5
Ati yepapʉ mani ca-catíri rupaʉ ca-petipa rupaʉ ãa,
mani ĩi maji.
Camajocʉ wiire cʉ̃ cá-átibata wii ca-boa ñaarore bairo mani rupaʉ quena boa yajigaro.
To bairo ca-baibato quena Dio ʉmʉrecóopʉ ca-petiquetipa rupaʉre quenoo yuʉmi.
Ti rupaʉ maca camajocʉ ya wii ca-boa ñaarore bairo ca-petipa rupaʉ me anigaro.
2 Ati yepa macá rupaʉre popiye baibana mani quepenucu.
Ʉmʉrecoopʉ mani ca-anipa rupaʉ macare seeto mani wajoaganucu.
3 Cawama rupaʉ cʉgo wajoari cawama jutii ca-jaña wajoarãre bairo mani anigarã.
To bairi ca-rupaʉ mana mani aniquetigarã.
4 Ati yepa macá rupaʉ to canacã rʉmʉ popiye baibana mani quepenucu.
Mani rupaʉ to cõona to bai yajiato ĩi mee yʉ ĩi.
Mani rupaʉ cawama jutiiro mani ca-jañarore bairo to bai wajoaato ĩi yʉ ĩi.
To bairi cawama rupaʉ mani ca-cʉgoro ca-ani jʉgori rupaʉ maca nemoona ati yepapʉ bai yajigaro.
5 Diona to bairo caroaro majuu mani ca-baipere ca-quenoo jʉgoyeyebojayupi.
To bairi cʉ̃ Espíritu Santo manire ca-jooyupi,
cawama rupaʉ mani ca-cʉgopere na maji jʉgoye cʉ́paro ĩi.
6 Tiere tʉgooñari Dio mena mani tʉgooña ocabʉtinucu.
Ati yepa macá rupaʉ mena ãnaa Dio tʉpʉre mani aá majiquẽe,
mani ĩi maji.
7 To bairi ʉmʉrecóopʉ mani ca-baipere tʉjʉ majiquetibana quena Diore mani tʉgooña nʉcʉbʉgo.
Cʉ̃ tʉgooña nʉcʉbʉgori,
cʉ̃ ca-quenoo jʉgoyeyebojaricarore bairona baigaro,
mani ĩi maji.
8 To bairo ĩi tʉgooñari mani tʉgooña wariñuu.
Nemoona mani Ʉpaʉ Dio mena anigarã mani ca-bai yajipere mani tʉgooña wariñuu,
cʉ̃ mena mani ca-ano maca ñuu netoboro ĩirã.
9 Ati yepapʉ catírã o bai yajiri bero quenare mani Ʉpaʉ Dio cʉ̃ ca-boori wame jetore mani átiganucu.
10 Jesucristo cʉ̃ ca-bejeri paʉ ca-ano mani nipetiro mani cá-átajere manire bejegʉmi.
Manire bejeri to canacãʉrena ati yepa ãnaa mani cá-átaje cõo caroaro o rooro mani cá-átajere manire wapa joogʉmi.
El mensaje de la paz
11 To bairi,
“Cariape to canacãʉrena wapa joogʉmi Dio,”
cʉ̃ ĩi tʉgooña nʉcʉbʉgori camajare,
“Jesú ye quetire apiʉjaya,”
nare jã ĩi buionucu.
“Caroaro camajare buionucuma,”
jã ĩi tʉjʉ majiimi Dio jã cá-átinucurijere.
Mʉja quena mʉja yeripʉ caroaro jã cá-átinucurijere mʉja majigarã.
12 “Aperã netoro caroaro cá-ána jã ãa,”
ĩi mee mʉjaare yʉ ĩi.
Aperã jãare ca-wada pairã macare,
“Caroaro cá-ána ãma Pablo jãa,”
nare mʉja ĩato ĩi mʉjaare yʉ ĩi.
Jãare ca-wada pairã maca apeĩ caroaro cʉ̃ yeri macajere tʉjʉ jeeñooquetibana quena,
“Caroaʉ ãmi,”
ĩi tʉjʉrãma,
cʉ̃ rupaʉ macaje caroaʉ cʉ̃ ca-baurije jetore tʉjʉri.
13 Aperã,
“Ca-mecʉrã ãma,”
jãare ĩirãma.
