Say
NIPADAR
na ni Jesu-Cristo kona ni Juan
Say Nipanguꞌna nan Namaritaꞌ ni Juan nin say Linaman nan Sitin Libro
1
Say iti konan sitin libro ket say nipadar na ni Jesu-Cristo nin matkap nin mangyadiꞌ ana sa amboꞌ anan maꞌteng. Nipya nayti nin Dios kona ni Jesu-Cristo nin ipatandaꞌ na konran saray tutawo nan Dios nin mampagsirbi kona. Kanyaꞌ nin si Jesu-Cristo, nibakiꞌ naya a sayay anghil na nin ipatandaan nayti kongko nin si Juan a sayay aripen na. 2 Nisurat ko a sarban nipaꞌkit kongko, ket patutuꞌwan ko nin sayti ket peteg a minsahi nin niparateꞌ nan Dios nin nipatandaan na ni Jesu-Cristo.3 Makarmaꞌ yay mamasa konran raruma sa naipadles nin naisurat iti tan makarmaꞌ saraynamaet a makarngeꞌ tan tumulok sa nibaritaꞌ banaꞌ ta sa amboꞌ ana nin maꞌteng ket matukid ana.
Pakumustawen nasara ni Juan a Piton Dupong
4 Siꞌko si Juan.
Surat koyayti komoyon pitona dupong ran mammemper isen sa prubinsyan Asiab.
Sapa kumon ta bindisyunan nakamo tan byan nakamo nin mabistan kapapaꞌsar nin Dios. Sya, main ya sawanin, main yayna sin saytaw et sin taranaꞌ, tan main ya anggan-angga.
Sapa kumon ta bindisyunan nakamo tan byan nakamo nin mabistan kapapaꞌsar nin Ispirito nan Dios a iti ya sa adapan nin tekrean na nin main nin pitoy pakaꞌkitan nin pakayadiꞌ na.c
5 Sapa kumon ta bindisyunan nakamo tan byan nakamo nin mabistan kapapaꞌsar ni Jesu-Cristo.
Syay mapagmatalkan nin mamatutuo sa maipaꞌkaꞌ konan Dios.
Sya a sangkauꞌnawan nin sinmubliꞌ nin mabyay;
tan sya a magꞌuray konra nin sarba ran magꞌuray iti sa mundo.
Sya, kawaꞌnan natamo,
ket binalukasan natamo mangibwat sa pagꞌuuray nin kasalanan tamo
yupaꞌ sa dayaꞌ na nin tinmuroꞌ sin pinati ya.
6 Nibiang natamo sa pagꞌaadiꞌ na ket
ginwaꞌ natamo nin pupadiꞌ nin
magsirbi konan Dios a sya a Dios na tan Ama na.
Itandudoꞌ ya anaod a ngaran na tan magꞌadiꞌ ya anggan-angga!
Peteg a wanin.
7 Ket tandaen moyoyti: Rumateꞌ ya si Jesu-Cristo nin iti ya sa gunem.d
Ket sarba ran tutawo maꞌkit raya.
Pati saraytaw saray namapasak kona, maꞌkit raya liꞌ.
Ket sarba ran tutawo sa mundo, banaꞌ kona, mangabet-abet sara liꞌ sa bereng ra.e
Peteg a wanin ana liꞌ a mangyadiꞌ.
8 Si Uunuren a Dios, a sya ket Makapangyayadiꞌ ya sa sarba tan sya anaod ket main ya sawanin, main yayna sin saytaw et sin taranaꞌ, tan main ya anggan-angga wana,
“Siꞌko a mansabtan nin Alpha tan Omega.”f
Say Nikaꞌkit na ni Juan kona ni Cristo a Sangkataꞌgayan
9 Siꞌko anaod si Juan nin busat moyon mammemper. Kalamoꞌ rako anamaet nin siꞌkamon tumutumbok na ni Jesus ket kapada moyo, mampangirangep ako nin idap tan madaer ako tan mangkipagꞌuray ako kona. Banaꞌ ta nipatandaan koy minsahi nan Dios tan nipatandaꞌ koy maipaꞌkaꞌ kona ni Jesus, sinintinsyawan akon nitampal iti sa isla nin Patmos.
10 Sayay awron Linggo a sya anaod a awro nan Catawan, si Ispirito nan Dios naidumay nipagꞌuray na kongko. Ket kapingmatan main anan maksaw nin busis a narngeꞌ ko sa gurot ko nin baraꞌmon tunoy nin trumpita a 11 wana, “Isurat mo a maꞌkit mo ta pigaw nin ipaꞌwit mo liꞌ sa saytin pitoy dupong ran mammemper sa sayti nin syudad: Efeso, Esmirna, Pergamo, Tiatira, Sardis, Filadelfia tan Laodicea.”
12 Sin narngeꞌ koya anaod a busis, nibring ako nin inmadap ta pigaw nin kikiten ko no siꞌno a mampagꞌirgo, ket main nin naꞌkit ko nin pito ray balitok a pammatukduan nin lampadawan. 13 Sa butlay ran sarayti ket main nin sayay bakas nin tawog a nakasulot yan bata nin anggan sakal a kaanrwan na tan main nin sas nan balitok sa kereph. 14 Pinasyan putiꞌ nin sabot na nin bilang kapas tan say mata na ket baraꞌmon umapoy. 15 Pinasyan sileng nin ayi na nin bilang gansaꞌ nin niringgas nin nilutoꞌ sa apoy, tan say busis na ket bilang kanurkor nin alalakin daluyon. 16 Sa wanan nin gamet na ket main nin gaꞌget nan pito ray bituen. Main nin lumiwaꞌ sa bebey na nin pinasyan tadem nin ispada nin dubli a tademi na tan say rupa na ket makapurar nin bilang sa salag nan awro no ugtiawro.
17 Sin naꞌkit koya, baraꞌmo akon nati nin nilukbob sa adapan na. Baleꞌ nigaꞌget naya a wanan nin gamet na kongko miꞌsa wana,
“Andiꞌ ka nin maliꞌmo banaꞌ ta siꞌkoyti si taranaꞌ tan si kalaꞌpusan nin sarba.j
18 Siꞌko yay Si Lawas a Sibibyay.k Mataman nin pinati ako, sinmubliꞌ akoynaod nin mabyay anggan-angga. Siꞌko a main nin pakayadiꞌ sa patiti tan main nin pakayadiꞌ nin abryan o isadaꞌ yay lugar ran nati anal.
19 Anaod, isurat mo a naꞌkit mo, say mangyadiꞌ ana sawanin tan say mangyadiꞌ et anaod liꞌ. 20 Sawanin, say pipaꞌkaan nin saray piton bituen a gaꞌget ko sa wanan nin gamet ko tan saray piton balitok a pammatukduan nin lampadawan, kai nin nipapalaway nin gindat baleꞌ ipatandaan koyna komo sawanin. Saray piton bituen, sara a pito nin ibabakiꞌ nan Dios sa piton dupong ran mammemper. Saray piton balitok a pammatukduan nin lampadawan, sara a piton dupong ran mammemper.”