Siꞌkoyti si Juan, a si pangulo ran mammemper^a, a mampanurat komo.

2 Kawaꞌnan kon amigo, sapa kumon ta mabista lawas a kapapaꞌsar mo sa byay tan marigsa ka lawas kapada nin pammemper mon magsen. 3 Oꞌ ta pinasyan ririket kon nakarnge-karngeꞌ nangibwat konran bubsat nin rinmateꞌ iti nin ibat isen a mandumaer ka kano nin mantumumbok sa katutuꞌwan nin nangibwat konan Dios tan mampagkabyay kan kumpruntado sa sayti. 4 Si makapaririket ana nin maong nin tuloy kongko ket si matandaan ko a saray aꞌnak ko sa pammemper ket mampagkabyay saran kumpruntado sa katutuꞌwan.

5 Mampablyen kon busat, sain say pagsisirbi mo konra nin saray bubsat a mampakodsen abirno nin kaꞌki-kaꞌkit mo tamoꞌ konra ket mangipaꞌkit a tutuo ka. 6 Nibari-baritaꞌ ra sa dupong ran mammemper iti sin iti sara a maipaꞌkaꞌ sa adoꞌ mo konra. Ket no dumalan saradsen liꞌ anamana, ipaꞌkit mo anamanaet liꞌ pa a adoꞌ mo a tulungan mosara sa kappako ra tan byan mosaran matka-matkap ra a syay bagay nin gawꞌen konran mampagsirbi konan Dios. 7 Wanin banaꞌ ta mampaku-pako saran ipatandaꞌ ray maipaꞌkaꞌ kona ni Uunuren tamon Cristo tan kai sara mampangrisibi nin animan a matka-matkap ra mangibwat konran amboꞌ nin mammemper. 8 Kanyaꞌ nin matkap a siꞌtamo nin mammemper ket tulungan tamo sara ta pigaw nin makakibalatay atamo sa gawaꞌ ran pangingipatandaꞌ nin katutuꞌwan a nangibwat konan Dios.

9 Sinmurat ako konan dupong ran mammemper isen, baleꞌ si saya a manꞌapesen na a syay maunor, sya si Diotrefes, kai na nin akuen a pakauray ko. 10 Ket no mako akodsen liꞌ, iliwaꞌ ko liꞌ a sarba nin dukaꞌ a man-gawꞌe-gawꞌen na, say pagꞌirgu-irgo na nin bulaꞌ-bulaꞌ a kuntra komi. Anaod, amboꞌ tamoꞌ et in a man-gawꞌen na, no kai edet, kai nasarayna anaod nin akuen a bubsat nin mammemper a maku-makodsen; mamaed ya et nin mangakoꞌ konra ket man-galten nasara et sa dupong ran mammemper a nangakoꞌ konran sarayti.

11 Mampablyen kon busat, andiꞌ mo nin arigen a dukaꞌ a pigagawaꞌ no kai edet, say maabig a arigen mo. Si sayay man-gumwaꞌ nin maabig, maꞌkit a anak nayan Dios, baleꞌ si sayay mampangwaꞌ nin dukaꞌ, kai naya et gapo nakatandaꞌ a Dios.

12 No maipaꞌkaꞌ anamaet kona ni busat a Demetrio, pirayu-rayo raya nin ngaꞌmin ran makatandaꞌ kona. Sa kabibyay na anamaet, maꞌkit a mantumumbok ya sa katutuꞌwan. Mataman siꞌkami anamaet, wanin lamang a patutuꞌwan mi maipaꞌkaꞌ kona tan tandaꞌ mo a tutuoyti nin manꞌibaritaꞌ mi.

13 Abaw et a matkap kon ibaritaꞌ komo baleꞌ kai ko nin rabay nin sa surat tamoꞌ. 14 Rabay koy makodsen sa madaliꞌ anan awro ket makapagꞌirgo ata liꞌ nin pirsunal.

15 Mabista kumon lawas a kapapaꞌsar moyo.

Saray sarba ran bubsat iti, mampakumustawen raka. Pakumustawen mosara anamaet a barang saya konran bubsat isen.