Si Surat konan Dupong sa Syudad nin Efeso
2
Wana kongko, “Wanti a isurat mo konan ibabakiꞌ nan Dios konan dupong ran mammemper itaw sa syudad nin Efeso:‘Siꞌko yay si mampangaꞌget nin pito ray bituen sa wanan nin gamet ko tan si manlumala-lalako sa butlay ran piton balitok a pammatukduan nin lampadawan.
Ket sayti a ibaritaꞌ ko komoyodsen:
2 Tandaꞌ ko a kabibyay moyo. Tandaꞌ koy seseg moyon man-gumwaꞌ nin maong tan mampangitpel kamo para kongko. Tandaꞌ ko et a mangkuntrawen moyo saray dukaꞌ a tutawo. Sinubok moyo saraytaw saray mampangibaritaꞌ a kano ket apostol kosara, ket napatutuꞌwan moyo a mampiwadiꞌ-wadiꞌ sara. 3 Tandaꞌ ko a manꞌitpel moyo a mangkasariꞌ moyo nin idap banaꞌ ta tumutumbok katamo, tan kai kamo nin mantumapoꞌ a gurutan moyoynay katutumbok moyo kongko.
4 Wanin man, main yayti e nin kai ko nin rabay a gawaꞌ moyo. Say maꞌmot nin pangangawaꞌnan moyo sin tinmaranaꞌ kamon mamper ket rinmayꞌep ana. 5 Ket panemtemen moyo pa a maꞌmot nin pangangawaꞌnan moyo sin saytaw. Oꞌ, pagbabawian moyoynay dukaꞌ a gawaꞌ moyo ket gawꞌen moyo anamanaytaw say ginwaꞌ moyo sin kataranaꞌ moyon nagꞌin nin mammemper ta, no kai moyo nin gurutan a dukaꞌ a gawaꞌ moyo, keen katamodsen nin dusawen ket galten katamo sa kuston lugar moyo bilang mammimin palaway. 6 Baleꞌ main yayti anamaet e nin raywen ko komoyo:
Guraꞌ moyo nin kapadan guraꞌ ko a gawaꞌ ran saray mantawagen nin Nicolaitaa.
7 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper! Ket saray manalo maipaꞌkaꞌ sa sain, byan kosaran kanepegan nin mangan nin bunga nan kayon mamin byayb nin itaw sa gardin sa kamiꞌnan nan Dios!’ ”
Si Surat konan Dupong sa Syudad nin Esmirna
8 Sinmunor wana, “Wanti a isurat mo konan ibabakiꞌ nan Dios konan dupong ran mammemper itaw sa syudad nin Esmirna:
‘Siꞌko yay si taranaꞌ tan kalaꞌpusan nin sarba. Siꞌkon lamang taw si nati nin sinmubliꞌ nin mabyay.
Ket sayti a ibaritaꞌ ko komoyodsen:
9 Tandaꞌ ko nin mampangitpel kamo nin dyaꞌdyaꞌ tan tandaꞌ ko nin mumaidap kamo, baleꞌ say katutuꞌwan ket ikon moyoy tutuon kayamanan a mangibwat sa langit. Tandaꞌ ko et nin dukaꞌ a manꞌibari-baritaꞌ ra maipaꞌkaꞌ komoyo nin saray mampamaritaꞌ a tutawo nasaran Dios, baleꞌ say tutuo ket amboꞌ nasaran tutawo no kai pakairaywan nasara ni Satanas. 10 Andiꞌ moyo nin ikaliꞌmo a pammadyaꞌdyaꞌ nin adapen moyoyna nin irangep. Tandaen moyoyti: Ipapriso nasaran Dimunyo a umno ra komoyo nin sayay panunubok komoyo. Mapadyaꞌdyaꞌ kamo sa luob nin mapuloꞌ a awro. Baleꞌ dumaer kamo nin magmatalek kongko mataman et nin pakamatyan moyo ta byan katamo liꞌ nin si primyo a say anggan-angga nin byay a iti konan Dios.
11 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper! Saray manalo maipaꞌkaꞌ sa sain, kai sara liꞌ nin maranod sa mansabtan nin ikarwan patitic.’ ”
Si Surat konan Dupong sa Syudad nin Pergamo
12 Sinmunor wana, “Wanti a isurat mo konan ibabakiꞌ nan Dios konan dupong ran mammemper itaw sa syudad nin Pergamo:
‘Siꞌko a main nin matadem nin ispada nin dubli a tadem na.
Ket sayti a ibaritaꞌ ko komoyodsen:
13 Tandaꞌ ko a si babali moyo ket lugar ya nin mampagꞌadian na ni Satanas. Wanin man, mandumaer kamo et nin tutuo kongko. Kai moyo nin ginurutan a pagmamatalek moyo kongko mataman sin panaon a pinati rayadsen si Antipas a syay tutuon mangingiꞌdeng kongko isen komoyo sa lugar nin mampiikap ya si Satanas.
