Say Pakasidaꞌ nan si Mampagꞌuray Iti sa Mundo
18
Kayadiꞌ nin nipaꞌkit in kongko, main nin naꞌkit kon anghil nin mangkumayupaꞌ mangibwat sa langit nin main nin alakin pakayadiꞌ na. Ket kinmalaway yay intiron mundo banaꞌ sa salag na. 2 Wanan maksaw,“Nasidaꞌ yayna!
Si mapwirsa nin syudad nin Babilonia ket nasidaꞌ yayna!
Piikapan ya tana sawanin nin dukaꞌ a uispirito tan dudimunyo, tan aadyan yan sarban klasin nikasamaꞌ tan dukaꞌ a mumanuk-manok tan uayep.
3 Nangyadiꞌ in kona banaꞌ ta baraꞌmon pinabok nasara nin mabayanin arak na a tutawo sa sarban nasyon
a say rabay irgwen ket inayat nasara nin gawꞌen a nikasamaꞌ a gawaꞌ-gawaꞌ na.
Nikirilasyon sara kona a mumagꞌuray sa mundo, tan saray kumirsyanti sa intiron mundo, yinmaman sara mangibwat sa nalabas a agom na.”
4 Kaaram, main nin sakalakon busis sa langit nin narngeꞌ ko a wana,
“Siꞌkamo nin tutawo ko, kumadayoꞌ kamo kona. Lakwanan moya in nin syudad ta no kai ket masagyat rakamon magkasalanan nin tutawo na, ket maranod rakamon madusa. 5 Dusawen nayaynan Dios banaꞌ ta no pisusuldungen a kasalanan na ket mirateꞌ ana sa langit, ket si Dios, kai na liningwanan a kadukaan na. 6 Balꞌen ya tan dusawen ya nin tumekep sa sain nin kadukaan na. Say sarban ginwaꞌ nan nipamaidap sa tutawo ket ibaleꞌ kona nin dubli. No paꞌno kabayani a arak nin nipainom na konran raruman tawo, dubli liꞌ sa bayani a ipainom kona. 7 No paꞌno yan nipapdaꞌ tan nipataꞌgay, wanin ya anamaet nin pangirangepen nin pammadyaꞌdyaꞌ tan kaberengan ta wana sa nakem na,
‘Iti ako nin sayay nakatekreꞌ sa truno kon diri! Gumereng ako liꞌ para nin kapada nan sayay balo? Kai gapo!’a.
8 Kanyaꞌ nin midadagop nin mapiꞌsa-piꞌsan rumateꞌ kona a dyaꞌdyaꞌ. Ket mirirngan na anaod nin irangep a sakit, kaberengan tan bitil, miꞌsa puuran ya nin sidaen banaꞌ ta si Uunuren a Dios nin manusa kona ket makapangyayadiꞌ ya.
9 Ket saray mumagꞌuray sa mundo nin nikirilasyon kona tan nipapdaꞌ nin kalamoꞌ na, pinasya liꞌ nin bereng ra tan umakis sara antaran mantamu-tamurawen ra a asok nan mangkapuuran a syudad. 10 Itaw sara liꞌ tamoꞌ sa adayoꞌ banaꞌ sa liꞌmo ran maranod nin mapadyaꞌdyaꞌ. Wanra liꞌ tana,
‘Undoꞌ ana! Sa anted tamoꞌ nin udas ket nasidaꞌ yan dinusa a mapwirsan syudad nin Babilonia! Undoꞌ ana! Anta gindat ket bantog tan alawang ya!’
11 Wanin a lamang, saray kumirsyanti sa mundo ket umakis tan gumereng sara liꞌ banaꞌ kona ta kasaynan manaliw nin tagilakoꞌ ra. 12 Kasayna liꞌ nin manaliw nin balitok tan pirak ra, say mablin bubato tan pirlas ra. Kasayna liꞌ a lamang nin manaliw nin mablin uabel ra a bilang sa mantawagen nin diilo, sida, tan say kulor granati tan muꞌdit. Wanin et sa mababanglo nin kukayo ra, tan sarban klasi nin alikamen nin gawaꞌ sa pangil nin ilipanti, sa mabli nin kayo, sa gansaꞌ, sa pasak tan sa marmol. 13 Kasayna liꞌ a lamang nin manaliw nin kanila ra, nin rika-rikado ra, nin mababanglon amris ra, nin mira ra, nin insinso ra. Wanin et sa arak tan ladak ra, sa arina tan trigo ra, sa baka tan karniro ra, sa kabayo tan karwahi ra, tan uaripen ra. Anaod ikumirsyo ra et a byay nin tawo!
