Sitin surat ket sinurat naya ni Judas a busat na ni Santiago (1:1) tan angangko ket busat naya anamaet ni Jesu-Cristo (Mateo 13:55). Mataman no si Judas ket sabtan sulit nan isurat konran mammemper a maipaꞌkaꞌ sa pakaisalba, matkap nasara et a lamang nin pau-pauꞌnawan maipaꞌkaꞌ konran mangangakay a mangibarang nin mangikadayoꞌ sa kamaungan nan Dios (1:4). Saraytin palson mangangakay, mangkumbinsyen rasaray mammemper a no naisalba sarayna banaꞌ sa kamaungan nan Dios a pinirduna nasara, say katutuꞌwan ket pauryan nayna kano nin magkasalanan sara banaꞌ ta, say kukasalanan ra, kai rayna nin pakadusawan. Kanyaꞌ nin matkap nan tuloy a bibilinen nasaray mammemper nin pakatalad sara konran saraytin tutawo, sa wanin ket nasadyaꞌ sara nin kumuntra sa saytin makalingon uakay maipaꞌkaꞌ sa kamaungan nan Dios. Ket, nipapanemtem na et ni Judas konra a say katutuꞌwan a nipya nan Dios konra, ket kai ana gapo nin masilyan (1:3). Binaritaan nasara anamaet nin tumarigꞌen sara sa pammemper ra tan tulungan nasaray raruma nin makapoy et a pammemper.