Say nipadar na ni Jesu-Cristo kona ni Juan maipaꞌkaꞌ sa no ani a mangyadiꞌ liꞌ sa adapen a awro (1:2), ket naisurat sin panaon a mangkapai-paidap saray mammemper kona ni Cristo banaꞌ sa pangngibaritaꞌ ra a syay Uunuren. Sin panaon a nisurat nayti ni Juan, sin angan-anganen a pibutlayan nin 81-96 A.D., ket mangkapriso yadtaw sa Patmos, sayay islan adani sa baybay nin Grecia banaꞌ sa pammemper na (1:9). Si sangkaimpurtantiwan nin gagara na ni Juan sa nipanurat na konan siti ket si pagsenen nay kukanakman ra ta pigaw nin dumaer sara sa pammemper ra mataman no mangkapaidap sara o patyen sara et man banaꞌ kona ni Cristo.

Maadal et a maipaꞌkaꞌ sa linaman nan sitin libro sa nibaritaꞌ na ni Jesus sa Mateo kapitulo 24, Marcos kapitulo 13, tan Lucas kapitulo 21. Mabasa et anamaet sa Uꞌnan Tistaminto sa libron Ezekiel tan sa libron Daniel.

Say uꞌnan parti nan sitin libro ket say pito ran surat konran piton dupong ran mammemper itaw sa prubinsyan Asia. Ipaꞌkit nin sayti a kimey nin saka-sakalakon grupo ran tumutumbok kona ni Cristo maipaꞌkaꞌ sa pammadyaꞌdyaꞌ konra tan say bibilin na ni Cristo konra (2:1–3:22).

Say kaꞌbawan nin linaman nan sitin libro ket say nipaꞌkit na ni Jesu-Cristo kona ni Juan nin bilang nin taynep, a sarban sayti ket main nin rabay nin ibaritaꞌ. Saray Cristiano sin panaon na ni Juan, main nin pakataros ra sa rabay nin ibaritaꞌ nin sayti, baleꞌ konran raruma ket maidap nin tarusan. Mataman sawanin, say pananaros nin tutawo sa rabay nin ibaritaꞌ ket amboꞌ nin pari-pariho. Mainumꞌay ya baleꞌ nin matarusan a sangkaimpurtantiwan nin bagay a mampagꞌirgwan iti,