16
Kaaram, main nin narngeꞌ kon maksaw nin busis itaw sa Sangkasantusan nin Lugar a wana konran saray pitoy anghil, “Ikaꞌ moyoyna nin ibuꞌboꞌ itaw sa lutaꞌ in say isen sa yawong a say alakin sager nan Dios!”2 Ket si uꞌnan anghil, nako na nibuꞌboꞌ a laman nan yawong na sa lutaꞌ. Ket saray tutawo nin nipamarka nin si marka nan si makapaliꞌmon ayep tan rinayo raya a imahin na, tinumra-tumrak a katat ra nin pinasyan sakit tan makaparmay.
3 Sinmunor, nibuꞌboꞌ nan ikarwan anghil a laman nan yawong na sa taaw. Ket nagbaliw nin dayaꞌ a ranom, bilang nin dayaꞌ nin natin tawo. Ket sarban itaw nin mangkabyay, nati.
4 Sinmunor, nibuꞌboꞌ nan ikatlon anghil a laman nan yawong na sa uilog tan sa susubor, ket say ranom nagbaliw nin dayaꞌ. 5 Ket si anghil nin mampamaga sa raranom wana, “Siꞌka O Dios nin peteg nin masantos, a main kayna sin saytaw et sin taranaꞌ tan main ka et sawanin, sayti nin nisintinsya mon dusa ket mapteg. 6 Wanin ta saray mandusawen mo ket pinati-pati rasaray tutawo mo tan saray prupita mon nibakiꞌ mo kanyaꞌ nin inmagos a dayaꞌ ra, ket sawanin dayaꞌ a manꞌipainom mo konra. Manepeg in nin baleꞌ konra.”
7 Ket main nin narngeꞌ kon busis itaw sa altar a wana, “Oꞌ manepeg in, O Uunuren a Dios a Makapangyayadiꞌ sa sarba. Peteg a say nisintinsya mon dusa konran tutawo ket matunong tan mapteg!”
8 Sinmunor, nibuꞌboꞌ nan ikaꞌpat nin anghil a laman nan yawong na konan awro. Ket nagꞌin pinasyan tuloy amot nan awro ket saray tutawo mapuuran sara. 9 Baleꞌ sin napuuran saraynay tutawo nin say pinasyan sakit nin amot, kai ra et nin nagbabawian a dukaꞌ a gawaꞌ ra a, imbis kumon ket itandudoꞌ raya a ngaran nan Dios a syay main nin kapangyadian nin mamin sayti nin masakit a dyaꞌdyaꞌ. Ana edet, nagꞌirgu-irgo sara nin dukaꞌ kuntra konan Dios.
10 Sinmunor, nibuꞌboꞌ nan ikaliman anghil a laman nan yawong na sa truno nan makapaliꞌmon ayep, ket dinmedlem sa pagꞌadian nan siti. Kinayat-kayat ray labiꞌ ran tutawo banaꞌ sa masakit nin irab a maingar ra. 11 Wanin man, kai ra nin nagbabawian a dukaꞌ a gawaꞌ-gawaꞌ ra no kai edet, nagꞌirgu-irgo sara nin dukaꞌ kuntra konan Dios itaw sa langit banaꞌ sa pinasyan irab nin tinumra-tumrak konra.
12 Sinmunor, nibuꞌboꞌ nan ikaꞌnem nin anghil a laman nan yawong na sa alawang nin ilog a mantawagen nin Eufrates. Ket, naꞌtyan ya a ilog ket nagkamain nin dalan para konran uadiꞌ tan saray sundaloꞌ ra mangibwat sa lulugar sa baytan. 13 Main anamaet nin naꞌkit kon tulo ray makaparmay nin dukaꞌ a uispirito nin bakas pasang. Linumwaꞌ sara sa bebey nan si dragon, si makapaliꞌmon ayep, tan si ayep a syay prupita nin mampibulaꞌ-bulaꞌa. 14 Sarayti nin uispirito ket dimunyo saran makagwaꞌ nin makapakaꞌngap a mangyadiꞌ. Nibakiꞌ sara nin keen rasara dinepen a sarba ran mampagꞌuray iti sa mundo ta pigaw nin mako sara kigira konan Dios a syay Makapangyayadiꞌ sa sarba, konan sitaw si sangkaimpurtantiwan nin awro nin manusa ya. 15 Baleꞌ panemtemen moyoy nibaritaꞌ na ni Catawan a wana,
“Anaod, say kasusubliꞌ kodti ket kapada nin kararateꞌ nan mannakaw. Ket makarmaꞌ yay tawo nin mantagaꞌnan nan sisasadyaꞌ ti, ket nakaseket ya tan amboꞌ ya nin labos ta pigaw nin kai ya madingꞌeyan.”
16 Anaod, saray dudimunyo ket dininep rasaradtaw a susundaloꞌ ran mumampagꞌuray sa lugar a say tawag kona sa saritaꞌ nin Hebreo ket Armagedon.
17 Sinmunor, nibuꞌboꞌ nan ikapiton anghil a laman nan yawong na sa siri.
Ket main nin narngeꞌ kon busis nangibwat itaw sa truno sa Sangkasantusan nin Lugar a wana, “Nayadiꞌ ana!”
18 Ket kapingmatan kinmidla-kidlap a kimat, nararkib a kudor tan rinmayon nin pinasyan kasaw. Kai ya et gapo nin rinmayon nin wanti kaksaw nangibwat sin naparsa anay tawo. 19 Ket si bantog a syudad, napitlo yan natau-tao tan say sarban syudad iti sa lutaꞌ ket nasidaꞌ. Ket, kai na liningwanan nin Dios a makaimpluwinsyan kadukaan nan syudad nin Babilonia, ta nipairangep na kona a makapaliꞌmo nin sager na. 20 Linumdeg a sarba nin puroꞌ tan natbag a sarba nin talugtog. 21 Rinmapeg nin pinasyan kaalalakyan nin yilo, a say byat nin saya ket magꞌaꞌpat a puloꞌ a kilo. Nadagꞌa-dagꞌanan saray tutawo ket nagꞌirgu-irgo saran dukaꞌ kuntra konan Dios banaꞌ sa sayti, banaꞌ ta napadyaꞌdyaꞌ saran tuloy.