2 Jicãni uno rooro mʉjaare jã cá-átiquẽpʉ.

Jicãʉ macare jã ca-rooye tuuquẽpʉ cʉ̃ ca-aniere.

Jicãni uno mʉjaare jã ca-ĩitoquẽpʉ.

To bairi jãare maiña.

3 “Ca-bui cʉna mʉja ãa,”

ĩi mee yʉ ĩi.

Ca-jʉgoye mʉjaare yʉ ca-ĩricarore bairona mʉjaare yʉ mai.

Yʉ ca-catíri rʉmʉ ca-ano cõo mʉjaare yʉ maigʉ.

Bai yajiipʉ quena mʉjaare yʉ maigʉ.

4 Mʉja ca-bairijere ca-tʉjʉ jeyaʉ aniri,

“Caroaro áama,”

ĩi tʉjʉ yeri jañari mʉjaare yʉ ĩi tʉgooña ocabʉti.

Seeto popiye tamuobacʉ quena,

“Caroaro áama,”

yʉ ĩi wariñuu mʉjaare.

5 Macedoniapʉ ejarã to canacã rʉmʉ yerijãri mee jã ca-bainucuwʉ.

Noo jã cá-aáti paʉ aperã rooro jãare cá-átinucuwã.

To bairi rooro jã ca-bainucuwʉ.

To bairo rooro baibana seeto uwirique mena jã ca-bainucuwʉ.

6 To bairo jã ca-baibato quena Dio tʉgooña ocabʉtiriquere ca-joʉ maca jã ca-tʉgooña ocabʉtiro cá-ámí mani yaʉ Tito cʉ̃ ca-ejarije jʉgori.

7 Cʉ̃ ca-ejarije jʉgori jeto meere jã ca-wariñuuwʉ.

Cʉ̃ ca-queti buiorije mena quenare jã ca-api wariñuuwʉ.

Mʉja cá-áti aniere tʉjʉʉ ca-tʉgooña ocabʉtiyupʉ Tito.

Seeto yʉre mʉja ca-tʉjʉgarije jãare ca-ĩi buiowĩ.

Caroorije mʉja cá-átajere mʉja ca-jʉtiritirije quenare jã ca-ĩi buiowĩ.

Yʉre mʉja ca-tʉgooña ʉjarije quenare jã ca-ĩi buiowĩ Tito.

To bairo cʉ̃ ca-ĩi buiorijere queti apii netobʉjaro yʉ ca-wariñuunemowʉ.

8 Mʉjaare uca joobacʉ mʉja ca-tʉgooñarique pairo yʉ cá-ápʉ́.

To bairo átibacʉ quena,

“Ca-uca jooquetipe nibajupa,”

yʉ ĩiquẽe.

Nemoona yʉ ca-uca jooricaro beroacã mʉja ca-tʉgooñarique pairo tʉjʉʉ to bairona yʉ ca-ĩi tʉgooñabapʉ.

9 Yucʉacã,

meere,

wariñuurique mena yʉ ãa.

Mʉja ca-tʉgooñarique pairije jʉgori mee yʉ bai.

Caroorije mʉja cá-átajere jʉtiritiri mʉja cá-áti janañupa.

To bairi seeto yʉ wariñuu.

Dio cʉ̃ ca-boorore bairona mʉja ca-jʉtiritiyupa.

To bairi mʉja ca-tʉgooña wajoarijere tʉjʉri mʉja ca-tʉjʉ wariñuuñupi Dio.

To bairi mʉja ca-tʉgooñarique pairo jã cá-áti rooye tuuquẽpʉ mʉjaare.

10 Jicãʉ ucʉ̃ caroorije cʉ̃ cá-átajere ca-tʉgooñarique paii cʉ̃ ca-tʉgooñarijere wajoari caroorije cʉ̃ cá-átajere áti janacõaʉmi.

Dio maca to bairo cʉ̃ cá-áto tʉjʉ tʉjoori cʉ̃ netooʉmi.

Apeĩ maca cariape Diore ca-apiʉjagaquẽcʉ ucʉ̃re cʉ̃ netooquetigʉmi Dio,

cʉ̃ ca-jʉtiritibato quena.

Ati yepa macana na ca-tʉgooñarique pairore bairo baibacʉ yajigʉmi.

11 Dio cʉ̃ ca-boorore bairona mʉja ca-tʉgooñarique paiyupa mʉja ya paʉpʉ rooro mʉja cá-átajere.

Mʉjaare yʉ ca-queti joori pũurore tʉjʉri nemoona mʉja ca-tʉgooña wajoayupa.

Rooro mʉja cá-átajere mʉja majuuna nʉcʉbʉgorique mena mʉja ca-quenooñupa.

Mʉja mena macacʉ rooro cá-átacʉ mena mʉja ca-anigaquẽjupa.

Mʉja ca-tʉgooña acʉayupa rooro cʉ̃ cá-átajere.

Rooro cá-átacʉre jicãrore bairona cʉ̃re mʉja ca-popiyeyeyupa.

To bairo mʉja ca-bairo tʉjʉrã,

“Roorije átajere ca-booquẽna ãma,”

mʉja ĩi tʉjʉma aperã.

12 To bairi mʉjaare uca joʉ rooro cá-átacʉre cʉ̃re mʉja ca-popiyeyepere seeto yʉ ca-tʉgooñaquẽpʉ.

Rooro cá-áti ecooricʉre mʉja cá-átinemope quenare seeto yʉ ca-tʉgooñaquẽpʉ.

Mʉja macare yʉ ca-tʉgooñawʉ.

Caroaro jãare na ca-tʉjʉ ʉjarijere,

jãare na ca-apiʉjarijere Dio cʉ̃ ca-tʉjʉro na iñoato ĩi yʉ ca-uca joowʉ.

13 To bairi nipetiro caroaro mʉja cá-átaje jʉgori jã tʉgooña wariñuu ocabʉti.

To bairi Tito seeto cʉ̃ ca-wariñuuro tʉjʉrã jã quena jã ca-wariñuunemowʉ.

Nipetiro cʉ̃ ca-tʉgooñarije paibatajere cʉ̃ ca-majiritiro mʉja cá-ájupa.

14 Mʉja tʉpʉ Tito cʉ̃ cá-aáparo jʉgoye,

“Caroaro ca-nʉcʉbʉgorã ãma Corinto macana,”

cʉ̃ yʉ ca-ĩi buiowʉ.

To bairo ĩi jocʉ mee yʉ ca-ĩiwʉ.

Cʉ̃ yʉ ca-ĩricarore bairona caroaro ca-nʉcʉbʉgorã mʉja ãa.

Nipetirijere mʉjaare yʉ ca-ĩrije cariape jeto ãa.

Nipetiro mʉja ca-aniere Titore jã ca-ĩi buiorique quena cariape ãa.

To bairi,

“Caroaro ca-nʉcʉbʉgorã ãma Corinto macana,”

Titore jã ca-ĩi buiorique quena cariape ca-baiwʉ.

15 Nʉcʉbʉgorique mena mʉja tʉpʉre cʉ̃re mʉja ca-ani rotiyupa.

Cʉ̃ ca-rotirije quenare caroaro mʉja cá-ájupa.

To bairo mʉja cá-átajere tʉgooñari Timoteo maca netobʉjaro mʉja mai tʉgooñami.

16 Nipetiro caroaro mʉja cá-átiere,

“Caroaro áama,”

ĩi majiri seeto yʉ wariñuu.