Salvos por el amor de Dios
2
Nemoopʉre caroorije jeto mʉja ca-tʉgooñanucubajupa.
To bairi ca-bai yajiricʉ ãnacʉ ca-ñuurije cʉ̃ cá-áti majiquẽtore bairona mʉja ca-baibajupa.
Caroa macajere mʉja cá-áti ani majiquẽjupa.
2 Aperã ati yepa macana Diore ca-tʉgooñaquẽnare bairona mʉja cá-áti aninucuñupa,
Sataná cʉ̃ ca-boorore bairona.
Cʉ̃a ati ʉmʉrecóopʉre caroorije ʉpaʉ ãmi Sataná.
To bairi Diore ca-apiʉjaquẽnare ca-rotii ãmi cʉ̃a.
3 To bairi mani quena nipetirã nare bairona caroorije cá-átinucurã mani ca-anibapʉ maja catíriquere Dio manire cʉ̃ ca-jooparo jʉgoye.
Caroorije mani cá-átigari wame jetore mani cá-átinucuwʉ.
Mani majuuna caroorije mani ca-tʉgooñari wame jetore mani cá-átinucuwʉ.
To bairi aperã Diore ca-bai botiorãre bairona mani ca-aninucuwʉ.
To bairona caroorã mani ca-ano maca Dio mani popiyeyeboricʉmi mani quenare.
4 To bairona cʉ̃ ca-popiyeyeboparã mani ca-anibato quenare seeto manire ca-mai tʉjʉyupi Dio.
Seeto camajare ca-bopaco tʉjʉʉ aniri seeto manire ca-maiñupi.
5 Caroorije mani cá-áti aninucurije wapa ca-yajiboparã mani ca-anibajupa.
Ca-yajiboparã mani ca-anibato quena manire joomi Dio cʉ̃ Macʉ Cristo mena macana mani ca-aniere.
To bairi manire cʉ̃ ca-mai tʉjʉrije jʉgori mani ca-netooñupi Dio manire cʉ̃ ca-popiyeyeboriquere.
6 Mani ca-netooñupi Dio Cristo manire cʉ̃ ca-bai yajibojarique jʉgori.
Manire cʉ̃ ca-bai yajibojaro bero cʉ̃ ca-tunu catíoyupi Dio cʉ̃ Macʉre.
To bairi mani quenare jõ buipʉ Cristo mena ca-rotiparãre mani ca-cũuñupi Dio.
To bairona manire ca-cũuñupi Dio,
Cristo mena macana na ãmaro ĩi,
ca-yajiboparã mani ca-anibato quena.
7 To bairo caroaro mani átibojari mani bero macanare ape yʉtea ca-aniparãre na iñoogʉmi Dio caroaro manire cʉ̃ ca-mai tʉjʉ netorijere.
To cõo seeto mani mai tʉjʉmi Dio,
Cristo manire cʉ̃ ca-riabojarique jʉgori.
8 Caroorije mani cá-átie wapa Dio manire cʉ̃ ca-popiyeyebopere mani netoomi Dio,
manire mai tʉjʉri.
Mani majuuna mani netoo majiquẽe.
Netoomi Dio Cristo manire cʉ̃ ca-bai yaji wapayebojariquere ca-tʉgooña nʉcʉbʉgorãre.
Dio maca mani netoomi caroorije mani cá-átie ca-wapaye majiquẽna mani ca-anibato quena.
9 Mani majuuna caroa wame átibana quena mani netoo majiquẽe Dio manire cʉ̃ ca-popiyeyeboriquere.
To bairi jicãʉ mácana,
“Yʉ majuuna caroare átiri yʉ netoowʉ.
Caroaʉ yʉ ãa yʉa,”
ĩi majiquẽcʉmi.
Mani majuuna caroarã mani ani majiquẽe.
10 Dio maca manire cá-ájupi caroarã Jesucristo mena ca-aniparãre.
Caroare mani cá-átiparore bairo ĩi Cristo mena ca-aniparãre manire cá-ájupi.
Ca-jʉgoyepʉna,
to bairona caroaro cá-ána na ãmaro ĩi,
manire ca-cũuñupi Dio,
mani ca-anipere tʉgooña jʉgoyeyeri.
La paz que tenemos por medio de Cristo
11-12 Judío maja mee mʉja ãa.
Israel macana ca-aniquẽna mʉja ãa.
To bairi judío maja,
Israel macana circuncisión cá-ána maca oco bairo ĩinucuma mʉjaare:
“Mani yarã me ãma,
circuncisión cá-átiquẽna aniri,”
mʉja ĩinucuma.
To bairi tirʉmʉpʉ mʉja ca-ãnajere tʉgooñaña mʉjaa.
Jesucristo yarã mʉja ca-aniquẽjupa mai cʉ̃re mʉja ca-apiʉjaparo jʉgoye.
Israel macana Dio cʉ̃ ca-bejericarã mena macana mʉja ca-aniquẽjupa.
