22
Ket, nipaꞌkit naya kongko nin anghil a ilog a ibwatan nin ranom a mamin anggan-angga nin byay a iti konan Dios. Pinasyan lino nan bilang kristal. Siti si ilog ket manꞌumagos ya nin mangibwat sa truno nan Dios tan si Karniro nin 2 dumalan ya sa kabutlayan nan kalsada nan syudad. Sa midmang rigrig nan ilog ket main nin puon nin kayon mamin byay. Gumungayti nin milabinrwa sa sayay taon, miꞌsaa binulan-bulan. Say bulong ket manꞌusaren nin ipamaandaꞌ konran nagsikabarang a tutawo.b 3 Kasayna gapon saytaw say panunusa a nisamba na intaw nin Dios.cSi truno nan Dios tan nan Karniro ket itaw sa syudad, ket saray tutawo nan Dios, mampagsirbi sara kona 4 tan maꞌkit ra a rupa na, tan si ngaran na, maisurat ya sa waleng ra. 5 Kai anadtaw nin yumabi, ket kai rayna matkap a tyoꞌ o say palaway nan awro banaꞌ ta si Uunuren a Dios a mamalaway konra. Kipagꞌuray sara kona anggan-angga.
6 Ket, wana kongko nin anghil, “Sarban saytin nibari-baritaꞌ komo ket tutuo tan peteg a mapagmatalkan. Wanin ta si Uunuren a Dios nin mampamakiꞌ konan Ispirito nan mangipatyoꞌ nin kanakman ran prupita na, ket syan lamang a namakiꞌ nin anghil nan ipatandaan na konran tutawo nan mampagsirbi kona a matkap nin mangyadiꞌ ana sa amboꞌ anan maꞌteng. 7 Ibaritaꞌ nan Catawan konra,
‘Anaod, sa amboꞌ ana nin maꞌteng ket mako akoynadsen! Ket makarmaꞌ yay tawo nin mantumulok sa naipadles iti.’ ”
Say Pammatutuo na ni Juan sa saytin Naisurat
8 Siꞌko a si Juan, narnge-narngeꞌ tan naꞌki-naꞌkit koyti nin bubagay a naisurat iti. Ket sin nayadiꞌ koynayti nin narnge-narngeꞌ tan naꞌki-naꞌkit, linmukbob ako sa adapan nan anghil nin nangipaꞌkit kongko ta pigaw nin raywen koya. 9 Baleꞌ wana kongko,
“Andiꞌ nako nin raywen! Si Dios a raywen mo! Wanin ta saya ako anamaet a lamang nin mampagsirbi konan Dios nin kapada mo tan saray kapada mo a saray prupita tan sarba ran saray mantumulok sa naisurat iti.”
10 Ket wanan nituloy,
“Andiꞌ ka nin misasaet maipaꞌkaꞌ sa naipadles nin naisurat iti, banaꞌ ta say sarba ket mangyadiꞌ ana liꞌ. 11 Ket ta wanin anaod, saray mampangwaꞌ nin dukaꞌ, ituloy ray pangngawaꞌ ran dukaꞌ, tan saray say kabibyay ra ket nikasamaꞌ, ituloy ray kabibyay ran nikasamaꞌ. Sara baleꞌ a say man-gawꞌen ra ket maabig, ituloy ray pangngawaꞌ ran maabig, tan saray lison naikanaꞌ konan Dios, ituloy ray lison naikanaꞌ konan Dios.
12 Wana ni Jesus,
‘Anaod, mako akoynadsen sa amboꞌ anan maꞌteng! Ket no mako akodsen, awit ko a manepeg nin tubaleꞌ sa barang saya nin dipindi sa ginwa-ginwaꞌ ra. 13 Siꞌko a mansabtan nin Alpha tan Omega, tan main akoyna sin nuꞌna tan main ako et liꞌ anggan kalansuyutan. Siꞌko et a taranaꞌ tan kalaꞌpusan nin sarban bagay.
14 Makarmaꞌ saray mampalinisen ray seket ra.d Banaꞌ konan siin, magkamain sara nin kanepegan nin sumrep sa purta nan syudad tan mangan nin bunga nan kayon mami nin byay. 15 Baleꞌ kai sara liꞌ nin pasrepen sa syudad a say nikasamaꞌ a man-gawꞌe-gawꞌen ra. Sarain saray manggagamod, saray kiraray sa amboꞌ ran asawa, saray mangmamati, saray mangrarayon dios-dios, tan saray maririktan sa pibulaꞌ-bulaꞌ sa irgo tan sa gawaꞌ-gawaꞌ.
16 Siꞌko nin si Jesus a namakiꞌ kona nin sayay anghil ko ta pigaw nin patutuꞌwan koytin bubagay komoyon mammemper para sa kaabigan nin dudupong moyo. Siꞌkoy si nipadles a puri na ni Adiꞌ a David tan siꞌko a mansabtan nin kabuntatalaꞌ a maꞌkit no kabubuklas.’
17 Si Ispirito nan Dios tan si nubya,e wanra, ‘Para!’
Ket sarba ran nakarngeꞌ nin siti wanra anamaet, ‘Oꞌ, para!’
Si siꞌnuman a milataꞌ, matkap a umarak ya
ta pigaw nin makainom yan kasan bayad nin ranom a mamin anggan-angga nin byay a iti konan Dios.”
18 Siꞌko nin si Juan, pammatalad koyti komoyon sarba nin nakarngeꞌ sa nipadles iti sa sitin libro:
Si siꞌnuman a manglamoꞌ sa naisurat iti, si Dios, lamuꞌnan nan panunusa na a pammadyaꞌdyaꞌ a naibaritaꞌ iti. 19 No main anamaet nin siꞌnuman a bawꞌasan na a nipadles nin naisurat iti, si Dios, galten na a kanepegan nan kipangan nin bunga nan kayon mamin byay tan say kanepegan nan miikap itaw sa syudad nan Dios a naibaritaꞌ iti.
20 Si mampamatutuo sa sarban sayti wana,
“Peteg a mako akoynadsen sa amboꞌ ana nin maꞌteng!”
Peteg a wanin. Pari ana, Uunuren a Jesus.
21 Sapa kumon ta magaꞌmuran moyon sarba a bindisyon na ni Uunuren a Jesus.f