Say Masusuyot nin Pitoy Klasin Pammadyaꞌdyaꞌ
15
Ket, main anamanan makapakaꞌngap nin nangyadiꞌ sa langit a naꞌkit ko nin sayti ket impurtanti a pipaꞌkaan. Maipaꞌkaꞌ ti konran piton anghil nin nangipudiran nin pitoy bakas nin pammadyaꞌdyaꞌ. Sayti a masusuyot a pammadyaꞌdyaꞌ banaꞌ ta sayti a panglaꞌpusan nin panunusa nan Dios banaꞌ sa alakin sager na konran sa lutaꞌ.2 Main nin naꞌkit kon baraꞌmon taaw nin sarming a bilang main nin apoy tan main anamaet nin manꞌumdeng sa babo na nin gaꞌget ray arpa a nibi nan Dios konra. Sarayti a nanalo konan si makapaliꞌmon ayep banaꞌ ta kai raya nin rinayo a imahin na tan kai sara nin nipamarka nin si numiro nan ngaran na. 3 Ket mangkansyunen rayay kansyon nan si aripen nan Dios a si Moisesa tan kansyon nan lamang nin si Karniro. Wanra,
“O Uunuren a Dios a Makapangyayadiꞌ sa sarba,
say gawaꞌ mo ket raraywen tan makapakaꞌngap.
Siꞌka a Adiꞌ nin sarban nasyonb ket
say sarban gawaꞌ mo, matunong tan mapteg.
4 Kasa nin siꞌnuman a andiꞌ nin mangalilbiꞌ komo a Uunuren ka.
Kasa gapo nin andiꞌ nin maitandudoꞌ ya a ngaran mo.
Wanin ta siꞌka tamoꞌ a peteg nin masantos.
Oꞌ, saray tutawo nin mangibwat sa sarba nin nasyon ket
umarak sara komo ta pigaw nin
raywen raka banaꞌ ta nipaꞌkit mo a sarban mapteg a ginwa-ginwaꞌ mo.”
Say Alakin Sager nan Dios ket Ibuꞌboꞌ ra sa Lutaꞌ nin saray Pitoy Anghil
5 Kayadiꞌ nin naipaꞌkit in kongko, naꞌkit ko nin niabri yay si Sangkasantusan nin Lugar sa Pangraywan sa langit a syayti a pakaꞌkitan a itaw yay Dios. 6 Ket saraytaw saray pitoy anghil nin nakaipudiran nin say pitoy bakas nin pammadyaꞌdyaꞌ, linumwaꞌ saradtaw sa Sangkasantusan nin Lugar. Nisket saran gawaꞌ sa abel nin pinasyan linis tan masileng a mantawagen nin diilo tan main nin sas ran balitok sa kerep. 7 Si saya konran aꞌpat a sibibyay nin pinarsa, binyan nasara a pitoy anghil nin pito ray balitok nin yawong a napnoꞌ nin say alakin sager nan Dios a magnayon nin mabyay anggan-angga. 8 Ket, si Sangkasantusan nin Lugar, napnoꞌ yan asok nin pakaipadar nin pakayadiꞌ tan sangkaidumawan nin sager nan Dios. Ket kasa gapo nin makasrep itaw anggan saytaw say pitoy bakas nin pammadyaꞌdyaꞌ nin nipudir konran pitoy anghil ket nayadiꞌ ana.