To bairi,
“Caroaro mʉjaare yʉ átibojagʉ,”
camajare Dio cʉ̃ ca-ĩi cũurica wamere mʉja ca-majiquẽjupa.
To bairi,
“To canacã rʉmʉ Dio mena caroaro mani anigarã,”
mʉja ca-ĩi tʉgooña majiquẽjupa.
Diore ca-majiquẽna majuu mʉja ca-añupa mai.
13 To bairona ca-jʉgoyepʉ Diore ca-majiquẽna anibana quena Jesucristo mena macana mʉja ãa yucʉra.
To bairi mʉja quena cʉ̃ yarã mʉja ãa,
manire cʉ̃ ca-rií ree bai yajibojaro maca.
14 To bairi mʉjaa judío maja mee quena jã judío maja mena caroaro mani ame jʉ́go ani maji,
to bairo Jesucristo manire cʉ̃ cá-átibojarique jʉgori.
Mani ame mai tʉjʉ maji.
Jicã poa macanare bairo mani ãa nipetirã,
manire cʉ̃ ca-rií ree yajibojarique jʉgori.
To bairi,
“Aperã ãma,
nare jã tʉjʉgateebʉja,”
ame ĩrique maa yucʉra.
15 Jã judío maja tirʉmʉpʉ jã ñicʉ Moisére Dio cʉ̃ cá-áti rotiriquere cá-áti nʉcʉbʉgorã aniri judío maja ca-aniquẽnare jã ca-booquetinucuwʉ.
Yucʉra Jesucristo yucʉ tẽorica pãipʉ bai yajiri Moisé cʉ̃ ca-rotiriquere cá-áti nʉcʉbʉgo jana rotiyupi.
To bairi yucʉra jã judío maja,
mʉja judío maja ca-aniquẽna mani ame tʉjʉteequẽe yucʉra yua.
Ricati poari macana mani ca-anie to ca-anibato quena yucʉ roquere Cristo maca jicã majare bairona mani ca-cũuñupi,
cʉ̃ ya poa macana mani ca-aniparore bairo ĩi.
16 To bairi Jesucristo caroorije mani cá-átie wapa yucʉ tẽorica pãipʉ ca-bai yajibojayupi.
Manire bai yajibojari ricati poa macana mani ca-anibato quena Dio mena mani ca-ame wada quenoopere ca-rotiyupi Cristo.
To bairi cʉ̃ ya poa macanare jicã maja mani ca-ano átiri ca-jʉgoyepʉ mani ca-ame tʉjʉgaquetajere manire ca-reebojayupi yua.
17 Jesucristo ati yepapʉ ejari caroa quetire Dio mena mani ca-wada quenoopere ca-ĩi buioyupi mani camajare.
To bairi mʉjaa judío maja ca-aniquẽna Dio cʉ̃ ca-rotiriquere ca-majiquẽna anibana quena mʉja ca-apiyupa tie quetire.
Jã quena judío maja Dio cʉ̃ ca-rotirique ca-majirã quena jã ca-apiwʉ tie quetire.
18 To bairi jã judío majare,
mʉjaa judío maja ca-aniquẽna quenare caroaro mani tʉgooñami mani Pacʉ Dio.
Cristo manire cʉ̃ ca-bai yajibojarique jʉgori to bairo caroaro mani tʉgooñami.
To bairi Espíritu Santore Dio manire cʉ̃ ca-jooro Jesucristo mena,
mani Pacʉ Dio mena macana mani ani maji.
19 To bairi mʉja quena judío maja aniquetibana quena ape majare bairo,
cʉ̃re ca-majiquẽnare bairo mʉja tʉjʉquẽemi Dio yucʉra.
Cʉ̃re ca-apiʉjarã mena macana mʉja ãa mʉja quena.
Mʉja quena Dio yarãna mʉja ãa.
20 To bairi Jesucristo cʉ̃ ca-bue jʉgoricarã apóstol na ca-ĩirã jã bero,
aperã cʉ̃ ye quetire buiori maja bero mʉja quena cʉ̃ yarã cʉ̃ ya poa macanana mʉja ãa.
Cʉ̃ ya poa macana manire ca-ani jʉgoʉ majuu ãmi Jesucristo.
Cʉ̃ berona ãma apóstol maja,
cʉ̃ ye quetire buiori maja mena.
Na bero mʉja quena cʉ̃ ya poa macana mʉja ãa,
jã judío maja Jesúre ca-apiʉjarã mena.
21 To bairi mani Ʉpaʉ Jesucristo bero macana mani ãa mania,
nipetirã cʉ̃re ca-apiʉjarã.
To bairi jicã poa cʉ̃ ya poa macana caroarã mani bʉʉ nutuagarã.
22 Mʉja quena mani Ʉpaʉ Cristore ca-apiʉjarã aniri nipetirã cʉ̃ yarã mena cʉ̃ ya poa macana mʉja ãa.
To bairi cʉ̃ Espíritu Santo jʉgori aninucumi Dio mani mena cʉ̃ ya poa macana mani ca-ano maca.