Unidos por el Espíritu
4
Yʉa mani Ʉpaʉ Jesú ye quetire yʉ ca-buio teñarije wapa presopʉ ca-tamuoʉ oco bairo mʉjaare yʉ ĩi buio:
Dio cʉ̃ ya poa macana cʉ̃ ca-bejericarã aniri caroaro cʉ̃ ca-boorore bairo anicõaña mʉjaa.
2 “Aperã netoro ca-ãcʉ̃ yʉ ãa,”
ca-ĩi tʉgooñarã aniqueticõaña.
Caroaro aperãre na buioya.
Aperã rooro mʉjaare na cá-átibato quena rooro na áti amequeticõaña.
Ame mairi aperã ñuuquẽto na cá-átibato quena na tutiqueticõaña.
3 Dio Espíritu Santo cʉ̃ ya poa macana mena,
mani mena cʉ̃ ca-ano jicãʉ punaare bairona ca-aniparã mani ãa.
To bairi aperã Diore ca-apiʉjarã mena caroaro ãña.
4 Cʉ̃re ca-apiʉjarã jicã poa macanare bairona mani ãa.
Jicãʉna ãmi Dio Espíritu Santo mani mena ca-ãcʉ̃.
Dio cʉ̃ ca-bejericarã mani ãa.
To bairi jicã wamerena ca-tʉgooña yuuparã mani ãa,
caroaro Dio mena mani ca-anipere.
5 Jicãʉna ãmi mani Ʉpaʉ.
Jicã wamerena caroa quetire mani apiʉja nʉcʉbʉgo,
cʉ̃ ye quetire.
Jicã wamerena tʉgooñarã,
“Jesúre yʉ apiʉja,”
ĩirã mani ca-bautisa rotiwʉ.
6 Jicãʉna ãmi Dio mani Pacʉ nipetirã manire ca-rotii,
mani mena ca-ãcʉ̃.
7 To bairo to ca-baibato quena Cristo mani cá-áti majipa wame mani joomi cʉ̃ ca-joogari wameri cõo.
To bairi mani nipetirã to canacãʉrena mani joomi Cristo ricati wameri mani cá-áti majipa wamerire.
Cristo cʉ̃ ca-boorore bairona ricati áti majirica wamerire mani joomi.
8 To bairona ĩi ucarique ca-añupa Dio Wadariquepʉ Jesucristo cʉ̃ ca-anipere,
oco bairi wame:
Jõ buipʉ tunu aácʉ capaarã Sataná cʉ̃ ca-ñeebatanare Jesucristo maca cʉ̃ ca-cʉgoparãre na jee aágʉmi.
Nare cʉ̃ yarãre caroaro cá-áti majipa wameri quenare na joogʉmi,
ĩi ucarique ca-añupa Dio Wadarique ca-ani tutipʉre.a
9 To bairi ti wame,
“Jõ buipʉ tunu aácʉ,”
Cristo cʉ̃ ca-bairique Dio Wadarique to ca-ĩri wame apirã oco bairo mani ĩi maji:
“Jõ buipʉ ʉmʉrecóopʉ ca-ãnacʉ ati yepapʉ ejaricʉmi.
To bairi ati yepapʉ buiaʉ ca-bopacoʉre bairo ca-baiyupi,”
mani ĩi maji,
cʉ̃ ca-tunu aátajere queti apirã.
10 To bairi ati yepapʉ camajocʉ ca-buiaricʉ majuu jõ buipʉ nipetirijere rotigʉ ca-tunu wamʉcoajupi.
To bairi cʉ̃ majuuna ati ʉmʉrecóo nipetirije Ʉpaʉ ãmi.
11 To bairi to canacãʉrena cʉ̃re ca-apiʉjarãre na joomi Cristo ricati wamerire,
na áti majiato ĩi.
Jicãarãre apóstol majare na cũumi.
Aperãre,
Dio ye quetire na buio majioña ĩi na cũumi.
Aperãre,
Jesú ye quetire caroa quetire buio teña majioña ĩi na joomi.
Aperãre cʉ̃re ca-apiʉjarãre,
“Caroaro mani anigarã,”
na ca-jʉgo ĩiparãre na joomi Cristo.
Aperã tunu nare Dio Wadariquere na ca-ĩi bueparãre na joomi Cristo.
12 To canacãʉna cʉ̃re ca-apiʉjarã ricati áti majiriquere mani joomi Cristo.
To bairo cʉ̃ ca-jooro ricati mani ame átinemo maji,
cʉ̃ ya poa macana nipetirã cʉ̃ ca-boorore bairona mani ca-ani nutuaparore bairo.
13 To bairo ãnaa mani nipetirã to bairo jetona Dio ye quetire apiʉja nʉcʉbʉgori cʉ̃ Macʉ Cristore caroaro cʉ̃ majirã,
caroaro ca-tʉgooña majirã,
caroaʉ majuu cʉ̃ ca-anore bairo ca-ãna mani anigarã mani quena.
14 To bairi cawimarã na ca-tʉgooña ajurore bairo mani aniquetigarã.
Aperã ape wame ricati,
“Oco bairo ãa Dio ye queti,”
na ca-ĩitori wame na ca-ĩi buioro nare mani apiʉjaquetigarã.
“Caroaro tʉjoori wame na mani buiogarã,”
ca-ĩitorã na ca-anibato quena na mani apiʉjaquetigarã.
15 Cariape macaje jetore api nʉcʉbʉgori tiere mani mena macanare mani ame buiogarã,
ame mairi.
