Say Bansal sa Kasal nan si Karniro
19
Sinmunor, main nin narngeꞌ kon pinasyan kasaw nin baraꞌmon busis ran pinasyan kaꞌbawan nin tutawon mampangansyon itaw sa langit. Wanra,“Raywen ya a Dios nin Catawan tamo!a
Syay Mangingisalba tan sangkataꞌgayan tan makapangyayadiꞌ ya!
2 Raywen ya ta say paninintinsya na ket matunong tan mapteg.
Anaod sinintinsyawan nayaynan dusawen a bantog a pampam nin nangayat konran tutawo sa nikasamaꞌ a gawaꞌ-gawaꞌ na.
Nibaleꞌ nasaran Dios a tutawo na nin pinati nan siti.”
3 Wanra anamanaet nin maksaw,
“Raywen tamoya a Dios
ta say asok nan mangkapuuran nin syudad ket muliꞌ nin kasan tegen anggan-angga.”
4 Ket saray rwampuloꞌ tan aꞌpat a pupangulo tan saray aꞌpat a sibibyay a pinarsa, linmukbob sara ta pigaw nin raywen raya a Dios nin nakatekreꞌ sa truno. Wanra,
“Peteg a wanin! Raywen ya a Dios!”
5 Ket, main nin narngeꞌ kon busis itaw sa truno a wana,
“Raywen moya a Dios,
siꞌkamon tutawo na nin mampagsirbi tan
mampangigalang kona,
ataꞌgay o ayupaꞌ kamo man.”
6 Kaaram, main nin narngeꞌ kon pinasyan kasaw nin baraꞌmon busis ran pinasyan kaꞌbawan nin tutawo. Say kasaw ket bilang sa kanurkor nin alalakin daluyon o tunoy nin maksaw a kudor. Wanra nin maksaw,
“Raywen tamoya a Uunuren tamo a si Dios nin Makapangyayadiꞌ sa sarba
ta sya, mampagꞌadiꞌ yayna.
7 Matkap a rumiriket tan miririga atamo tan raywen tamo a kataꞌgayan na,
banaꞌ ta narateꞌ ana a kasal nan Karniro.
Si nubya nakasadyaꞌ yayna,
8 ta pinasketan yaynan maputiꞌ nin gawaꞌ sa abel a mantawagen nin diilo
nin pinasyan sileng tan linis.”
Say rabay nan irgwen nin maputiꞌ nin diilo ket say mapteg a gawaꞌ-gawaꞌ ran tutawo nan Dios.
9 Ket wanan anghil kongko, “Isurat moyti:
Makarmaꞌ saray sinagyat nin kibansal sa kasal nan Karniro.” Wana et nin nilamoꞌ,
“Peteg a susaritaꞌ nayti nin Dios.”
10 Kapamaritaꞌ nan sain, linmukob ako sa adapan na ta pigaw nin raywen koya. Baleꞌ wana kongko, “Andiꞌ nako nin raywen! Si Dios a raywen mo! Saya ako anamaet a lamang nin mampagsirbi konan Dios nin kapada mo tan saray sarba ran kapada mon manꞌipatutuo ray pagmamatalek ra kona ni Jesus. Oꞌ, say pipaꞌkaan nin pupadles nin mangibwat konan Dios ket say nipatandaꞌ maipaꞌkaꞌ kona ni Jesus.”
Say Pananalo nan si Nakaruran konan Maputiꞌ a Kabayo
11 Ket, naꞌkit kon niburwang a langit. Edet, main nin linumwaꞌ nin kabayon maputiꞌ tan main nin nakaruran kona nin say tawag kona ket Mapagmatalkan tan Tutuo. Iti sa katunungan a pangungukom na ket iti sa katunungan yan kigira konran nasintinsyawan. 12 Say mata na ket baraꞌmo nin umapoyb tan nakakuruna ya nin abaw. Naisurat ya kona a ngaran na baleꞌ kasan makatandaꞌ nin katarusan na no kai sya tamoꞌ nin bukod. 13 Si sulot nan bata ket nalbet ya nin dayaꞌc, tan say titulo na ket Kabalikasan nan Dios. 14 Saray susundaloꞌ sa langit ket mantumumbok sara kona. Nakaruran sara anamaet sa mapuputiꞌ nin kabayo tan nakaseket saran abel nin maputiꞌ tan pinasyan linis nin mantawagen nin diilo. 15 Siti si mantawagen nin Kabalikasan nan Dios, main nin lumiwaꞌ sa bebey na nin ispada a pinasyan tadem nin ipanaeg na sa sarba nin nasyon, ket mairot nin pagꞌurayan na. Sa pananaeg na konra ket baraꞌmon italma-talmak nasaran bilang sa pespesan nan ubas ta ipaꞌkit na a makapaliꞌmo nin sager nan Dios a Makapangyayadiꞌ. 16 Sa bata tan sa paa na, ket nakasurat a wantin titulo:
“Adiꞌ ran sarban uadiꞌ tan Uunuren ran sarban uunuren.”
17 Ket, main nin anghil nin naꞌkit kon nakaꞌdeng sa awro. Wanan nitaꞌway konran sarban manuk-manok a manlumpad nin ataꞌgay sa kalangitan, “Paradti ta mididinep kamo para sa alakin punsyan nisadyaꞌ nan Dios. 18 Para ta kanen moyo a laman ran uadiꞌ, ran susundaloꞌ tan upisyalis ra, ran kabayo tan saray ruran ra, ran sarban tawo, aripen o amboꞌ man nin aripen, ataꞌgay o ayupaꞌ sara man.”
19 Ket, naꞌkit koyay makapaliꞌmon ayep tan saray mumagꞌuray iti sa lutaꞌ tan saray susundaloꞌ ra nin nididinep ta pigaw nin mako raya girawen a nakaruran sa kabayon maputiꞌ tan saray susundaloꞌ na. 20 Baleꞌ nadakep ya a makapaliꞌmon ayep tan si mampibulaꞌ-bulaꞌ a prupitan nangwa-nangwaꞌ nin makapakaꞌngap nin nangya-nangyadiꞌ nin pagsisirbi na konan makapaliꞌmon ayep. Saytin makapakaꞌngap nin nangya-nangyadiꞌ a nipanglingo na konran tutawo nin namarkawan nin marka nan makapaliꞌmon ayep tan rinayo raya a imahin na. Sarayti nin rwa ket nadakep saraynaod, ket nibantak saran sibibyay itaw sa alawang a luong nin burung-burong nin asupri. 21 Sarba ra anamaet nin sundaloꞌ ra, pinati sara nin ispada a lumiwaꞌ sa bebey nan nakaruran konan kabayon maputiꞌ. Ket saray manuk-manok, sinmawaꞌ saran nangan nin laman ra.