Say Panunusa konan Bantog nin Pampam
17
Ket, si saya konran pitoy anghil nin mampangaꞌget nin pito ray yawong, nako ya kongko tan wana, “Paradti ta ipaꞌkit ko komo a panunusa konan si bantog nin pampama. Sya nakatekreꞌ ya sa babon abaw nin uilog. 2 Nikirilasyon sara kona a mumagꞌuray sa mundo, ket saray tutawo anamaet sa mundo, baraꞌmo nasaran pinabok nin arak na a inayat nasara sa nikasamaꞌ a pigagawaꞌ na.”3 Kaaram, naidumay nipagꞌuray nan Ispirito nan Dios kongko, ket si anghil, niꞌras nako sa sayay disyirto. Ket, naꞌkit koyadtaw a babayi. Nakaruran ya sa sayay muꞌdit a makapaliꞌmon ayepb nin pito ray ulo na tan mapuloꞌ ray sara na. Sa lalaman nan ayep ket nakasurat a abaw nin titulo nin panguꞌna-uꞌna konan Dios. 4 Say seket nan babayi ket mablin klasi nin muꞌdit tan kulor granati nin abel. Si lalaman na ket napnoꞌ yan alahas nin pirlas tan raruma et nin mablin bato tan nin balitok. Main nin gaꞌget nan balitok nin kupa a napnoꞌ nin say makaparmay tan nikasamaꞌ a ginwa-ginwaꞌ na. 5 Sa waleng na ket naisurat yay ngaran nan main nin ararem a pipaꞌkaan. Wanan naisurat,
“Si mapwirsa a Babilonia, si ina ran sarban pampam, tan si puon nin sarban nikasamaꞌ a gawaꞌ-gawaꞌ iti sa lutaꞌ.”
6 Naꞌkit ko nin nabok yay babayi nin say dayaꞌ ran tutawo nan Dios a saray pinati nin mangingiꞌdeng kona ni Jesus.
“Ambaleꞌ a nakaꞌngap ka? Ibaritaꞌ ko komo no ani a isimbulo ran siin si babayi tan si makapaliꞌmon ayep nin manruranan na a pito ray ulo na tan mapuloꞌ ray sara na. 8 Sitaw si ayep nin naꞌkit mo, nabyay yayna intaw baleꞌ nati yayna sawanin. Wanin man, sa amboꞌ maꞌteng lumiwaꞌ yadtaw sa priswan nin ubotc baleꞌ ikaꞌ ya liꞌ sa pakadusawan na anggan-angga. Ket saytaw liꞌ no lumiwaꞌ yayna, makaꞌngap sara liꞌ a tutawo nin say ngaran ra ket kai nin naisurat sa libron listawan ran saray magkamain nin anggan-angga nin byay a iti konan Dios nin nailistaynay ngaran ra baꞌyo ya et nin naparsa a mundo. Makaꞌngap sara anaod banaꞌ ta nabyay yayna intaw, nati yayna ket mabyay ya anamana.
9 Matkap a kadunungan tan ararem nin pakataros sa sayti. Say pito nin ulo nan si makapaliꞌmon ayep, iꞌdeng a pitoy talugtog a mantekrean nan babayi. 10 Iꞌdeng et nin sayti a pito ray adiꞌ. Saray lima, nayadiꞌ sarayna nin nagꞌuray, si saya mampagꞌuray ya sawanin, tan si saya ket adapen na tamoꞌ et a magꞌuray. Baleꞌ anted liꞌ tamoꞌ a panaon nin aburuyan a pagꞌuuray na. 11 Sitaw si makapaliꞌmon ayep nin nabyay ana intaw baleꞌ nati yayna sawanin, manꞌibilang yan ikawalon adiꞌ baleꞌ say pete-peteg ket saya ya konran pitoy adiꞌ. Say piugutan na ket say madusa liꞌ anggan-angga.
12 Saytaw say mapuloꞌ ray sara nin naꞌkit mo, iꞌdeng saray mapuloꞌ a adiꞌ a kai et nin nagꞌuray, baleꞌ byan sara liꞌ nin pakayadiꞌ nin kipagꞌuray konan makapaliꞌmon ayep sa anted tamoꞌ nin udas. 13 Banaꞌ ta sarayti ket sayan-saya a gagara ra, ipaisirong ray pakayadiꞌ tan pakauray ra konan makapaliꞌmon ayep. 14 Labanan raya liꞌ a Karniro baleꞌ, si Karniro, daegen nasara liꞌ a uadiꞌ banaꞌ ta sya, Uunuren ya nin sarban uunuren tan syay Adiꞌ nin sarban uadiꞌ. Saray kalalamoꞌ na ket saraytaw saray tutuo kona a sara piniliꞌ tan sinagyat nasara.”
15 Nituloy nan anghil a wana kongko, “Saytaw say abaw nin uilog a naꞌkit mo nin tinekrean nan si pampam, iꞌdeng a dudupong nin tutawo nin nagsikabarang a nasyon, dayaꞌ tan saritaꞌ. 16 Baleꞌ si makapaliꞌmon ayep tan say mapuloꞌ a sara ket guraen raya a pampam, ket kalapen ra liꞌ a sarba nin main na nin labusan raya. Kanen ra liꞌ a laman na tan puuran ra liꞌ a taraꞌ ra. 17 Mangyadiꞌ ti konan babayi banaꞌ ta si Dios a mangikwa sa kaisipan ra sa gawꞌen ra ta pigaw nin matukid a nigagara nan mangyadiꞌ. Siin a rason a nikikumpurmi sara nin nipaisirong ray pakayadiꞌ tan pakauray ra konan makapaliꞌmon ayep anggan say nibaritaꞌ nan Dios ket matukid.
18 Sawanin, sitaw si babayin naꞌkit mo ket iꞌdeng nayay bantog nin syudad nin iti sara sa sirong nin masakupan na a magꞌuuray iti sa mundo.”