To bairo jãare na ca-ĩibato quena camaja Diore na nʉcʉbʉgoato ĩirã to bairo jã átinucu.
Mecʉrã mee jã bai.
Jã majuuna jã ca-boorije meere,
mʉja maca caroaro mʉja ca-anipere boorã jã átinucu.
14 Jesucristo seeto manire cʉ̃ ca-mairijere tʉgooñari cʉ̃ ye quetire jã buionucu,
popiye tamuobana quena.
Manire ca-bai yajibojayupi Jesucristo.
To bairi mani nipetiro caroorije mani cá-átajere ca-bai yaji wapayericarãre bairo jeto ca-ãna mani ãa,
Jesucristo manire cʉ̃ ca-bai yajibojarique jʉgori.
15 Caroorije mani cá-átajere netoogʉ mani nipetirãre mani ca-bai yajibojayupi.
To bairo manire cʉ̃ cá-átibojaro mani majuuna noo mani ca-boorona cá-átiquetiparã mani ãa.
Jesucristo manire ca-bai yajibojaricʉ,
ca-tunu catíricʉ cʉ̃ ca-boorije macare cá-átiparã mani ãa yua.
16 To bairi apeĩre cʉ̃ rupaʉ cʉ̃ ca-baurijere tʉjʉbana quena cʉ̃ yeripʉ cʉ̃ ca-bairije macare mani tʉjʉ majiquẽna.
“Caroaʉ ãmi,”
mani ĩi beje majiquẽe,
cʉ̃ yeri macajere tʉjʉ majiquetiri.
Yʉ quena tirʉmʉpʉre Jesucristore to bairona yʉ ca-ĩi tʉgooñabapʉ mai.
“To bairona cawatoa macacʉ,
ati yepa macacʉ ãmi,”
yʉ ca-ĩi tʉgooñabapʉ Jesúre.
Yucʉra to bairo yʉ tʉgooñaquẽe yua.
17 Jicãʉ noo ca-boʉ Jesucristo mena ca-ãcʉ̃ apeĩ ãmi yua,
cʉ̃ ca-tʉgooñarijere ca-wajoaricʉpʉ aniri.
Rooro cʉ̃ cá-átinucurique nipetiro ca-wajoaricʉpʉ ãmi.
To bairi ca-jʉgoyepʉna cʉ̃ cá-átinucubataje átiquetinucumi.
Ca-ñuurije macare ati aninucumi yua.
18 Atie nipetiro Diona to bairona manire cá-átibojayupi.
Cʉ̃ Macʉ Jesucristo manire cʉ̃ ca-bai yajibojarique jʉgori cʉ̃re ca-tʉjʉteerã ca-ãnanare cʉ̃ mena macana mani ca-aniparore bairo cá-ájupi Dio.
To bairi camaja nipetirã caroaro cʉ̃ mena na ca-ano boʉ cʉ̃ ye quetire jã ca-buio roti joowĩ.
19 Oco bairo ãa:
Jesucristo cʉ̃ ca-bai yajibojarique jʉgori ati yepa macana nipetirã cʉ̃ mena macana na ca-ano átigami Dio cʉ̃re ca-tʉjʉteebatanare.
To bairi rooro na cá-átaje wapare na popiyeyequetigʉmi Dio,
Jesucristo mena na ca-ãmata.
To bairi aperã na ca-majiparore bairo tie quetire jã ca-buio roti joowĩ Dio.
20 To bairi Jesucristo ye quetire buio teñari maja jã ãa.
Mʉjaare jã ca-queti buiorije jʉgori,
“Yʉ mena macana na ãmaro ĩi,”
to bairo mʉjaare ĩmi Dio.
To bairi cʉ̃ ye quetire buio teñari maja aniri,
“Mʉja quena cʉ̃ mena macana ãña,”
mʉjaare jã ĩinucu.
21 Jesucristo maca jicãni uno caroorije cá-átiquẽjupi.
Caroorije cá-átiquẽcʉ anibacʉ quena Dio maca caroorije wapa ca-cʉgoʉre bairo cʉ̃ ca-ano cá-ájupi Dio cʉ̃ Macʉ Jesúre.
Mani maca mani ca-bai buiyerije jʉgori to bairo cá-ájupi Dio.
Mani Jesucristo mena ãnaa ca-bui cʉtiquẽna anigarãma ĩi to bairo cá-ájupi Dio.