Siꞌko si Judas a sayay aripen na ni Jesu-Cristo tan ari nako ni Santiago^a.

2 Sapa kumon ta masadag-sadag lawas a ingangaꞌdo tan pangangawaꞌnan nan Dios komoyo tan say mabistan kapapaꞌsar a ibi na.

3 Mampablyen kon bubsat, sin manꞌipamuspusan ko a mansumurat komoyo maipaꞌkaꞌ sa nipangisalba nan Dios kontamo ngaꞌmin nin pari-pariho, main nin naiparateꞌ kongko nin namin pakatkapan a isurat ko nin ibibilin pa tana komoyo a iꞌdeng moyay pammemper nin nipya nan Dios kontamon tutawo na. Niꞌsa-niꞌsa nan nibi in nin kai ana nin masilyan. 4 Kapilitan koytin nisurat ta main anamain nin nikidupong isen komoyo nin adi a gagara ra. Kasa gapo nin galang ra konan Dios. Nipaisurat nayna nin naꞌteng nin Dios a maipaꞌkaꞌ sa dusa ra. Say man-gawꞌen ra baleꞌ, mansilyan ray katutuꞌwan nin maipaꞌkaꞌ sa pammirduna nan Dios sa kukasalanan banaꞌ sa pangangawaꞌnan na. Ket, say manꞌiyakay ra, pauryan na kano nin Dios a animan nin gawꞌen tamo ket magwaꞌ tamo a karabayan tamo. Si Jesu-Cristo, syay bukod a Uunuren tan Amo tamo, ket kai raya nin tungtungen.

5 Ket sawanin, rabay ko et nin ipapanemtem komoyo a maipaꞌkaꞌ sa paninintinsya nan Dios konran sarain a klasin tawo mataman no tandaꞌ moyoynan maong a maipaꞌkaꞌ sa sarban saytin ibaritaꞌ ko komoyo. Si Catawan, nilibri nasara yapoꞌ sin saytaw a tutawo na nangibwat sa nipangaripen konra sa Egipto. Baleꞌ, nipapati nasaraytaw lamang nin Catawan saray kai nin nagmatalek a tulungan nasara.^b 6 Main anamaet nin maipaꞌkaꞌ konran saray uanghil a ipapanemtem ko komoyo. Main saray kai nin nagpirmidtaw sa ketegan nin pakauray a nibi nan Dios konra no kai edet, pinauryan ray distino ra sa adapan nan Dios.^c Banaꞌ konan siin ket binaror nasaran gulung-gulong nin kai gapo nin magtang itaw sa sangkadedleman ta pigaw nin no rumateꞌ yaytaw si Sangkaimpurtantiwan nin Awron Paninintinsya, ket sintinsyawan nasara. 7 Bilang sa nipagkasalanan ran sarain nin uanghil a ginwaꞌ ra anamaet nin tutawo sa syudad nin Sodoma tan Gomorra^d tan sa bubabali sa libed-libed ra. Ubra ray nikiraray-raray sa abirno nin siꞌno tan say nangwaꞌ nin inaayep a gawaꞌ-gawaꞌ. Saytaw nin nikadusa ra a nikaꞌ sara sa burung-burong nin apoy a kai gapo nin maꞌrep ket mapalaway a pammau-pauꞌna ana kontamo ngaꞌmin.

8 Wanin man, sarain nin tutawo nin nikidupong isen komoyo, kapadan sain a man-gawꞌe-gawꞌen ra. Main kanon nipaꞌkit konra yupaꞌ sa taynep ket banaꞌ sa sain, mirararay sara ket sayti pakasidaan nin lalaman ran diri tan mansubagen rasaray uunuren ra tan mantuyaꞌ-tuyaen rasaray makapangyayadiꞌ nin pupinarsadtaw sa langit. 9 Baleꞌ si Miguel mataman nin syay sangkataꞌgayan nin anghil, kai na gapo nin ginwaꞌ a wanin. Sin nikiꞌbatan ya konan Dimunyo maipaꞌkaꞌ konan bangkay na ni Moises, kai naya gapo inisip nin bulꞌisan nin makasakit nin saritaꞌ nin pangungukom na no kai edet wana, “Maipatunong naka nin Uunuren.” 10 Baleꞌ, sarain nin tutawo, mantuyaꞌ-tuyaen ra a animan nin kai nin maabot nin kaisipan ra. Say matarusan ra tamoꞌ ket say mangibwat sa kaingaran ra nin bilang saran ayep ket sayti nin lamang a manidaꞌ konra.

