Si Nakatekreꞌ sa Truno
4
Kayadiꞌ nin nipaꞌkit in kongko, main anamana nin sakalako nin nipaꞌkit kongko. Anaod, main nin purta sa langit nin nakaabri. Narngeꞌ koyaytaw anamana si busis nin narngeꞌ ko intaw a baraꞌmon tunoy nin trumpita. Wana kongko,“Muliꞌ kadti ta ipaꞌkit ko komo a matkap nin mangyadiꞌ ana sa adapen nin awro.”
2 Ket kapingmatan ana, niꞌras nakodtaw sa langit nin Ispirito nan Dios. Ket, main nin naꞌkit ko nin truno a main itaw nin nakatekreꞌ. 3 Sitaw si nakatekreꞌ, kumidlap a bakas na nin bilang mablin bubato a mantawagen nin haspe tan kornalina. Sa libed nan truno ket main nin kabunlalakaw a kumidlap nin bilang sa mablin bato a mantawagen nin esmeralda. 4 Sa libed nan truno ket main a lamang nin rwampuloꞌ tan aꞌpat ray sakalako et nin truno a main nin nakatekreꞌ nin rwampuloꞌ tan aꞌpat ray pupangulo. Nakaseket sara nin maputiꞌ tan nakurunawan sara nin balitok. 5 Itaw sa truno ket kumidla-kidlap a kimat nin kaaluyon a mababyeg a tunoy nin kudor. Sa adapan nan truno ket main nin pito ray mandumta nin tyoꞌ a sayti a piton pakaꞌkitan nin pakayadiꞌ nan Ispirito nan Dios. 6 Sa adapan na anamaet nin truno ket main nin baraꞌmon taaw nin sarming a malinon bilang kristal.
Sa libed nan truno sa sarban riking na ket itaw sara a aꞌpat ray mabyay a pinarsa a say lalaman ra ket napnoꞌ nin mata sa adapan tan sa gurot. 7 Si pinarsa sa uꞌna, say bakas na ket bilang nin leon; si ikarwa ket bilang nin baka; si ikatlo ket say rupa na, bilang nin tawo; tan si ikaꞌpat ket bilang yan manlumpad a agila. 8 Saraytin aꞌpat nin sibibyay a pinarsa, si barang saya konra ket main nin aꞌnem ray pakpak na tan napnoꞌ nin mata a lalaman na pati sa rarem nin pakpak na. Si kasan painawa nin gawaꞌ ra sa awro tan yabi ket say magkanta a wanra,
“Masantos yay Makapangyayadiꞌ sa sarba a Dios.
Syay Uunuren nin Masantos nin kasa gapon makakipada kona.
Main yayna sin saytaw et sin taranaꞌ,
main ya sawanin,
tan main ya anggan-angga.”a
9 Manꞌalilbien ra a kataꞌgayan nan si nakatekreꞌ itaw sa truno a mabyay ya anggan-angga, tan mampagalangan raya tan mampakisalamatan raya. Ket no saytaw no man-gawꞌe-gawꞌen ra in, 10 saraytaw saray rwampuloꞌ tan aꞌpat a pupangulo, lumukbob sara sa adapan na nin truno a manraywen rayaytaw si nakatekreꞌ itaw nin mabyay anggan-angga. Ibulꞌis ran ibi a kuruna ra sa adapan nan truno leleg a wanra,
11 “Siꞌkay Uunuren tan Dios mi.
Maikanaꞌ a ipataꞌgay tan igalang ka
tan alilbien a pakayadiꞌ mo.
Oꞌ a ta siꞌka a namarsa nin sarba.
Banaꞌ ta siin a rabay mo,
naparsa tan main ana a sarba.”