Pabaꞌyuwen a Sarba
21
Say nuꞌnan kalangitan tan lutaꞌ, nakasayna ket, naꞌkit koya a baꞌyon kalangitan tan baꞌyon lutaꞌ.a Kasaynan taaw. 2 Naꞌkit koya et a syudad nan Dios a si baꞌyon Jerusalem, nin mangkumayupaꞌ ya mangibwat konan Dios sa langit. Si syudad ket baraꞌmo yan nubya nin nakapisili anan seket nan para kasal a nakasadyaꞌ yaynan kisnaꞌ konan si kakasal na.3 Ket main nin narngeꞌ kon maksaw nin busis itaw sa truno a wana,
“Ket sawanin anaod, si mampiikapan nan Dios ket madumog yayna konran tutawo. Anaod, miikap yaynay Dios konra tan alilbien nasaran tutawo na. Kikalamoꞌ yan dirib konrac. 4 Punasen na liꞌ a sarba nin lwaꞌ ra, tan kasayna liꞌ gapon mati, o gumereng tan umakis, o mangirangep banaꞌ ta say sarban main nin gindat ket kasayna.”
5 Ket, wanan si nakatekreꞌ sa truno,
“Anaod sawanin, pabaꞌyuwen koyna a sarba!”
Wana et kongko,
“Isurat moyti say nibaritaꞌ ko ta tutuo tan mapagmatalkan.”
6 Wana et kongko,
“Nayadiꞌ ana a sarba. Siꞌko a Alpha tan Omega a say rabay nin irgwen siꞌkoy taranaꞌ tan kalaꞌpusan nin sarban bagay. Si siꞌnuman a milataꞌ, byan koyan ranom nin kasan bayad mangibwat sa subor a mamin anggan-angga nin byay a iti konan Dios. 7 Si manalo, ipagaꞌmuran ko in nin baꞌyon kapapaꞌsar kona. Siꞌko et ket Dios nako tan sya ket anak koya.
8 Baleꞌ saray maliꞌmo nin tumumbok kongko banaꞌ sa dyaꞌdyaꞌ, saray kai nin mamper, saray nikasamaꞌ a gawaꞌ-gawaꞌ ra, saray mangmamati, saray kiraray sa amboꞌ ran asawa, saray mangwaꞌ nin gawaꞌ ran manggagamod, saray mangrarayon dios-dios, tan saray sarba ran mabulaꞌ, say kamiꞌnan ra liꞌ ket itaw sa alawang nin luong nin burung-burong nin asupri. Siti a mansabtan nin ikarwan patiti.”
Si Baꞌyon Jerusalem
9 Ket, nako ya kongko a saya konran pitoy anghil nin mampangaꞌget nin pitoy yawong a napnoꞌ nin say suyot nin pitoy bakas nin dyaꞌdyaꞌ. Wana kongko, “Paradti ta ipaꞌkit koya komo a nubyan kakasal na liꞌ nin Karniro.”
10 Kaaram, naidumay nipagꞌuray nan Ispirito nan Dios kongko, ket si anghil niꞌras nako sa tuktok nan sayay pinasyan kataꞌgayan nin talugtog, tan nipaꞌkit naya kongko a Jerusalem a si syudad nan Dios nin mangkumayupaꞌ mangibwat kona itaw sa langit. 11 Mansumlag yay syudad banaꞌ sa salag nan Dios, a kumidla-kidlap ya nin bilang nin mablin baton mantawagen nin haspe a malinon kapadan kristal. 12-13 Say padil sa libed nan syudad ket ataꞌgay tan magsen. Labinrwa saray purta nin say barang saya ket main nin anghil nin bantay. Tulo ray purta sa baytan, tulo ra sa bagatanan, tulo ra sa panrupan, tan tulo ra sa amyanan. Sa sayay purta ket nakasurat ya a ngaran nan saya anamaet konran labinrwan puri na ni Israel. 14 Say pundasyon nin padil ket labinrwa ray alalakin bato, a sa barang saya ket nakasurat a ngaran nan saya konran labinrwan apostoles nan Karniro.
15 Si anghil nin nagꞌirgo kongko, main nin gaꞌget nan gawaꞌ sa balitok nin ipanukat na konan syudad, tagem say padil tan purta na. 16 Si syudad ket kwadrado ya; si kaanrwan na pariho sa kaalawangan na. Sinukat naya anaod nin anghil a syudad, ket 2,400 kilumitro a kaanrwan na, a kaalawangan na, wanin lamang a kataꞌgayan na. 17 Sinukat na anamaet nin anghil a padil, ket 66 mitro a kataꞌgayan sa panunukat a inusar na a saytin lamang a panunukat nin manꞌusaren nin tawo.d
18 Si syudad ket puro yan balitok nin malino a bilang nin kristal, tan say padil ket baton haspe. 19 Say baton pundasyon nin padil ket nadikurasyunan nin sarbaynan bakas nin mablin bato. Si uꞌna ket nadikurasyunan ya nin haspe; si ikarwa safiro; si ikatlo kalsedonia; si ikaꞌpat esmeralda; 20 si ikalima onise; si ikaꞌnem kornalina; si ikapito krisolito; si ikawalo berilo; si ikasyam topaz; si ikapuloꞌ krisopraso; si ikalabinsaya hasinto; tan si ikalabinrwa ket amatista. 21 Saray labinrway purta ket pirlas; barang sayay purta ket sayay masibulot nin pirlas. Say dudalan sa syudad ket puron balitok nin malino a bilang kristal.
22 Naasikaso ko a kasan timplodtaw sa syudad. Wanin ta si Uunuren a Dios nin Makapangyayadiꞌ sa sarba tan si Karniro, saran diri a timplodtaw. 23 Wanin anamaet a kai ana nin matkap itaw a palaway nan awro tan nan bulan banaꞌ ta si syudad ket palawayan yan salag nan Dios tan si Karniro a tyoꞌ na. 24 Ket saray tutawo sa mundo, palawayan sara liꞌ nin salag nan syudad, tan saray sarba ran magꞌuuray, awiten radtaw liꞌ a kayamanan ra. 25 Say purta nan syudad anamaet ket siaabri banaꞌ ta itaw mapalaway anan lawas a kai ana gapo nin yumabi. 26 Ket say kayamanan tan say kagalangan ran sarban tutawo sa mundo, ikaꞌ liꞌ itaw sa syudad. 27 Baleꞌ kasa gapon makasrep itaw nin sa pangingikit nan Dios ket nikasamaꞌ a bilang saray mampangwaꞌ nin makapasindukel konan Dios tan saray mabulaꞌ, banaꞌ ta saraytaw tamoꞌ saray say ngaran ra ket nakasurat itaw sa libro nan Karniro nin listawan ran saray magkamain nin anggan-angga nin byay a iti konan Dios a makasrep itaw.