Main nin Pakayadiꞌ nan Manusa nin Karniro
5
Naꞌkit ko et a sitaw si nakatekreꞌ itaw sa truno ket main nin gaꞌget na sa pawanan nin gamet na nin kasuratan a nalulon. Siti ket nasuratan ya sa rubariꞌ tan rubariꞌ tan dinalitan ya sa rigri-rigrig nin pito ray baraꞌmon natimbriwan nin silyoa. 2 Kaaram, main nin naꞌkit kon sayay mapwirsa nin anghil a wanan maksaw, “Siꞌno a maikanaꞌ nin manglat nin saytin silyo tan abryan yay kasuratan?” 3 Baleꞌ mataman nin sa langit, o sa lutaꞌ, o sa rarem nin lutaꞌ sa kamiꞌnan ra nin nati, kasa gapo ni sayay maikanaꞌ nin abryan nayay kasuratan o basawen na a naisurat. 4 Kanyaꞌ nin pinasyan idap nin nakem ko a inmakis ako banaꞌ ta kasan madumog nin maikanaꞌ nin mangabri o mamasa konan kasuratan. 5 Ket sin sain, wana nin saya konran pupangulo kongko, “Andiꞌ ka nin umakis. Kikiten mo! Main ya a si mansabtan nin si Leon a sayay puri na ni Judab a puri nan lamang ni adiꞌ Davidc. Sya, tinalo nasaray mangkumuntra konan Dios kanyaꞌ nin main nin pakayadiꞌ nan manglat nin silyo tan mangabri konan si kasuratan.”6 Ket, main nin naꞌkit kon sayay Karniro nin nakaꞌdeng sa pibutlayan nan truno tan saray aꞌpat a sibibyay nin pinarsa; iti ya konran saray rwampuloꞌ tan aꞌpat a pupangulo. Maꞌkit sa bakas nan siti a pinati yayna intaw. Main nin pito ray sara na tan pito ray mata na a syayti a Ispirito nan Dios, nin say pakayadiꞌ na ket main nin piton pakaꞌkitan a nibakiꞌ-bakiꞌ nan Dios sa intiron sangkamundwan. 7 Ket, nako yay Karniro sa truno tan kinalap nayay nalulon nin kasuratan sa wanan nin gamet nan si nakatekreꞌ itaw. 8 Sin wanin, saraytaw saray aꞌpat a sibibyay a pinarsa tan saray rwampuloꞌ tan aꞌpat a pupangulo, linmukbob sara sa adapan na. Si barang saya konra ket main nin arpa na tan main nin gaꞌget nan balitok nin yawong a napnoꞌ nin insinso nin sayti a dudasal ran tutawo nan Dios. 9 Ket kinantawan raya nin sayay baꞌyon kanta a wanra:
“Siꞌka a maikanaꞌ nin mangalap konan linulon a kasuratan
tan manglat nin silyo,
banaꞌ ta pinati ka, ket say dayaꞌ mo a nipambot mo konra nin tutawo
ta pigaw nin ikon nasaraynan Dios nin
mangibwat sa sarba nin puri, saritaꞌ, dayaꞌ tan nasyon.
10 Nibiang mosara sa pagꞌaadiꞌ mo
ta pigaw nin makakipagꞌuray sara komo sa lutaꞌ,
tan ginwaꞌ mosara nin pupadiꞌ nin
magsirbi konan Dios tamo.”
11 Kinmikit ako anamana ket main nin naꞌkit kon uanghil tan narngeꞌ koy busis ra. Kai sara nin mabilang sa kaꞌbawan ra banaꞌ ta milyu-milyon sara. Nalibed raya a truno tan saray aꞌpat a sibibyay a pinarsa tan saray pupangulo. 12 Mampanganta saran maksaw a wanra,
“Si Karniro nin pinati,
ket maikanaꞌ ya a main kona a pakayadiꞌ tan kayamanan tan kadunungan tan gesen.
Raywen tamoya, igalang tamoya, tan itandudoꞌ tamoya.”
13 Ket, narngeꞌ koy panganganta ran sarba ran itaw sa langit, iti sa lutaꞌ, itaw sa rarem nin lutaꞌ a syay lugar ran nunati, tan itaw sa taaw. Sarba nin pinarsa sa intiron sangkamundwan ket wanra nin manꞌikanta,
“Siti si nakatekreꞌ sa truno tan si Karniro nin pinati,
raywen sara, igalang sara, itandudoꞌ sara
tan alilbien a pakayadiꞌ ra anggan-angga!”
14 Ket saray aꞌpat a sibibyay a pinarsa, wanra nin niꞌbat, “Peteg a wanin anaod!” Sara anamaet a rwampuloꞌ tan aꞌpat a pupangulo, linmukbob sara tan nangrayo sara anamanaet kona nin si nakatekreꞌ sa truno tan kona nin Karniro.