Say Panglat nin say Muꞌnan Aꞌnem a Silyo
6
Ket naꞌkit koya a Karniro nin ginlat naya a primiro nin silyo. Ket narngeꞌ koyan nagꞌirgo a saya konran aꞌpat a sibibyay nin pinarsa nin say tunoy na ket baraꞌmo nin kudor. Wana, “Paradti.” 2 Anaod, sin kinmikit ako, kapingmatan anan main nin linumwaꞌ nin maputiꞌ nin kabayo a main nin nakaruran kona nin main nin gaꞌget nan panaꞌ a armas nan kilaban. Kinurunawan ya nin sinyal a binyan yan pakababaꞌ nin manalo. Kayadiꞌ, nibwat yayna nin keen nasara talwen a kukalaban na.3 Ket, sin ginlat nayan Karniro a ikarwan silyo nan nalulon a kasuratan, narngeꞌ koy tunoy nan ikarwan sibibyay a pinarsa a wana, “Paradti.” 4 Kapingmatan anan linumwaꞌ yay sayay muꞌdit nin kabayo a si nakaruran kona ket binyan yan pakayadiꞌ nin mamangibwat nin gira iti sa lutaꞌ ta pigaw nin mipapatyan saray tutawo. Sayay alakin ispada a nibi kona.
5 Ket, sin ginlat nayan Karniro a ikatlon silyo, narngeꞌ ko a tunoy nan ikatlon sibibyay a pinarsa. “Paradti,” wana. Edet, naꞌkit kon kapingmatan anan linumwaꞌ yay sayay mangisit nin kabayo. Si nakaruran kona ket main nin gaꞌget nan kikilwan. 6 Kaaram, nakarngeꞌ akon baraꞌmo nin busis a nangibwat sa busel ran aꞌpat a sibibyay a pinarsa. Wana, “Rumateꞌ ana a panaon a main nin bitil itaw sa lutaꞌ, ket si maꞌkitan nan sayay tawo sa sayay awro makasaliw tamoꞌ nin kanen na sa sayay awro, byas o mais. Baleꞌ andiꞌ mo nin paꞌnwen a ladak nin olibo tan say arak nin ubas.”
7 Ket, sin ginlat nayan Karniro a ikaꞌpat nin silyo, narngeꞌ ko a tunoy nan ikaꞌpat a sibibyay nin pinarsa a wana, “Paradti.” 8 Edet, naꞌkit kon kapingmatan anan linumwaꞌ yay sayay silya-silyawan nin kabayo. Si nakaruran kona ket si mantawagen nin Patiti, tan iti sa suyot na ket si mantawagen nin Hades a syay lugar ran nunati. Binyan saraytin rwa nin pakayadiꞌ a patyen rasaray kakaꞌpat nin tutawo sa lutaꞌ sa gira, bitil, sakit tan maatap a uayep.
9 Ket, sin ginlat naya nin Karniro a ikaliman silyo, naꞌkit ko sa sirong nan altara a kukararwa ra nin saray pinati-pati banaꞌ sa katutulok ra sa manꞌipatandaꞌ a nibaritaꞌ nan Dios. 10 Wanra nin nitaꞌway, “Uunuren mi, masantos tan mapagmatalkan ka. Paꞌno kaꞌteng mosara et nin anusan a tutawo sa lutaꞌ baꞌyo mosara nin sintinsyawan ta pigaw nin balꞌen mosaray nangmati komi?” 11 Sinmunor, binyan a barang saya konra nin maputiꞌ nin seket tan nibaritaꞌ konra a tumaꞌgan sara yapoꞌ et nin madaliꞌ anggan si bilang ran kapada ran uaripen na a mapati nin bilang sa nipangmati konra ket makumplito ya.
12 Sikikikit ako, ginlat naya nin Karniro a ikaꞌnem nin silyo sa nalulon nin kasuratan. Ket, rinmayon nin maksaw, tan si awro, nagꞌin yan pinasyan ngisit a bilang kangisit nin aysing nin baliwan. Si bulan ket inmudit yan bilang kaudit nin dayaꞌ. 13 Say bituen, naragrag nangibwat sa langit a bilang nin matatan malagoꞌ a bunga nin puon kayo no maweswes nin siri. 14 Nakasa a kalangitan nin bilang nin kasuratan a bigraꞌ nin nalulon. Sarban tutalugtog tan sarban pupuroꞌ ket naiyalis sa kamiꞌnan. 15 Sarban tutawo sa lutaꞌ ket linmiꞌmo. Saray uadiꞌ tan saray raruma et nin pupangulo, saray upisyalis ran sundaloꞌ, saray mumayaman tan saray raruma et nin maimpluwinsyan tutawo, tan sarba et nin raruman tutawo nin aripen o amboꞌ nin aripen, nako sara ngaꞌmin nin inmadi sa yuyukib tan sa bubato sa tutalugtog. 16 Wanra sa tutalugtog tan bubato, “Matbag kamo ta pigaw nin sakban rakami,b ket kai nakami nin maꞌkit nin si mantumekreꞌ sa truno tan mapalꞌisan mi a grabin Pammaleꞌ nan si Karniro. 17 Ay anaod, rinmateꞌ yayna a sangkaimpurtantiwan a awro nin panunusa ra kontamo. Kasa gapon makaagwanta!”