Visiones y revelaciones
12
Mani majuu,
“Caroaro yʉ áa,”
mani ca-ĩrije wapa maa.
To bairo to ca-wapa manibato quena apeye mʉjaare yʉ buiogʉ.
Mani Ʉpaʉ Jesucristo quẽguericarore bairo yʉre cʉ̃ ca-iñooriquere yʉ buiogʉ.
2-4 Jesucristore yʉ ca-nʉcʉbʉgo jʉgoricaro beroacã cʉ̃ tʉpʉ yʉre ca-ne aámi Dio.
Catorce cʉmari neto Dio ʉmʉrecóopʉ yʉre cʉ̃ ca-ne aátato bero.
Yʉ rupaʉ nipetirona o yʉ yeri jeto yʉ aátacʉ yʉ ĩi majiquẽe.
Dio jicãʉna majiimi yʉ ca-bairiquere.
Atie jetore yʉ maji.
Dio cʉ̃ tʉpʉ Paraíso ca-wamecʉtopʉ yʉre ca-ne aámi.
Topʉ ãcʉ̃ ca-yajiorije camajare ca-buioya maniere yʉ ca-apiwʉ.
5 To bairo ca-bairicʉ aniri,
“Aperã netoro ca-ãcʉ̃ yʉ ãa,”
yʉ ĩi majiboʉ.
To bairo baibacʉ quena yʉ majuuna,
“Aperã netoro ca-ãcʉ̃ yʉ ãa,”
yʉ ĩiquẽe.
Yʉ ca-ocabʉtiquẽtie jetore caroaro yʉ buiogʉ.
6 “Aperã netoro ca-ãcʉ̃ yʉ ãa,”
yʉ ca-ĩigaata cariapena yʉ ĩiboʉ.
Noo booro wadaʉ mee yʉ ĩiboʉ.
To bairo to ca-anibato quena,
“Aperã netoro ca-ãcʉ̃ yʉ ãa,”
yʉ ĩiquetigʉ,
yʉ tʉjʉ nʉcʉbʉgo netorema ĩi.
Yʉre ca-majirã aniri,
meere yʉre mʉja nʉcʉbʉgorã.
To bairi netobʉjaro yʉre mʉja ca-nʉcʉbʉgonemoro yʉ booquẽe.
7 Dio yʉre cʉ̃ ca-iñoorique caroa majuu ca-ãmʉ.
Tiere tʉgooñaʉ yʉ majuuna,
“Caroaʉ majuu yʉ ãa,
ricati ca-bairije majuure ca-tʉjʉricʉ aniri,”
yʉ ĩiboʉ.
To bairona ĩi tʉgooñaremi ĩi popiye cʉtajere yʉ ca-joowĩ Dio.
Sataná maca pota mena yʉre ca-tupuaʉre bairona yʉ cá-ámí yʉ ca-popiye tamuoro.
8 Itiani majuu mani Ʉpaʉ Diore,
“Yʉ ca-riaye cʉtie yʉre to netoato,”
cʉ̃ yʉ ca-ĩi jenibapʉ.
9 To bairo yʉ ca-ĩibato quena Dio maca oco bairo yʉ ca-ĩi yʉʉwĩ:
“Seeto mʉre maii mʉre yʉ átinemonucu.
To bairi apeye unie mʉre rʉjaquẽe.
Camaja ca-ocabʉtiquẽna na ca-ano yʉ ca-tutuarijere netoro na yʉ joo maji,”
yʉ ca-ĩiwĩ Dio.
To bairi ca-ocabʉtiquẽcʉ ãcʉ̃ yʉ wariñuu.
Yʉ ca-ocabʉtiquẽto Jesucristo ca-tutuaʉ maca yʉ mena cʉ̃ ãmaro ĩi to bairo yʉ bai.
10 To bairi popiye tamuoʉ yʉ wariñuu.
Rooro yʉre na ca-wada pairije,
apeye uniere yʉ ca-cʉgoquẽtiere,
Jesúre yʉ ca-nʉcʉbʉgorije wapa yʉre na ca-popiyeyenucurije,
ricati yʉre ca-bairijere yʉ wariñuu.
Oco bairo ãa:
Ca-ocabʉtiquẽcʉre bairo anibacʉ quena Jesucristo mena maca ca-ocabʉti majuʉre bairo yʉ tʉgooña.
Preocupación de Pablo por la iglesia de Corinto
11 Yʉ majuuna yʉ ca-wadaro,
“Ca-mecʉʉre bairona wadami Pablo,”
yʉre mʉja ĩiborã.
Caroaro yʉre mʉja ca-wadaquẽtie jʉgori to bairo yʉ ĩi wada yʉ majuuna caroaro yʉ cá-átiere.
Mʉja maca caroaro yʉ cá-átiere aperãre yʉre mʉja ca-ĩi buioro ñuuboricaro.
Na ca-ĩitorijere mʉja ca-nʉcʉbʉgoro cá-ána maca,
“Jesucristo cʉ̃ ca-beje jʉgoricarã apóstol maja netoro ca-majirã jã ãa,”
ĩi tʉgooñabanama.
Yʉ maca,
“Cawatoa macacʉ ãmi,”
na ca-ĩi anibacʉ quena na rʉgaro ca-ãcʉ̃ mee yʉ ãa.