14 Baleꞌ main ti e nin kai ko nin rabay a gawaꞌ-gawaꞌ moyo ta, saray raruma komoyo, mansunuren raytaw say niyakay na ni Balaamd. Nipaꞌkit na intaw a padalan kona ni Balak nin matukso nasaran magkasalanan a puri na ni Israel. Ket anaod, nangan saran niyatang sa dios-dios tan nikiraray sara konran amboꞌ ran asawa. 15 Ket kapada ra, main sara anamaet komoyo a mansunuren ray akay ran Nicolaita. 16 Anaod, pagbabawian moyoynay dukaꞌ a gawaꞌ moyo ta no kai, sa amboꞌ ana nin maꞌteng ket mako akoynadsen tan labanan kosara in a usaren koyay ispada a lumiwaꞌ sa bebey ko.
17 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper! Saray manalo maipaꞌkaꞌ sa sain, byan kosara nin naiyadi nin mannae. Byan ko anamaet a barang saya konra nin maputiꞌ nin batof a nakaisuratan nin sayay baꞌyon ngarang, a kasa gapo nin makatandaꞌ no ani ya in a ngaran no kai si tawo tamoꞌ nin mangrisibin siti.’ ”
Si Surat konan Dupong sa Syudad nin Tiatira
18 Sinmunor wana, “Wanti a isurat mo konan ibabakiꞌ nan Dios konan dupong ran mammemper itaw sa syudad nin Tiatira:
‘Siꞌko a Anak nan Dios a say mata ko ket baraꞌmon umapoy tan say ayi ko ket baraꞌmo nin gansaꞌ nin pinasileng.h
Ket sayti a ibaritaꞌ ko komoyodsen:
19 Tandaꞌ ko a kabibyay moyo. Kanyaꞌ nin tandaꞌ ko a pangangawaꞌnan tan pagmamatalek moyo, say pagsisirbi moyo sa kalalamoꞌ moyo tan say pangingitpel moyo nin dyaꞌdyaꞌ. Tandaꞌ kon lamang a say pangngawaꞌ moyo nin maabig sawanin ket mas et dyan sa nipangwaꞌ moyo sin nuꞌna.
20 Baleꞌ main yayti e nin kai ko nin rabay, manꞌaburuyan moyaynan kikalamoꞌ komoyo in si babayin si Jezebeli. Manꞌibaritaꞌ na a prupita naya nin Dios, baleꞌ sa manꞌiyakay na, manꞌinaboꞌ nasaray tutawo ko sa pagkakasalanan ta mangkasugsog nasara nin kiraray konran amboꞌ nin manepeg ran kirarayan tan mangan nin niyatang sa dios-dios. 21 Binyan koyayna nin pagkanawanawa nin pagbabawian nayna a dukaꞌ a gawaꞌ-gawaꞌ na tan gurutan nayna a nikasamaꞌ a gawaꞌ-gawaꞌ nan bilang pampam, baleꞌ benged ya. 22 Edet, pagmasakiten koya nin kai yayna makabangon sa idaan na. Ket sara anamaet a nikiraray-raray kona, pangirangepen kosaran maong nin idap no kai ra nin gurutan a pangngawaꞌ nin dukaꞌ a gawaꞌ-gawaꞌ nin kalamoꞌ na. 23 Ket saray tumutumbok na nin manꞌikwintan aꞌnak na, patyen kosaran kasan ingangaꞌdo. Sa wanin, matandaan ran mammemper sa sarban lugar a siꞌko a makatandaꞌ sa kukaisipan tan kanakman ran tutawo. Tubaleen ko a barang saya komoyo dipindi sa ginwa-ginwaꞌ na.
24 Baleꞌ, siꞌkamon raruma nin isen sa Tiatira a kai moyo nin mansunuren a dukaꞌ nin akay na ni Jezebel tan kai moyo nin inadal a wanran ararem a katutuꞌwan mangibwat kona ni Satanas, kai koyna nin lamuꞌnan a manꞌipatumbok ko komoyo. 25 Si ibaritaꞌ ko tana komoyo ket si dumaer kamoyna sa wanin a kabibyay moyoj anggan rumateꞌ ako. 26-28 Ket saray manalo maipaꞌkaꞌ sa sain tan tumuluy-tuloy nin mangwaꞌ nin karabayan ko anggan sa anggawan nan sitin panaon, byan kosaran pakayadiꞌ nin kapada nin pakayadiꞌ a nibi nan Ama ko kongko. Pagꞌurayen kosara sa sarban nasyon iti sa lutaꞌ. Ket mairot a pagꞌuuray ra, a saray kai nin mangalilbiꞌ sa pakayadiꞌ ra ket magꞌin nin baraꞌmo saran paya nin supaken nin pasak.k Ibi koya et liꞌ konra a kabuntatalaꞌ nin maꞌkit no parbangon.l
29 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper!’ ”