To bairo caroa macaje ame buiori mani Ʉpaʉ Cristo caroaʉ cʉ̃ ca-anore bairo mani ani ʉja aágarã.
16 Cristo ya poa macana mani ca-ano to canacãʉna mani cá-áti majipa wamerire mani ca-cũuñupi Cristo.
To bairona camajocʉ rupaʉre bairona to canacã wame to cá-áti wame mena áti majimi.
To bairona Cristo ya poa macana aniri ame mairi to canacãʉna mani ame átinemogarã,
mani cá-áti majiri wamere áticõari.
To bairi mania Cristo ya poa macana cʉ̃ ca-boorore bairo mani nipetirã caroaro mani ani nutuagarã.
La nueva vida en Cristo
17 To bairi mani Ʉpaʉ Jesucristo,
“Oco bairo na ĩi buioya,”
yʉre cʉ̃ ca-ĩi rotiro mena oco bairo mʉjaare yʉ ĩi buiopa:
Ca-jʉgoyepʉ Diore ca-majiquẽna ãnapʉ mʉja ca-anibatatore bairo,
Diore ca-majiquẽnare bairo aniqueticõaña yucʉra.
Na majuuna na ca-tʉgooñari wame cawatoana átinucuma Diore ca-majiquẽna maca.
To bairi ñee unie mano áticõa aninucuma,
caroare ca-tʉgooña majiquẽna aniri.
18 Na majuuna Diore booquetiri cʉ̃re majiquẽema.
To bairi Dio cʉ̃ ca-boorore bairona ca-ãna me ãma.
19 Bobo majiquetiri seeto rooro áti epenucuma.
To bairi to canacã wame caroorije na cá-átinucurijere boo netocõama.
20-21 Mʉja maca cariape wame caroa quetire aperã mʉjaare na ca-majioro mʉja ca-apiʉjayupa.
To bairi Jesucristo ye quetire apirã,
“Diore ca-majiquẽnare bairo ca-aniquetipe ãa,”
mʉja ĩi majiricarã.
22-23 Jesúre apiʉjagarã jʉgoye rooro mʉja tʉgooñanucuricarã.
“Caroaro yʉ anigʉ atie caroorije yʉ ca-boori wame yʉ cá-ápata,”
ca-ĩitorijere mʉja tʉgooñanucuricarã.
To bairona tʉgooñabana rooro mʉja ãnana.
To bairi tiere ca-jʉgoye rooro mʉja ca-tʉgooñabatajere reeri caroa macare tʉgooñaña yucʉra.
Cawama yeri ca-tʉgooñape ãa yucʉra.
24 Cariape ca-anie cʉ̃ ye quetire ca-apiʉjaricarã mʉja ca-ano cawama wame caroare ca-tʉgooñaparãre mʉja cá-ájupi Dio,
cʉ̃ ca-boorore bairo caroarã mʉja ca-aniparore bairo ĩi.
To bairi yucʉra cʉ̃ ya wame cʉ̃ ca-tʉgooñarore bairona tʉgooñaña mʉjaa.
25 To bairo tʉgooñari jocarãna ĩiqueticõaña.
Cariape jeto ame ĩi buioya,
jicã poa macana Jesú yarã mani ãa ĩirã.
26 Punijinirã,
caroorije átiquẽja.
Yoaro punijiniqueticõaña.
Yoaro mee mʉja ca-punijinirijere reya.
27 To bairo yoaro mʉja ca-punijini tʉgooñaata ricati caroorije mʉja cá-áto átiboʉmi Sataná.
To bairona mʉjaare cʉ̃ ca-jʉgo átipere cʉ̃ apiʉjaqueticõaña.
28 Ca-jee rutirã to cõona na jee ruti janacõato.
Na majuuna caroaro na paacõato,
apeye uniere cʉgogarã,
aperã ca-bopacoorã quenare na átinemogarã.
29 Caroorije wadaqueticõaña.
Ca-ñuurije macare ĩiña aperãre,
caroaro na ca-tʉgooña ocabʉtiparore bairo na quena.
Caroaro na ca-tʉgooña wariñuupa wamere bairo caroaro na ĩiña.
30 Dio cʉ̃ Espíritu Santore mʉja ca-jooyupi mʉja quenare,
yʉ yarã majuu ãma ĩi.
To bairo quena caroorã mena na yʉ ca-popiyeyebopere yʉ ca-netooparã ãma ĩri ca-jooyupi Dio cʉ̃ Espíritu Santore.
To bairi Dio Espíritu Santo cʉ̃ ca-tʉjooqueti wame átiquẽja.
To bairo mʉja cá-ápata tʉgooñarique paiboʉmi.
31 To bairi tʉgooña punijiniriquere reya.
Aperãre mʉja ca-tuti pairije quenare reya.
Ame wada paiqueticõaña.
Aperãre caroorijere buio batequeticõaña.
Na punijini tʉjʉtee átiqueticõaña.
32 Caroaro maca ca-ame jʉgo ãna anicõaña.
Ame mai tʉjʉya mʉjaa.
Aperã rooro mʉjaare na cá-átie to ca-anibato quena na cá-átajere majirioya.
Rooro mʉja na cá-átiere tʉgooñaquẽja.
Dio quena caroorije mani cá-átaje to ca-anibato quena manire ca-majiriobojayupi,
Cristo mani ye wapa cʉ̃ ca-bai yajibojarique jʉgori.
To bairi Dio mani ye wapa cʉ̃ ca-majirioricarore bairona mʉja quena aperã rooro mʉjaare na cá-átiere na majiriobojaya.