Say Sanribon Taon
20
Ket, main nin naꞌkit kon anghil nin mangkumayupaꞌ mangibwat sa langit, a main nin gaꞌget nan kadina a maꞌget tan tumbok sa sadaꞌ nan priswan nin ubot nin pinasyan kaararman. 2-3 Dinaeg nayan sitin anghil a dragon a syan lamang taw si ulay sin nuꞌna, a sya a Dimunyo nin say ngaran na ket Satanas. Kinadinawan nayayti miꞌsa naya nin nibantak itaw sa priswan nin ubot; miꞌsa naya nin kinandadwan tan sinilyuwan a purta ta pigaw nin kasan magwaꞌ nan Dimunyo nin mangibarang konran tutawo sa mundo anggan mapalabas a sanribon taon. Mapalabas in a panaon, matkap a bulusan ya baleꞌ sa anted a panaon tamoꞌ.4 Kaaram, main nin naꞌkit kon tutruno. Saray nakatekreꞌ itaw ket binyan saran pakayadiꞌ nin manintinsya. Naꞌkit ko anamaet a kararwa ran saraytaw saray pinutol a ulo ra banaꞌ ta nipatandaan ray minsahi a nangibwat konan Dios tan nipatandaꞌ ra a maipaꞌkaꞌ kona ni Jesus. Sarayti anamaet a lamang ket kai sara nin nangrayo konan makapaliꞌmon ayep tan si imahin na tan kai sara nin nipamarka nin si marka na sa waleng o sa gamet ra. Pinasubliꞌ saran mabyay tan binyan nasaran Dios nin pakayadiꞌ nin kipagꞌuray kona ni Cristo sa luob nin sanribon taon. 5-6 Siti a uꞌnan nipamasubliꞌ nin mabyay konran nunati. Saray makaayi konan sitin uꞌnan pammasubliꞌ nin mabyay konran nunati ket makarmaꞌ sara tan naipurok sara para konan Dios. Wanin ta kai raya gapo nin dalanan liꞌ a mantawagen nin ikarwan patiti, no kai edet, pupadiꞌ sara liꞌ nin magsirbi konan Dios tan kona ni Cristo, tan kipagꞌuray sara liꞌ kona sa luob nin sanribon taon. Saray raruma et nin nunati ana, saytaw sara liꞌ nin pasublien nin mabyay no napalabas anay sanribon taon.
7 Mapalabas in say sanribon taon, bulusan ya liꞌ si Satanas 8 ket keen nasara nin ibarang a mansabtan nin Gog tan Magoga a sara a tutawo sa sarban lulugar sa sangkamundwan. Dinepen nasara liꞌ nin mako kigira. Say kaꞌbawan ra ket bilang sa kai mabilang nin buyangin sa baybay. 9 Mako sara mangibwat sa intiron libed nan mundo ta pigaw nin libeden rayay syudad nin kawaꞌnan nan Dios a syay mampiikapan ran tutawo na. Baleꞌ main liꞌ nin apoy nin manaboꞌ mangibwat sa langit ket puuran sara.
10 Ket si Dimunyo nin nangibarang konra, ibantak yadtaw liꞌ sa alawang nin luong nin burung-burong nin asupri nin nangibantakan konan makapaliꞌmon ayep tan si mampibulaꞌ-bulaꞌ a prupita, ket itaw mikakalamoꞌ saran padyaꞌdyaen sa awro tan yabi anggan-angga.
Say Sintinsya nin Ikarwan Patiti
11 Kaaram, main nin naꞌkit kon alawang nin maputiꞌ nin truno tan naꞌkit koya anamaet a nakatekreꞌ itaw. Kapingmatan naandipat sa adapan na a lutaꞌ tan kalangitan ket kai ana gapo nin naꞌkit. 12-13 Naꞌkit kosara anamaet a sarba ran nunati ana nin ataꞌgay man o ayupaꞌ a nikatawo. Mataman no nati saradtaw sa taaw ket itaw sara. Sarba ran nangibwat sa Hades a syay lugar ran nunati ket itaw saran lamang. Nakaꞌdeng sara sa adapan nan nakatekreꞌ sa truno. Ket inabryan a lulibro nin listawan nin ginwa-ginwaꞌ ran tutawo tan inabryan ya anamaet a libron listawan ran saray magkamain nin anggan-angga nin byay a iti konan Dios. Ket sinintinsyawan a barang saya nin naipatukdoꞌ sa nakalista sa saytin lulibro dipindi sa ginwa-ginwaꞌ ra. 14 Ket, say patiti tan si gindat a lugar ran nunati a si Hades ket nibantak sa alawang nin luong nin burung-burong nin apoy. Siti a mansabtan nin ikarwan patiti. 15 Si siꞌnuman anamaet a si ngaran na ket kai ya nin nakalista sa libron listawan ran magkamain nin anggan-angga nin byay a iti konan Dios ket ibantak yadtaw sa alawang nin luong nin burung-burong nin apoy.