Advertencias y saludos finales
13
Yucʉacã mʉja tʉpʉ yʉ cá-aápe mena itiani mʉjaare yʉ tʉjʉ aágʉ yua.
Dio ye queti ucarica pũuro oco bairo ĩi ucarique ãa:
Pʉgarã o itiarã apeĩ cʉ̃ cá-átajere ca-tʉjʉricarã jicãrore bairo na ca-buiorijere apirã,
“Cariape ĩirãma,”
ĩi majirique ãa.
2 Ca-jʉgoyepʉ mʉja tʉpʉ ãcʉ̃ caroorije cá-ánare yʉ ca-buio tʉgawʉ,
meere.
To bairi mʉja nipetirore yʉ ca-buiowʉ.
Yucʉacã quenare yoaropʉ anibacʉ quena yʉ ĩinemo tunu.
Cabero mʉja tʉpʉ aácʉ noo caroorijere cá-ánare mairique mena caroaro na yʉ buionemoquetigʉ.
Tutuaro maca na yʉ buiogʉ.
3 To bairo yʉ ca-bairo cariapena Jesucristo yʉ mena cʉ̃ ca-aniere mʉja tʉjʉ majigarã.
Yʉ jʉgori buiomi Cristo mʉja quenare.
Mʉjaare buioʉ ca-ocabʉtiquẽcʉre bairo mee buiomi Cristo.
Cʉ̃ ca-tutua majirije macare mʉjaare iñoomi.
4 Cariapena yʉ ĩi.
Cristo ca-ocabʉtiquẽcʉre bairona ca-baiyupi,
yucʉ tẽorica pãipʉ cʉ̃re na ca-papua jĩaro.
Ti paʉpʉre ca-ocabʉtiquẽcʉre bairona ca-bairicʉ anibacʉ quena yucʉacã catínucucõami,
Dio cʉ̃ ca-tutuarije mena.
Jã quena cʉ̃ ca-bairicarore bairona ca-tutuaquẽna jã ãa.
To bairo ca-tutuaquẽna anibana quena cʉ̃ mena macana aniri ca-tutuarã jã ãa yua.
To bairi mʉja tʉpʉ ejarã seeto mʉjaare ca-buio ocabʉti majirã jã anigarã.
5 ¿Jesucristore ca-api nʉcʉbʉgorã majuu mani ãtí?
ĩirã,
mʉja majuuna mʉja cá-áti aniere tʉjʉ bejeya mʉjaa.
Mʉja majuuna to bairona caroaro tʉgooñaña.
Jesucristo mʉja mena cʉ̃ ca-ãmata cʉ̃ ca-boorijere mʉja ána.
Mʉja mena cʉ̃ ca-aniquẽpata jocarãna,
“Jesúre ca-api nʉcʉbʉgorã jã ãa,”
mʉja ĩirã.
6 “Jesú ye quetire cariape ca-buiorã ãma,”
jãare mʉja ca-ĩi nʉcʉbʉgorije macare jã boo.
7 Caroorijere átirema ĩirã Diore jã jenibojanucu mʉjaare.
“Caroa jetore cá-ána ãnama,”
jã macare na ĩato ĩirã mee to bairo jã jeniboja.
Mʉja cá-átipe macare tʉgooñari,
caroaro na áparo ĩirã to bairo jã jeniboja mʉjaare.
Jicãarã,
“Caroaro átiquẽema Pablo jãa,”
jãare ĩigarãma.
To bairo na ca-ĩibato quena ñuugaro.
8 Cariape cá-ána macare ricati wame jã áti majiquẽe jãa.
Netobʉjaro cariape na cá-átiparore bairo maca jã átinemo maji.
9 “Ca-ocabʉtiquẽna ãma,”
jãare na ca-ĩibato quena jã wariñuu,
cariape ca-aniere cá-áti ocabʉtirã mʉja ca-ano maca.
To bairi nipetiro cariape jeto seetobʉja mʉja cá-áti nutuaparore bairo Diore jã jeniboja mʉjaare.
10 Mʉja tʉpʉre aágʉ jʉgoye ati pũuro tutuaro mʉjaare yʉ uca joo,
topʉ ejaʉ tutuaro mena mʉjaare rotigaquẽcʉ.
Mani Ʉpaʉ Dio seetobʉja mʉja ca-nʉcʉbʉgopere boʉ yʉ ca-buio rotiwĩ.
Dio ye quetire,
cariape macajere na apiba yajioato ĩi mee yʉ ca-buio rotiwĩ Dio.
11 Yʉ yarã,
to cõona mʉjaare yʉ ca-ĩi uca joorije ãa.
Cariape jeto ája.
Mʉjaare yʉ ca-ĩi buio uca joorijere apiʉjaya.
Jicãrore bairo tʉgooñarique cʉja.
Ame tutirique manona,
jicãro mena ãña.
Dio manire ca-maii,
jicãro mena mani ca-ano cá-ácʉ mʉja mena anigʉmi.
12 Caroaro ame mairique mena ame ñuu rotiri ame tʉjʉnucuña.
13 Mani yarã nipetiro Jesucristore ca-nʉcʉbʉgorã ñuu rotima mʉjaare.
14 Mani Ʉpaʉ Jesú caroare mʉjaare cʉ̃ joato.
Dio mʉjaare ca-maii mʉja mena cʉ̃ ãmaro.
Cʉ̃ Espíritu Santo quena mʉja nipetiro mena caroaro cʉ̃ ãmaro.
To bairona to baiato.
To cõona yʉ Pablo mʉjaare yʉ uca joo.