La autoridad de Pablo como apóstol
10
Yʉ Pablo apeye mʉjaare yʉ ĩi buiogʉ.
Jesucristo caroaro mairique mena,
mani bopacoo tʉjʉri cʉ̃ ca-buio majirore bairona caroaro mʉjaare yʉ ĩi uca joo baii pʉa.
Jicãarã mʉja tʉ macana oco bairo yʉre ĩirãma:
“Pablo mani tʉpʉ ãcʉ̃ caroaro mani mai tʉjʉri caroaroacã mani buionucumi.
Aperopʉ ãcʉ̃ maca papera mena ĩi uca joʉ seeto majuu tutuaro manire ĩi joonucumi,”
yʉre ĩirãma jicãarã mʉja tʉ macana.
2 Mʉja tʉpʉ yʉ cá-aáto caroaro ája,
caroaro mʉjaare yʉ ca-ĩi buio majiparore bairona.
Rooro ca-ĩirã macare tutuaro mena na yʉ ĩi buiogʉ.
Jicãarã mʉja tʉ macana,
“Pablo jãa na majuuna tʉgooñari baima,”
jãare ĩirãma.
“Ati yepa macana Jesúre ca-majiquẽna na ca-bairore bairona baima,”
jãare ĩirãma.
To bairo ca-ĩirã una quenare yʉ wada canamu majigʉ.
3 Camaja ati yepa macana anibana quena Jesúre ca-tʉgooñaquẽnare bairo jã átiquẽe.
4 Dio yere ána jã majuuna jã cá-áti tutuarije mena,
ati yepa macanare bairo jã átiquẽe.
Dio cʉ̃ ca-tutuarije mena maca ca-ñuuquẽtiere,
ca-ĩitorije jã ree maji.
Cʉ̃ cá-átinemorije mena jã áti ocabʉti maji.
5 To bairi cʉ̃ cá-áti tutuarije jãare cʉ̃ ca-joorije mena nipetirã,
“Ca-majirã jã ãa,
oco bairo majuu ãa,”
ca-ĩirã na ca-ĩitorijere jã ĩi neto maji.
Dio ye quetire jã ca-buioro ca-api majigarãre ca-matarã quenare jã ree maji.
Cʉ̃ ca-rotirije macare na áparo ĩirã,
cʉ̃ ca-boorore bairo ca-tʉgooñarã maca na ãmaro ĩirã jã áti maji.
Dio cʉ̃ cá-áti tutuarije jãare cʉ̃ ca-joorije mena to bairo jã áti maji.
6 Jesucristo cʉ̃ ca-booro mʉja cá-átigarije bero mʉja mena ca-neñaponucurã ca-booquẽna macare jã popiyeye ocabʉti maji na ca-netoo nʉcarije wapa.
7 Camajare tʉjʉrã na ca-baurije ca-bui macaje jetore mʉja tʉgooña,
na yeri maca tʉgooñaquẽnana.
To bairi mʉja tʉpʉ macacʉ,
“Jesucristo yaʉ majuu yʉ ãa,”
ca-ĩi ucʉ̃re oco bairo yʉ ĩi:
Jã quena Jesucristo yarã jã ãa,
cʉ̃ ca-anore bairona.
8 Mani Ʉpaʉ Jesúre netoro mʉja ca-tʉgooña nʉcʉbʉgonemoparore bairo yʉ cá-áti rotiwĩ Dio.
Jesúre mʉja ca-nʉcʉbʉgorijere yʉre ca-rooye tuu rotiquẽmi.
Ape paʉra to bairo cʉ̃ ye quetire Dio yʉre cʉ̃ ca-buio rotiriquere netobʉjaro yʉ wada baii pʉa.
To bairo wadabacʉ quena nope ĩi yʉ boboquẽe.
9 “Na uwi tʉgooñaato ĩi tutuaro majuu manire ĩi uca joomi Pablo,”
yʉre ĩi tʉgooñaquẽja.
10 To bairona yʉre ĩi tʉgooñarãma mʉja tʉ macana jicãarã.
“Papera pũuro uca joʉ ca-ocabʉti majuʉre bairo tutuaro majuu manire ĩi joomi Pablo,”
yʉre ĩirãma.
“Ca-baujaro macara mani tʉpʉ buioʉ maca ca-tutuaquẽcʉre bairo baumi.
Cʉ̃ ca-wadarije quena seeto tʉjooquẽe,”
yʉre ĩirãma.
11 To bairo yʉre ca-ĩirã una atiere na tʉgooña majiato:
Ca-yoaropʉ ãnaa jã ca-uca jooricarore bairona,
mʉja tʉpʉ ãnaa quena to bairona tutuaro jã buio maji.
12 Aperã mʉja tʉ macana,
“Jã maca ca-ani majuurã jã ãa,”
ĩirãma.
To bairo ca-ĩirã mena jicãro cõo jã anigaquẽe jã maca.
Na majuuna tʉgooñari,
“Ca-majirã mani ãa,”
ame ĩinucurãma.
To bairo ĩinucubana quena majiquẽnama.
13 Jã maca jã cá-áti majiquẽtiere,
“To bairona ãa,”
jã ĩiquẽe.
To bairi,
“Jã majuuna Dio ye quetire noo jã ca-booro jã buio teña maji,”
jã ĩiquẽe.
Dio cʉ̃ ca-rotiro jetona jã buio teña maji.
To bairi cʉ̃na mʉja tʉpʉ quenare jã ca-buio teña rotiwĩ.
14 To bairi Jesú ye queti mʉjaare buiorã jã majuu jã ca-booro meena jã cá-ápʉ́.
Diona mʉja tʉpʉ jãare cʉ̃ ca-queti buio rotiro jã cá-ápʉ́.
To bairi mʉjaare Jesú ye quetire ca-buio jʉgoricarã jã ãa.
Mʉja tʉpʉ jã ca-buio teñaquẽpata jocarãna,
“Mʉjaare ca-buio jʉgoricarã jã ãa,”
jã ĩiborã.
15 Aperã na cá-átiere,
“Jã cá-átie maca ãa,”
jã ĩiquẽe.
To bairi aperã ye paariquere,
“Pablo jãa na cá-átaje ãa,”
aperã na ca-ĩiro jã booquẽe.
Netobʉjaro Jesúre mʉja ca-apiʉja nutuato jetore jã boo.
To bairo mʉja cá-áto mʉja tʉpʉ macanare jã buionemo majigarã.
Dio cʉ̃ ca-buio teña rotiro jetore jã buio teña nutuagarã.
16 Jesucristo netobʉjaro mʉja ca-apiʉja nutuato mʉja jʉgoye macá macaripʉ quenare jã buio teña nutua majigarã.
Cʉ̃ ye quetire ca-buioya manopʉre jã buiogarã.
Camaja,
meere Jesúre na ca-apiʉjaropʉ,
“Jã maca jã ca-buiorije jʉgori apiʉjama,”
jã ĩigaqueti majuucõa.