12 Mʉja tʉpʉ popiye tamuobacʉ quena tʉgooña ocabʉtiri capee Dio cʉ̃ ca-tutuarije mena yʉ cá-áti iñoowʉ.
To bairo ácʉ cariape Jesucristo cʉ̃ ca-bejericʉ apóstol majocʉ yʉ ca-aniere yʉ ca-iñoowʉ.
13 Mʉjaa Corinto macanare aperã Jesucristore ca-nʉcʉbʉgori poari macana rʉgaro caroaro nʉcʉbʉgorique mena mʉjaare yʉ cá-átiquetinucuwʉ.
Atie jetore yʉ cá-átiquẽpʉ.
Apeye yʉ ca-boorije uniere mʉjaare yʉ ca-jeniquẽpʉ.
To bairo yʉ ca-bairiquere,
“Yʉre majirioya,”
¿yʉ ĩibocʉtí?
14 Mʉja tʉpʉ yʉ cá-aápere quenoo yuʉ yʉ áa,
meere.
Yucʉacã yʉ cá-aápe mena itiani mʉja tʉpʉre yʉ aágʉ yua.
Apeye yʉ ca-boorije unie mʉjaare yʉ jeni patowãcooquetigʉ.
Mʉja ca-cʉgorije quenare yʉ emaquetigʉ.
Yʉre mʉja ca-api nʉcʉbʉgope macare yʉ boo.
Oco bairo ãa:
Ca-pacʉa na punaare na ca-niyeru joopere neorãma.
Na punaa maca na pacʉare na ca-niyeru joopere neoquẽnama.
To bairi mʉja pacʉre bairo ca-baii aniri mʉja ca-cʉgorijere yʉ jeniquẽe.
15 Yʉ maca yʉ ca-cʉgoro cõo mʉjaare yʉ átinemogʉ.
Noo yʉ cá-áti ocabʉtiro cõo mʉja yeri mena netobʉjaro Diore mʉja ca-nʉcʉbʉgopere yʉ átinemogʉ.
Oco bairo yʉ tʉgooña baii pʉa.
Seeto yʉ ca-mairã anibana quena yʉ macare ca-maiquẽnare bairo mʉja bai.
16 Mʉjaare yʉ ca-jeni patowãcooquetibato quena oco bairo yʉre ĩirãma jicãarã:
“Cʉ̃ cá-áti majirije mena cʉ̃re mʉja ca-nʉcʉbʉgoro cá-ájupi.
To bairo átiri na yere jeericʉmi,”
yʉre ĩirãma.
17 Yʉ ca-jooricarã maca Tito jãa ĩitori mʉja ca-nʉcʉbʉgoro,
mʉja yere jãare mʉja ca-jooro cá-átiquẽma.
18 Titore mʉja tʉpʉ yʉ ca-joowʉ.
To bairi apeĩ Jesucristore ca-nʉcʉbʉgoʉ mani yaʉ quenare cʉ̃ mena yʉ ca-joowʉ.
Topʉre Tito ĩitorique mena mʉja ca-nʉcʉbʉgoro,
mʉja ye niyeru,
apeye uniere jãare mʉja ca-jooro cá-átiquẽjupi Tito.
Cʉ̃ quena yʉ cá-átinucurore bairona átinucumi.
Mʉja yere jeni patowãcooquetinucumi,
yʉre bairona ca-tʉgooñaʉ aniri.
19 Ape paʉra,
“Caroaro jãare na nʉcʉbʉgoato ĩirã to bairo ĩima,”
jãare mʉja ĩi tʉgooñarã.
To bairo me ãa.
Oco bairo maca ãa:
Dio jãare cʉ̃ ca-tʉjʉrona Jesucristo cʉ̃ ca-rotiro mena jã ĩi buio.
Yʉ yarã,
yʉ ca-mairã mʉja ca-ano maca Diore netobʉjaro na nʉcʉbʉgoato ĩi to bairo mʉjaare yʉ ĩi.
20 Mʉjaare yʉ tʉgooñarique paibʉja,
na tʉpʉ yʉ cá-aáto yʉ ca-boorore bairo mee átiborãma ĩibacʉ.
Mʉja quena,
“Pablore jã ca-boorore bairo baiquetiboʉmi,”
mʉja ĩi tʉgooñarã.
Apeye quenare oco bairo baiborãma yʉ ĩi tʉgooñarique pai.
Ame tutiborãma.
Ame tʉjʉ ʉgoobana ame punijiniborãma.
Ame wada canamu paiborãma.
Aperãre rooro wada paiborãma.
To bairi,
“Aperã netoro ca-ñuurã jã ãa,”
ĩi tʉgooñaborãma.
Noo na ca-booro áti macaborãma,
yʉ ĩi tʉgooñarique pai mʉjaare.
21 Yʉ tʉgooñarique pai.
Cabero mʉja tʉpʉ yʉ cá-aáto rooro mʉja cá-átie tʉjʉri,
mʉja cá-áti aniere yʉ ca-tʉgooña boboro yʉre átiboʉmi yʉ Ʉpaʉ Dio.
To bairi rooro cá-átana,
“Dio,
jã majirioya,”
mʉja ca-ĩi jeniquẽto seeto yʉ jʉtiritiboʉ.
Rooro mʉja cá-átiere,
rooro mʉja ca-tʉgooñarijere,
rooro mʉja cá-áti epericarã cʉtiere,
nipetiro caroorije mʉja cá-átigarore bairo mʉja cá-átinucurijere mʉja ca-janaquẽto seeto yʉ jʉtiritiboʉ.