11 Undoꞌ anay kaugutan ra! Wanin ta say ginwaꞌ na ni Cain^e ket man-gawꞌen raynamaet! Si lingo na ni Balaam^f ket si inapes na a kwarta ket, sarayti anamaet, mansulitan ran manꞌapesen nin lamang a kwarta! Kapada nin nipagribildi ra ni Core^g konran tinudoꞌ nan pupangulo nin Dios a nipagribildi ran saraytin tutawo ket, say kaugutan raynaod, say kapadan nipanusa konra ni Core. 12 Sarain nin tutawo ket bilang sara nin mansa nin makapadingꞌey no kiririket sara komoyo sa pidudungo moyo nin pangingigalang konan Uunuren tamon si Jesu-Cristo, ta amboꞌ nin manepeg a miririga saran kasan pangingibilang konan Dios tan say nagsi-nagsi sara. Bilang saran gunem a kasan ituroꞌ nin rapeg ket ilpad nin siri ta kasan kakanaan ra.^h Bilang saran kayo nin kai nin gumunga no kuston tyimpo; kai sara tamoꞌ nin nakriꞌ no kai dinutdot sarayna. 13 Bilang saran mispak nin daluyon a mangiyabay nin yabat a sayti ket say makapadingꞌey a gawaꞌ ra. Bilang saran takliꞌ-bituen nin say kaugutan ket say dedlem ta lawas a nasadyaꞌ ya a lugar ran sangkadedleman.

14 Ket, si Enocⁱ nin syay ikapiton puri mangibwat kona ni puon tamon si Adan, main nin nipatandaꞌ nan mangyadiꞌ nin maipaꞌkaꞌ konran sarain anamaet nin tawo a wana, “Kiten moyo! Manrumateꞌ yaynaod a Uunuren nin kalamoꞌ nasaray ribu-ribon anghil nin naitalaga kona 15 ta pigaw nin sintinsyawan nayna a sarba. Ket, ukumen nasaray kasan galang konan Dios sa dukaꞌ a gawaꞌ-gawaꞌ ra nin liningwanan rayay Dios tan sa nipagkasalanan ra banaꞌ sa mabyat a saritaꞌ ra nin binalaw-balaw rayay Dios.”^j

16 Sarain ket bere-bere sara nin pirmi saran manesel. Say tumbuken ra tamoꞌ ket say uapes ra. Marangas sara tan paꞌyu-paꞌyukan rasaray tutawo ta pigaw nin makalap ray rabay ra.

17 Baleꞌ siꞌkamo mampablyen kon bubsat, nepeg nin mapanemtem moyo a nipau-pauꞌna rayna nin gindat komoyo nin saray apostoles nan Uunuren tamon si Jesu-Cristo a 18 wanra, “Sa kalaꞌpusan liꞌ nin panaon, main liꞌ nin manuyaꞌ-tuyaꞌ konan Dios ta say uapes ran diri a tumbuken ra tamoꞌ nin kai raya nin ibiang.”^k

19 Sarain anaod a mampamipuruk-purok kontamon naisalba nan Dios. Say manꞌapesen ra tamoꞌ ket say pakapapdaꞌ nin lalaman ra sa bubagay iti sa mundo. Kasa ya konra a Ispirito nan Dios.

20-21 Baleꞌ siꞌkamo nin mampablyen kon bubsat, pagawan moyoynan maong a kapapaꞌsar moyo nin iti sa pangangawaꞌnan nan Dios. Say gawꞌen moyo ket si dumasal kamo nin mangibwat sa panininreg nan Ispirito nan Dios komoyo; ipaꞌdeng anamaet nin barang saya a byay na sa sangkasagradwan nin pundasyon a say katutuꞌwan nin mantepren tamo; tan wanin anamaet, tagaꞌnan moyon siiilalo a ibi na kontamo nin Uunuren tamon si Jesu-Cristo nin mangibwat sa ingangaꞌdo na a umangga sa anggan-angga nin byay a iti konan Dios.

22 Main saray mampagdwadwa et ket kaꞌdwan moyo saran idwaꞌdwaꞌ.

23 Main sara anamaet a mampamunta ana sa impyirno ket sambuten moyo saran ayaten nin maipalꞌis.

Main sara et anamaet a kaꞌdwan moyo sara baleꞌ pakatalad kamo tan guraen moyo a makaparmay nin gawaꞌ-gawaꞌ ra ta pigaw nin kai kamo nin maumalitan nin pigagawaꞌ ra.