6
To bairi Dio ye quetire buiori maja aniri oco bairo nʉcʉbʉgorique mena mʉjaare jã ĩi.
Mʉjaare Dio cʉ̃ ca-mai tʉjʉrijere majibana quena ca-apiquẽnare bairo baiquẽja.
2 Dio ye queti ucarica pũuropʉ oco bairo ĩi ucarique ãa:
Mʉjaare yʉ cá-átinemogari paʉ mʉja ca-jeniro apiri mʉjaare yʉ átinemogʉ.
Mʉjaare yʉ netoogʉ.
To bairi yucʉacana,
meere,
camajare Dio cʉ̃ cá-átinemogari paʉ ani tʉga.
Yucʉacana cʉ̃ ye quetire ca-apirãre na netoogʉmi Dio.a
3 To bairi Dio ye quetire buiorã ricati jã átiquetinucu,
aperã jã ca-buiorijere wapa maa ĩirema ĩirã.
4 Dio yarã cariape cʉ̃ ye quetire ca-buiorã jã ca-aniere camaja na ca-majiro jã boo.
To bairo boorã popiye jã ca-tamuonucurijere jã nʉcacõa.
Jicã paʉ cʉ̃ ye quetire buiorã popiye majuu jã bainucu.
Ape paʉra jã ca-boorije uniere jã cʉgoquetinucu.
Ape rʉmʉra aperã jã ca-buiorijere apigateerã seeto jãare matanucuma.
5 To bairi ape rʉmʉra jã quẽnucuma.
Ape paʉra preso wiipʉ jãare jõonucuma.
Ape paʉra rooro jãare átigarã roorije ĩi awaja teñanucuma.
Ape rʉmʉ seeto majuu jã paa popiyecʉti,
yerijãquẽnana.
Ape paʉra jã ñigo rianucu.
6 To bairo jã ca-bairijere tʉjʉrã camaja nipetirã majima cariape Dio ye quetire ca-buiorã jã ca-aniere.
Oco bairo caroaro jã cá-átinucurijere tʉjʉ majima.
Jesú ye quetire caroaro jã maji.
Ricati jãare ca-bairo jã nʉcanucu.
Aperãre caroaro jã átinemonucu.
Espíritu Santo jã mena anicõa aninucumi.
Aperãre ĩitori mee nare jã mai tʉjʉ.
7 Caroaro cariape jeto Dio ye quetire jã buionucu.
Dio cʉ̃ ca-tutuarije jʉgori to bairije cʉ̃ ca-boorijere jã áti maji.
Caroaro átiri caroorije macare jã mata maji.
8 Camaja jicã rʉmʉrire caroaro jã nʉcʉbʉgoma.
Ape rʉmʉra rooro jã tʉjʉma.
Jicã rʉmʉri,
“Caroaro áama,”
jã ĩima aperã.
Ape rʉmʉra,
“Rooro áama,”
jã ĩima.
Cariape jã ca-ĩi buiorije to ca-anibato quena ca-ĩito teñari majare bairo jã tʉjʉma.
9 Ape rʉmʉra,
“Aperã ãma,”
jãare ĩi tʉjʉ rocacõama.
Camaja nipetiro na ca-majirã jã ca-anibato quena to bairo rooro jãare ĩima.
Ape rʉmʉ jãare jĩaga cotema.
Popiye jã ca-tamuoro átibana quena jãare jĩa rocaquẽema mai.
Jã catícõa.
10 To bairo jã ca-popiye tamuonucurije tʉgooñarique paibana quena jã wariñuunucucõa.
Ca-bopacoorãre bairo anibana quena Dio ye quetire jã ca-buiorije jʉgori aperã capaarãre capee ca-cʉgorãre bairo na ca-ano jã áa.
Ñee uniere cʉgoquetibana quena Dio cʉ̃ ca-joorije jʉgori nipetirije jã cʉgo.
11 Jã yarã,
rʉjaricaro mano jã ca-tʉgooñarije nipetiro mʉjaare jã queti buio peocõawʉ,
seeto mʉjaare mairã.
12 Ricati mʉjaare jã tʉgooñaquẽe.
Mʉja maca ricati mʉja tʉgooñarã jãare.
13 Jicãʉ cʉ̃ punaare caroaro cʉ̃ ca-rotirore bairona nʉcʉbʉgorique mena mʉjaare yʉ ĩi.
Mʉjaare yʉ ca-mairore bairona yʉre mʉja ca-mairo yʉ boo.
Somos templo del Dios viviente
14 Jesucristore ca-nʉcʉbʉgoquẽna mena bapa cʉtiquẽja.
Caroare,
caroorije mena aju majiña maa.
To bairona ca-bujurije quena ca-naitĩarije mena ani majiquẽe.
To bairi Jesucristore ca-booquẽna mena bapa cʉtiqueticõaña.
15 Jesucristo quena Sataná mena bapacʉti majiquẽemi.
To bairi Jesucristore ca-apiʉjarã quena bapacʉti majiquẽema cʉ̃re ca-apiʉjaquẽna mena.
16 Dio ca-aniquẽna weericarã aperã na ca-ñuu buerã quenare Dio wiipʉre cũu majiña maa.
Mani maca Dio ca-catícõa aninucuʉ ya wiire bairo ca-ãna mani ãa.
Cʉ̃ majuuna oco bairo ca-ĩi jʉgoyeyeyupi:
Ti yepapʉ ãcʉ̃ yʉ yarã mena yʉ aninucucõagʉ.
Noo na cá-aátopʉ yʉ quena na mena yʉ aágʉ.
Na Ʉpaʉ yʉ anigʉ.
Na maca yʉ yarã majuu anigarãma.
17 Ape wame quena oco bairo ĩi ucarique ãa:
“Caroorã tʉpʉ ca-anibatana to cõona buticõaña.
Na mena macana aniqueticõaña.
Rooro na cá-átiere átiqueticõaña mʉjaa.
Yʉ ca-ĩirore bairo bairã caroaro yʉ mena mʉja anigarã.
18 Yʉ maca mʉja Pacʉ yʉ anigʉ.
Mʉja maca caʉmʉa,
cãromia quena yʉ punaa jeto mʉja anigarã yua.”
To bairona ĩmi mani Ʉpaʉ ca-tutua majuʉ,
ĩi ucarique ãa.b