14 Wanra liꞌ nin magkukumirsyo kona,
‘Say sarban mabibista nin bubagay a rabay-rabay mo ket kasayna tan naꞌmet moyna a kayamanan tan kabistawan mo. Ket kai anayti gapo nin maisubliꞌ komo!’
15 Sarayti nin kumirsyanti nin yinmaman sa pagkukumirsyo ra konan siti nin syudad, itaw sara liꞌ tamoꞌ sa adayoꞌ banaꞌ sa liꞌmo ran maranod nin mapadyaꞌdyaꞌ. Umakis sara tan gumereng sara liꞌ 16 a wanra,
‘Undoꞌ ana a nangyadiꞌ konan mapwirsa nin syudad! Sin saytaw, saray tutawodtaw ket niske-nisket saran mablin seket nin mantawagen nin diilo tan kulor granati tan muꞌdit, tan napnoꞌ saran alahas nin balitok, mablin bubato tan pirlas. 17 Undoꞌ ana ta sa anted tamoꞌ nin udas, sarban sayti nin kayamanan ra ket naꞌmet!’
Saray kukapitan nin bapor tan saray tripulanti tan saray pasairo, tan saray raruma et nin say tingkapan ra ket sa taaw, itaw sara tamoꞌ anamaet sa adayoꞌ 18 nin manꞌakisan raya antaran mangkikiten ray asok nan si mangkapuuran nin syudad. Wanra,
‘Kasa gapon makakipada sa kabantugan konan siti nin syudad!’
19 Kwan ran taꞌpok a ulo ra nin pangipaꞌkit nin kaberengan ra mintras a manꞌumakis sara a wanra,
‘Undoꞌ ana a nangyadiꞌ konan mapwirsa nin syudad! Yinmaman ngaꞌmin a kumpanyan bapor nin dinmuong kona. Undoꞌ ana ta sa anted tamoꞌ nin udas, sarban kayamanan na ket naꞌmet!’
20 Siꞌkamo nin mampiikap sa langit,
rumiga kamo banaꞌ sa nangyadiꞌ kona!
Siꞌkamo nin tutawo nan Dios, apostoles tan prupita na,
rumiga kamo anamaet banaꞌ ta si Dios,
sinintinsyawan nayayna sa ginwa-ginwaꞌ na komoyo.”
21 Ket, main nin sayay makapangyayadiꞌ nin anghil a nangalsan bato nin bilang si sangkaalakyan ana nin gigilingan, miꞌsa naya nin nibatibat sa taaw tan wana,
“Wanti ya liꞌ nin kapwirsa nin sidaen a syudad nin Babilonia!b. Kai yayna liꞌ gapo nin maꞌkit nin uman! 22 Kanyaꞌ nin kai sarayna liꞌ nin marngeꞌ a manganganta tan say tugtog ran mannugtog nin arpa, flauta tan trumpita konan siti nin syudad. Kai sarayna liꞌ a lamang nin madumog kona a matutudyoꞌ nin mangwaꞌ nin nagsikabarang a bubagay. Kai anamaet ana liꞌ nin marngeꞌ a gargar nin gigilingan. 23 Kasayna liꞌ gapon tyoꞌ nin maꞌkit nin dumta. Kasayna liꞌ gapon marngeꞌ nin marigan busis ran ikasal. Sain a dusa konan Babilonia banaꞌ ta saray kumirsyantidtaw, masuruk-surok a nakem ra banaꞌ ta wanra ket saray sangkayamanan sa mundo, tan saray tutawodtaw, nibarang rasaray tutawo sa mundo sa nipanikot ra konra.
24 Sain et a dusa konan Babilonia banaꞌ ta itaw nin inmagos a dayaꞌ ran prupita tan tutawo nan Dios. Say dayaꞌ ran sarba ran pinatidti sa lutaꞌ ket madumog konan siin a syudad.”