉ átiremi mʉ quenare.
Mani ca-queti buiorijere ca-mata paii ãmi cʉ̃a.
16 Nemoona Ʉparã tʉpʉ yʉre na ca-jeniñarijere jĩcaʉ maca yʉ ca-ĩi buionemoquẽmi yʉ ca-bairiquere.
Nipetirã yʉ mena ca-anibatana yʉre ca-buti aáweocoama.
To bairo yʉre na cá-aáweoriquere cʉ majirioato Dio.
17 To bairo yʉ mena ca-anibatana yʉre na ca-buti aáweorique to ca-anibato quena,
mani Ʉpaʉ Dio maca yʉ cá-aáweoquẽmi.
Tʉgooña ocabʉtiriquere yʉ ca-joowĩ.
Jesu ye quetire caroaro yʉ ca-queti buio peoparore bairo ĩi yʉ cá-átinemowĩ Dio.
Judío maja ca-aniquẽna quenare na yʉ ca-queti buio peoparore bairo ĩi,
to bairo yʉ cá-átinemowĩ.
To bairo yʉre cʉ cá-átinemoro jʉgori yʉre ca-jĩa roti majiquẽma.
Yaia camajare ca-ʉga reerãre bairo ca-ãna anibana quena yʉ ca-jĩa roti majiquẽma,
Dio nare cʉ ca-mataro.
18 To bairi nipetiri wame rooro yʉre na cá-átigaro quenare yʉre matabojagʉmi Dio.
Caroaro yʉre cotei ca-bero ʉmʉrecoopʉ cʉ ca-ani paʉpʉ yʉre ne aágʉmi yʉ Ʉpaʉ Dio.
To bairi Diore mani áti nʉcʉbʉgocõa aninucugarã.
Saludos y bendición final
19 Aquila,
cʉ nʉmo Prisca,
na ñuato.
Onesíforo cʉ ya wii macana quena na ñuato.
20 Erasto Corinto macapʉ ca-tuawĩ.
To bairi Trófimo ca-riaʉpʉre cʉ yʉ ca-cũwʉ Mileto macapʉre.
21 Mʉ ca-ocabʉtiro cõo pue ca-ejaparo jʉgoye mʉ apá.
Yoaro mee mʉ apá.
Mʉ ñuu rotimi Eubulo.
Pudente,
Lino,
Claudia ñuu rotima na quena.
Nipetirã ato macana Jesure ca-apiʉjarã quena ñuu rotima.
22 Mani Ʉpaʉ Jesucristo mʉ mena cʉ ãmaro.
Caroa yeri wariñuurique mʉre cʉ joato Dio.
Mʉ mena macana quenare caroare cʉ joato.
To cõona ãa mʉre yʉ ca-uca joorije.