‘Siꞌko a kamiꞌnan nan Ispirito nan Dios nin main nin piton pakaꞌkitan nin pakayadiꞌ na.^a Siꞌkon lamang a mampangaꞌget nin pito ray bituen.^b.

Ket sayti a ibaritaꞌ ko komoyodsen:

Tandaꞌ ko a kabibyay moyo. Tandaꞌ ko a bandunado kamon main nin byay moyon iti konan Dios, baleꞌ say katutuꞌwan ket nati kamo. 2 Naꞌkit ko a say kabibyay moyo ket kai et nin sadag nin mamaririket konan Dios nin mampagsirbyan ko. Kanyaꞌ nin mimata kamo ta pabaꞌyuwen moyo a duta nin pammemper moyo ta dandani ana nin maꞌrep. 3 Panemtemen moyo a niyakay intaw komoyo nin inakoꞌ moyo. Sunuren moyo in tan pagbabawian moyoynay kukasalanan moyo ta no kai, bigraꞌ ako liꞌ nin rumateꞌ nin bilang konan sayay mannakaw a kai moyo nin tandaꞌ no kaꞌno a irarateꞌ ko, ket dusawen katamo.

4 Wanin man, main et nin umno radsen komoyo sa Sardis a say seket ra ket kai nin namansawan a say rabay nin irgwen ket kai sara nin naikalamoꞌ nin nangwaꞌ nin dukaꞌ. Kala-kalamoꞌ rako liꞌ nin nisket sara nin maputiꞌ banaꞌ ta maikanaꞌ saran wanin. 5 Saray manalo maipaꞌkaꞌ sa sain, pasketan sara liꞌ anamaet nin maputiꞌ nin bilang konra tan kai ko galten a ngaran ra sa libron listawan ran magkamain nin anggan-angga nin byay a iti konan Dios. Oꞌ, alilbien kosara liꞌ nin tumutumbok ko sa adapan nan Ama ko tan saray uanghil na.

6 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper!’ ”

‘Siꞌko yay si Masantos nin peteg tan mapagmatalkan. Naibi kongko a kanepegan nin magꞌuray sa pagꞌadian na ni Adiꞌ David^c. No abryan koyay purta ta pigaw nin makasrep yay sayay tawo sa pagꞌadian ko, kasa gapon siꞌnuman a makapangisadaꞌ, tan no main nin sadaan ko sa rikor, kasa gapon siꞌnuman nin makapangabri.

Ket sayti a ibaritaꞌ ko komoyodsen:

8 Tandaꞌ koy kabibyay moyo. Mataman no amboꞌ kamon maimpluwinsya, mandumaer kamon mantumulok sa akay ko, a tutuo kamo kongko. Edet, main ya in si purta nin inabryan ko para komoyo nin kasa gapon makapangisadaꞌ.

9 Main anadsen sa lugar moyo a say paꞌsar ra ket dupong ran tutawo na ni Satanas banaꞌ ta manꞌibaritaꞌ ra a tutawo nasaran Dios baleꞌ, mampibulaꞌ-bulaꞌ sara banaꞌ ta amboꞌ in nin tutuo. Anaod sarain, gawꞌen ko liꞌ a manalimukod sara sa adapan moyo, ket, matandaan ra a kawaꞌnan katamo. 10 Ket banaꞌ ta nitpel moyo a dyaꞌdyaꞌ nin sigon sa bibilin ko komoyo, iyilag^d katamo liꞌ sa masakit nin dyaꞌdyaꞌ nin rumateꞌ a irangep nin sarban tutawo sa mundo ta pigaw nin masubok sara ngaꞌmin.

11 Sa amboꞌ nin maꞌteng ket mako akoynadsen. Kanyaꞌ nin dumaer kamo sa sain nin mabista ta pigaw nin si kuruna nin primyo a ibi kon para komoyo ket, kai ya maibi sa raruma. 12 Saray manalo maipaꞌkaꞌ sa sain, ket gawꞌen kosara nin bilang tuꞌdek nan Kamiꞌnan nan Dios a mampagsirbyan ko, ket kai sarayna gapo nin mategeꞌ o maglat sa sain a kapapaꞌsar ra. Imarka koya konra a ngaran nan Dios a mampagsirbyan ko tan si ngaran nan syudad nan Dios ko a syay baꞌyon Jerusalem a kumayupaꞌ iti mangibwat konan Dios ko itaw sa langit. Imarka koya anamaet konra a baꞌyo nin ngaran ko.

13 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper!’ ”

‘Siꞌko yay si “Amen”^e sa sarban gawaꞌ nan Dios. Siꞌkoy mapagmatalkan nin mangwaꞌ sa sarban ipagwaꞌ na tan mamatutuon peteg nin maipaꞌkaꞌ kona. Mangibwat kongko, pinarsa nan Dios a sarba.

Ket sayti a ibaritaꞌ ko komoyodsen:

15 Tandaꞌ ko a kabibyay moyo. Amboꞌ kamon maꞌmot ni marayꞌep sa pakikalamoꞌ moyo kongko! Kumon ket maꞌkit nin masibulot a pakikalamoꞌ moyo kongko, no kai ket, maꞌkit ana edet nin kasan pakikalamoꞌ moyo kongko. 16 Ket banaꞌ ta wanin moyo, isuka katamo nin bilang sa ranom nin iti sa bebey nin makapasuka a taway. 17 Oꞌ say wamoyo mayaman kamo ket mabistaynay kapapaꞌsar moyo tan kasayna nin pagkurangan moyo, baleꞌ kai moyo nin tandaꞌ a say katutuꞌwan ket kudwaꞌdwan kamo. Anaod, pubri, bulag tan labos kamo sa pangingikit nan Dios. 18 Banaꞌ sa sain, ibaritaꞌ ko komoyo a manaliw kamo kongko nin puron balitok ta pigaw nin yumaman kamon peteg sa pangingikit nan Dios. Manaliw kamo anamaet kongko nin maputiꞌ nin aysing ket isket moyo ta pigaw nin kai na maꞌkit nin Dios a kadingꞌeyan moyo banaꞌ ta labos kamo. Manaliw kamo et a lamang kongko nin ipanambar sa pagꞌin moyo nin bulag ta pigaw nin maꞌkit moyo a katutuꞌwan.

19 Panemtemen moyo a sarba ran kawaꞌnan ko, kasagran tan disiplinawen kosara nin pangangakay ko konra. Ket anaod, pagbabawian moyoynay pagꞌin moyon matabꞌang tan pakaseseg kamo sa kabibyay moyon matulok kongko. 20 Oy! Iti ako sa purta moyo nin mangkumutana. No main nin tawon makarngeꞌ kongko ket abryan naya a purta para kongko, sumrep ako tan midungo kami. 21 Saray manalo maipaꞌkaꞌ sa sain, byan kosaran kanepegan nin kitekreꞌ kongko nin magꞌuray kapada a siꞌko, nanalo ako ket nikitekreꞌ ako konan Ama ko ta pigaw nin magꞌuray ako.

22 Siꞌkamo nin mampangrengeꞌ, tarusan moyoytin manꞌibaritaꞌ nan Ispirito nan Dios komoyo nin mammemper!’ ”