4
Jãare mai tʉjʉri atie jã paariquere jãare ca-cũuwĩ Dio Jesucristo ye quetire jã ca-buiorijere.
To bairi jã tʉgooña ocabʉti.
2 Camaja bobooro átajere ána yajioropʉ na cá-áti uniere jã átiquẽe.
Ĩitorique mena Dio ye quetire jã buioquẽe.
Tiere wajoari mee cariape jeto jã ĩi buionucu.
Nipetiro jã cá-átiere tʉjʉmi Dio ĩirã baujaro jeto jã átinucu.
To bairo jã cá-átiere tʉjʉri,
“Caroaro cá-ána ãma,”
jãare ĩi majirãma camaja.
3 Noo Jesucristo ye quetire jã ca-buiorijere ca-api majiquẽna una Dio cʉ̃ ca-popiyeyeparã ãma.
4 Ati yepa macana Diore na ca-api nʉcʉbʉgoquẽtie jʉgori na ʉpaʉ Sataná ca-capea tʉjʉ majiquẽnare bairo na ca-tʉgooña majiquẽto áami.
Jesucristo ye quetire api nʉcʉbʉgorema ĩi to bairo nare áami.
Jesucristo,
Dio cʉ̃ ca-aniere ca-cʉgoʉ majuu cʉ̃ ye queti ca-ñuu netorijere na api majiqueticõato ĩi,
to bairo na áami Sataná.
5 Atie quetire buiorã jã macare nʉcʉbʉgoya ĩirã mee jã buionucu.
Mani Ʉpaʉ Jesucristo macare na nʉcʉbʉgoato ĩirã to bairo mʉjaare jã ĩi buionucu.
To bairi mʉjaare paa coteri majare bairona jã bainucu tiere mʉjaare buiorã.
6 Dio nemoopʉna ati yepa ca-naitĩabatajere ca-bujuro cá-ájupi.
Tiere cʉ̃ cá-átatore bairona mani yeripʉ cʉ̃ yere mani ca-api majiquetibatajere mani ca-api majiro cá-ájupi.
To bairi,
“Caroaʉ majuu ãmi Dio,”
mani ĩi maji yucʉra yua,
Jesucristo quena caroaʉ majuu cʉ̃ ca-aniere majiri.
El vivir por la fe
7 Caroaʉ majuu cʉ̃ ca-aniere mani ca-majirije pairo majuu ca-wapacʉtie majuu ãa.
Mani majuuna cawatoa macana mani ãa.
To bairi ríi mena áta rʉri cawatoa ca-ani rʉri to ca-anibato quena ca-wapa pacarije oro cuiri ca-jañari rʉrire bairona jã ãa,
Dio ye quetire ca-buionucurã aniri.
To bairi cawatoa ca-ãna,
ca-tutuaquẽna mani ca-anibato quena cʉ̃ yere jã ca-buio rotiwĩ Dio.
Camaja maca na majuuna na ca-tʉgooñarije jʉgori mee,
“Dio cʉ̃ ca-tutua netorije jʉgori maca buioma,”
jãare na ĩi tʉjʉato ĩi,
jã ca-bejeyupi Dio.
Cawatoa ca-ãna jã ca-anibato quena jã ca-bejeyupi Dio cʉ̃ ye quetire ca-buioparãre.
8 Popiye baibana quena,
“¿Dope bairo mani ánaatí?”
jã ĩiquẽe.
“Seeto tʉgooñarique paibana quena dope bairo áti majiña maa,”
jã ĩiquẽe.
9 Camaja rooro jãare na cá-átigabato quena Dio maca jã mena aninucucõami.
Jã aáweoquẽemi.
Jãare na ca-tune roca cũurãre bairo jã bai.
To bairo na cá-ána jã ca-anibato quena jãare áti ree majiquẽema.
10 Noo jã cá-aáti paʉpʉ Jesucristore na ca-jĩaricarore bairona jã quenare jã jĩaganucuma.
To bairo jãare na cá-átigabato quena jã anicõa mai.
To bairo jã ca-bairijere tʉjʉri camaja nipetirã,
“Jesucristo ca-catí majuʉ na mena aninucucõami,”
jã ĩi majima.
11 Noo jã ca-catíri rʉmʉ cõona Jesucristo ye quetire jã ca-buiorije wapa aperã jã jĩagama Jesucristo yere ca-apigateerã maca.
To bairo na cá-átigabato quena jã anicõa mai.
Popiye tamuori jã ca-bai yajiri rupaʉri jʉgori Jesucristo cʉ̃ ca-ãnaje cʉtiere majigarãma aperã.
12 To bairo camaja jãare na ca-jĩagabato quena jã maca caroaro Dio mena mʉja ca-anicõa aninucuparore bairo cá-átibojarã jã ãa.
13 Dio ye queti ucarica pũuropʉ oco bairo ĩi ucarique ãa:
“Diore yʉ tʉgooña nʉcʉbʉgo.
To bairi cʉ̃ yere mʉjaare yʉ ca-buiowʉ.”
To bairona jã bai jã quena.
Diore jã tʉgooña nʉcʉbʉgo.
To bairi cʉ̃ ye quetire jã buionucu.
14 Mani maji Dio Jesucristore cʉ̃ ca-tunu catíoricarore bairona mani quenare mani tunu catíogʉmi.
Jesucristo mena macana mani ca-ano mani quena to bairona mani átigʉmi Dio.
Manire tunu catíori jicãro mena cʉ̃ tʉpʉ manire jee aágʉmi.
15 Nipetiro popiye jã ca-bairije ca-baiyupa caroaro Dio mena mʉja ca-aniparore bairo.
To bairi popiye jã ca-tamuoro bero capaarã Dio ye quetire ca-apiʉjarã aninemogarãma.
Na quena caroaro nare cʉ̃ cá-átiere majiri,
“Ñuu majuucõami Dio,”
cʉ̃ ĩi wariñuu nʉcʉbʉgogarãma.
16 To bairi jã tʉgooña ocabʉtinucucõa.
To canacã rʉmʉ jã rupaʉ ca-bʉcʉabato quena jã yeripʉ tʉgooña ocabʉtiri netobʉjaro jã tʉgooña ocabʉti jʉgoye cʉtinucu.
17 Ati yepapʉ ãnaa jã ca-popiye tamuorije nemoona petigaro.
To bairi ñee majuu me ãa tiea.
Ati yepapʉ ãnaa popiye jã ca-bairije jʉgori netobʉjaro ca-petiquetipere jã bʉgagarã.
18 Ati yepa macajere ca-petipe ca-ano maca seeto jã tʉjʉ ʉjaquetinucu.
Ca-bauquẽtie ʉmʉrecóo macaje macare jã tʉjʉ ʉjanucu.
Mani ca-tʉjʉrije ati yepa macaje ca-petipe ãa.
Ʉmʉrecoo macaje mani ca-tʉjʉquẽtie maca ca-petiquẽtie anigaro.